ದುಬೈ/ ನವದೆಹಲಿ: ದುಬೈನ ವಿಮಾನ ನಿಲ್ದಾಣದಲ್ಲಿ ಟೇಕ್ ಆಫ್ ಆಗುತ್ತಿದ್ದ ವೇಳೆ ದುಬೈನಿಂದ ಹೈದರಾಬಾದ್ ಮತ್ತು ದುಬೈನಿಂದ ಬೆಂಗಳೂರಿಗೆ ಬರುತ್ತಿದ್ದ ಎಮಿರೇಟ್ಸ್ ವಿಮಾನಗಳ ನಡುವೆ ಆಗಬೇಕಿದ್ದ ಡಿಕ್ಕಿ ಸ್ಪಲ್ಪದರಲ್ಲೇ ತಪ್ಪಿದ್ದು, ಭಾರಿ ಅನಾಹುತದಿಂದ ಬಚಾವ್ ಆಗಿ ನಿಟ್ಟುಸಿರು ಬಿಡುವಂತಾಗಿದೆ.
ನಿಗದಿಯಂತೆ ದುಬೈ ಬೆಂಗಳೂರು ವಿಮಾನ ಬೆಂಗಳೂರಿನತ್ತ ಹೊರಡಲು ಟೇಕ್ ಅಪ್ ಆಗಿತ್ತು. ಇದೇ ವೇಳೆ, ಮತ್ತೊಂದು ವಿಮಾನ ಸಹ ಟೇಕ್ ಅಪ್ ಆಗಿದೆ. ಹೀಗಾಗಿ ಎರಡು ವಿಮಾನಗಳ ನಡುವೆ ಡಿಕ್ಕಿ ಆಗುವ ಸಂಭವ ಇತ್ತು. ಆದರೆ ಅದೃಷ್ಟವಶಾತ್ ಎರಡೂ ವಿಮಾನಗಳ ನಡುವೆ ಸಂಭವಿಸಬಹುದಾಗಿದ್ದ ಡಿಕ್ಕಿ ಕೂದಲೆಳೆ ಅಂತರದಿಂದ ತಪ್ಪಿದೆ.
ಹೀಗಾಗಿದ್ದು ಏಕೆ?
ಎಮಿರೇಟ್ಸ್ ವಿಮಾನ ವೇಳಾಪಟ್ಟಿ ಪ್ರಕಾರ, ಎರಡು ವಿಮಾನಗಳ ನಿರ್ಗಮನ ಸಮಯದ ನಡುವೆ ಕೆಲ ನಿಮಿಷಗಳ ಅಂತರವಿರುತ್ತದೆ. ದುಬೈನಿಂದ ಹೈದರಾಬಾದ್ ಗೆ ಬರುತ್ತಿದ್ದ ಇಕೆ -524 ವಿಮಾನ 30 ಆರ್ ನಿಂದ ಟೇಕ್ ಆಫ್ ಮಾಡಲು ಬರುತ್ತಿದ್ದಾಗ ಅದೇ ದಿಕ್ಕಿನಲ್ಲಿ ಅತಿ ವೇಗವಾಗಿ ಮತ್ತೊಂದು ವಿಮಾನ ಬರುತ್ತಿರುವುದನ್ನು ಸಿಬ್ಬಂದಿ ನೋಡಿದ್ದಾರೆ. ತಕ್ಷಣವೇ ಕಾರ್ಯ ಪ್ರವೃತ್ತರಾದ ವಿಮಾನಯಾನ ನಿಯಂತ್ರಣ ಅಧಿಕಾರಿಗಳು ಟೆಕ್ ಅಪ್ ಆಗದಂತೆ ಸೂಚನೆ ನೀಡಿದ್ದಾರೆ. ಇದರಿಂದಾಗಿ ಆಗಬಹುದಾಗಿದ್ದ ಅನಾಹುತವೊಂದು ತಪ್ಪಿದೆ.
ಶುರುವಾದ ತನಿಖೆ: ಮಾಹಿತಿ ಹಂಚಿಕೊಳ್ಳುವಂತೆ ಭಾರತದ ಮನವಿ
ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿರುವ ಯುಎಇ ವಾಯುಯಾನ ಸಂಸ್ಥೆ ತನಿಖೆಗೆ ಆದೇಶಿಸಿದ್ದು, ತನಿಖೆ ಕೂಡಾ ಆರಂಭಿಸಿದೆ. ಈ ನಡುವೆ ಈ ತನಿಖೆಯ ಮಾಹಿತಿಯನ್ನು ತನ್ನೊಂದಿಗೆ ಹಂಚಿಕೊಳ್ಳಬೇಕು ಎಂದು ಅಲ್ಲಿನ ಅಧಿಕಾರಿಗಳನ್ನು ಕೇಳಿಕೊಂಡಿದೆ. ಈ ವಿಷಯವನ್ನಿ ಡಿಜಿಸಿಎ ಮುಖ್ಯಸ್ಥ ಅರುಣ್ ಕುಮಾರ್ ಸ್ಪಷ್ಟಪಡಿಸಿದ್ದಾರೆ.
ಇದೇ ವೇಳೆ, ಆ ದೇಶದಲ್ಲಿ ಈ ಘಟನೆ ನಡೆದಿರುವುದರಿಂದ ಭಾರತೀಯ ವಿಮಾನಯಾನ ಇಲಾಖೆ ತನಿಖೆ ನಡೆಸಲು ಸಾಧ್ಯವಿಲ್ಲ. ಹೀಗಾಗಿ ತನಿಖಾ ಮಾಹಿತಿ ಹಂಚಿಕೊಳ್ಳುವಂತೆ ಕೇಳಿದ್ದೇವೆ ಎಂದು ಸ್ಪಷ್ಟ ಪಡಿಸಿದ್ದಾರೆ.
ಇದನ್ನು ಓದಿ:ಕುಸಿದ ಮನೆ ಅವಶೇಷದಡಿ ಸಿಲುಕಿದ್ದ ಶ್ವಾನ.. ಆರು ದಿನಗಳ ಬಳಿಕವೂ ಬದುಕುಳಿದ ಬಡಜೀವ!
