ಕಣ್ಣೂರು (ಕೇರಳ) : ಭಾನುವಾರ ನೀಟ್ ಪರೀಕ್ಷೆ ಬರೆಯಲು ಆಗಮಿಸುತ್ತಿದ್ದ ವಿದ್ಯಾರ್ಥಿನಿ ಟ್ರಾಫಿಕ್ ಜಾಮ್ನಲ್ಲಿ ಸಿಲುಕಿ ಪರದಾಡಿರುವ ಘಟನೆ ಕೇರಳದ ಕಣ್ಣೂರು ಜಿಲ್ಲೆಯಲ್ಲಿ ನಡೆದಿದೆ. ವಿದ್ಯಾರ್ಥಿನಿಯೋರ್ವರು ನೀಟ್ ಪರೀಕ್ಷೆ ಬರೆಯಲು ಆಗಮಿಸುವ ವೇಳೆ ಕಣ್ಣೂರು - ಪಯ್ಯನ್ನೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕಂಟೈನರ್ ಲಾರಿ ಪಲ್ಟಿಯಾಗಿತ್ತು. ಇದರಿಂದಾಗಿ ಹೆದ್ದಾರಿಯಲ್ಲಿ ಸಂಚಾರ ದಟ್ಟಣೆ ಉಂಟಾಗಿದ್ದು, ವಿದ್ಯಾರ್ಥಿನಿ ತಡವಾಗಿ ನೀಟ್ ಪರೀಕ್ಷೆಗೆ ಹಾಜರಾಗಿದ್ದಾರೆ. ಈ ಸಂಚಾರ ದಟ್ಟಣೆಯಿಂದಾಗಿ ಹಲವು ವಿದ್ಯಾರ್ಥಿಗಳು ಪರೀಕ್ಷಾ ಕೇಂದ್ರಕ್ಕೆ ತಲುಪಲು ಸಾಧ್ಯವಾಗಿಲ್ಲ.
ಕೂತುಪರಂಬ ನಿರ್ಮಲಗಿರಿ ನಿವಾಸಿಯಾದ ನಯನಾ ಜಾರ್ಜ್ ನೀಟ್ ಪರೀಕ್ಷೆ ಬರೆಯಲು ಪಯ್ಯನ್ನೂರಿನ ಪೆರುಂಬಾ ಲತೀಫಿಯಾ ಇಂಗ್ಲಿಷ್ ಮೀಡಿಯಂ ಸ್ಕೂಲ್ಗೆ ಆಗಮಿಸುತ್ತಿದ್ದರು. ಇವರು ಮಧ್ಯಾಹ್ನ 12 ಗಂಟೆ ಒಳಗೆ ಪರೀಕ್ಷಾ ಕೇಂದ್ರಕ್ಕೆ ತಲುಪಬೇಕಿತ್ತು. ಈ ಹಿನ್ನೆಲೆ ನಯನಾ ಜಾರ್ಜ್ ತನ್ನ ತಾಯಿ ರೋಸ್ ಮೇರಿ ಮತ್ತು ತಂದೆ ಜಾರ್ಜ್ ಅವರೊಂದಿಗೆ ಕಾರಿನಲ್ಲಿ ಬೆಳಗ್ಗೆ 9 ಗಂಟೆಗೆ ಮನೆಯಿಂದ ಹೊರಟಿದ್ದರು.
ಇವರ ಮನೆಯಿಂದ ಪಯ್ಯನ್ನೂರಿಗೆ 62 ಕಿ.ಮೀ ದೂರವಿದೆ. ಸಾಮಾನ್ಯವಾಗಿ ಇವರ ಮನೆಯಿಂದ ಎರಡು ಗಂಟೆಗಳಲ್ಲಿ ಪಯ್ಯನ್ನೂರು ತಲುಪಬಹುದು. ಬೇಗವೇ ಹೊರಟಿದ್ದರಿಂದ 12 ಗಂಟೆ ಒಳಗೆ ಪಯ್ಯನ್ನೂರು ತಲುಪಬಹುದೆಂದು ನಯನಾ ಜಾರ್ಜ್ ತಂದೆ ಲೆಕ್ಕ ಹಾಕಿದ್ದಾರೆ. ಆದರೆ ಇವರು ಕಣ್ಣೂರು ಚಾಲ ಕ್ರಾಸ್ ತಲುಪುತ್ತಲೇ ಇವರ ಲೆಕ್ಕಾಚಾರ ತಲೆ ಕೆಳಗಾಗಿತ್ತು. ಇಲ್ಲಿನ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚಾರ ದಟ್ಟಣೆ ನಿರ್ಮಾಣವಾಗಿತ್ತು. 50 ಕಿ.ಮೀ ಕ್ರಮಿಸಿದ್ದ ಅವರು ಮಧ್ಯಾಹ್ನ 12 ಗಂಟೆ ಹೊತ್ತಿಗೆ ಎಯಿಲ್ ಎಂಬಲ್ಲಿಗೆ ತಲುಪಿದ್ದಾರೆ. ಎಯಿಲೋಡ್ ಎಂಬಲ್ಲಿ ಕಂಟೇನರ್ ಲಾರಿ ಪಲ್ಟಿಯಾಗಿದ್ದು, ಇಲ್ಲಿ ಹಲವು ಗಂಟೆಗಳ ಕಾಲ ಟ್ರಾಫಿಕ್ ಜಾಮ್ ಉಂಟಾಗಿತ್ತು. ಅಲ್ಲದೆ ಇಲ್ಲಿ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಯೂ ಇಲ್ಲಿ ನಡೆಯುತ್ತಿದೆ.
ಎಯಿಲೋಡ್ನಿಂದ ಪಯ್ಯನ್ನೂರಿಗೆ ಕೇವಲ ಐದು ಕಿ.ಮೀ ದೂರ ಇದ್ದು, ಈ ವೇಳೆ ನಯನಾ ಜಾರ್ಜ್ 12.45ರವರೆಗೆ ಕಾದರೂ ವಾಹನ ದಟ್ಟಣೆ ಕಡಿಮೆಯಾಗಿಲ್ಲ. ಬಳಿಕ ವಿದ್ಯಾರ್ಥಿನಿ ನಯನಾ ಮತ್ತು ಆಕೆಯ ತಾಯಿ ಕಾರಿನಿಂದ ಇಳಿದು ಓಡಿಕೊಂಡು ಪರೀಕ್ಷಾ ಕೇಂದ್ರಕ್ಕೆ ತೆರಳಲು ನಿರ್ಧರಿಸಿದ್ದಾರೆ. ಈ ವೇಳೆ ರಸ್ತೆಯಲ್ಲಿ ಓಡುತ್ತಿರಬೇಕಾದರೆ ಬೈಕ್ ಸವಾರನೊಬ್ಬ ವಿದ್ಯಾರ್ಥಿನಿ ನಯನಾ ಜಾರ್ಜ್ಗೆ ಪರೀಕ್ಷಾ ಕೇಂದ್ರಕ್ಕೆ ಕರೆದುಕೊಂಡು ಹೋಗಿ ಸಹಾಯ ಮಾಡಿದ್ದಾನೆ. ಆದರೂ ವಿದ್ಯಾರ್ಥಿನಿ ನಾಲ್ಕು ನಿಮಿಷ ತಡವಾಗಿ ಪರೀಕ್ಷೆಗೆ ಹಾಜರಾಗಿದ್ದಾಳೆ.
ತಾಯಿ ಪರೀಕ್ಷಾ ಕೇಂದ್ರಕ್ಕೆ ತಲುಪುತ್ತಲೇ ತಲೆ ತಿರುಗಿ ಬಿದ್ದಿದ್ದರು. ಬಳಿಕ ಆಗಮಿಸಿದ ನಯನಾ ಅವರ ತಂದೆ ರೋಸ್ ಮೇರಿ ಅವರನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ನೀಡಿದ್ದಾರೆ. ಬಳಿಕ ಒಂದು ವರ್ಷ ಕಾಲ ಕೋಚಿಂಗ್ ನಂತರ ನಯನಾ ಜಾರ್ಜ್ ನೀಟ್ ಪರೀಕ್ಷೆ ಬರೆದರು. ಇದೇ ರೀತಿ ಟ್ರಾಫಿಕ್ನಿಂದಾಗಿ ಹಲವು ವಿದ್ಯಾರ್ಥಿಗಳು ನೀಟ್ ಪರೀಕ್ಷೆ ಬರೆಯಲು ಸಾಧ್ಯವಾಗಿಲ್ಲ ಎಂದು ತಿಳಿದುಬಂದಿದೆ.
ಇದನ್ನೂ ಓದಿ : ಬ್ಯಾಂಕ್ ಆಫ್ ಬರೋಡಾದಲ್ಲಿ ಉದ್ಯೋಗಾವಕಾಶ; 157 ಹುದ್ದೆಗೆ ಅರ್ಜಿ ಆಹ್ವಾನ
