ಬೆಹ್ರೋರ್ (ರಾಜಸ್ಥಾನ): ಏನೋ ಮಾಡಲು ಹೋಗಿ ಏನೋ ಆಯ್ತು ಎಂಬಂತಿದೆ ಈ ಪ್ರಸಂಗ. ಶಾಸಕರೊಬ್ಬರು ಕಾರ್ಯಕರ್ತರಿಗೆ ಕೃತಜ್ಞತೆ ಸಲ್ಲಿಸುವ ಸಲುವಾಗಿ ತಮ್ಮ ಕ್ಷೇತ್ರದ ಪ್ರತಿ ಹಳ್ಳಿಗಳಿಗೆ ಹೆಲಿಕಾಪ್ಟರ್ನಿಂದ ಪುಷ್ಪವೃಷ್ಟಿ ಮಾಡಿಸುತ್ತಿದ್ದಾರೆ. ಈ ವೇಳೆ ಕಾಪ್ಟರ್ ಸದ್ದಿಗೆ ಎಮ್ಮೆ ಸತ್ತಿದೆ ಎಂದು ಗ್ರಾಮದ ವ್ಯಕ್ತಿಯೊಬ್ಬರು ಶಾಸಕ ಮತ್ತು ಪೈಲಟ್ ಮೇಲೆ ದೂರು ನೀಡಿದ್ದಾರೆ.
ಈ ವಿಚಿತ್ರ ದೂರು ದಾಖಲಾಗಿದ್ದು ರಾಜಸ್ಥಾನದ ಬೆಹ್ರೋರ್ ಜಿಲ್ಲೆಯಲ್ಲಿ. ಮನೆಯ ಮೇಲೆ ಕಾಪ್ಟರ್ ಹಾರಿದಾಗ ಕೊಟ್ಟಿಗೆಯಲ್ಲಿ ಕಟ್ಟಿದ್ದ ಎಮ್ಮೆ ಶಬ್ದಕ್ಕೆ ಹೆದರಿ ಹೃದಯಾಘಾತಕ್ಕೀಡಾಗಿ ಮೃತಪಟ್ಟಿದೆಯಂತೆ. ತಮಗೆ ಪರಿಹಾರ ಕೊಡಿಸಬೇಕು ಎಂದು ಎಮ್ಮೆ ಮಾಲೀಕ ಆಗ್ರಹಿಸಿದ್ದಾರೆ.
ಪೈಲಟ್ ನಿರ್ಲಕ್ಷ್ಯವಂತೆ: ಗ್ರಾಮದಲ್ಲಿ ಪುಷ್ಪವೃಷ್ಟಿಗೆಂದು 10 ಮೀಟರ್ ಎತ್ತರದಲ್ಲಿ ಹೆಲಿಕಾಪ್ಟರ್ ಹಾರಿಸಲಾಗಿದೆ. ಇಷ್ಟು ಕಡಿಮೆ ಎತ್ತರದಲ್ಲಿ ಹಾರಿಸಿದ್ದಕ್ಕೆ ದೊಡ್ಡ ಸದ್ದಿನಿಂದ ಒಂದೂವರೆ ಲಕ್ಷ ರೂಪಾಯಿ ಮೌಲ್ಯದ ಎಮ್ಮೆ ಪ್ರಾಣ ಕಳೆದುಕೊಂಡಿದೆ. ಇದಕ್ಕೆ ಪೈಲಟ್ ನಿರ್ಲಕ್ಷ್ಯವೇ ಕಾರಣವಾಗಿದೆ. ಎಮ್ಮೆಯನ್ನು ಕೊಡಿಸಿ ಇಲ್ಲವೇ, ಹಣ ನೀಡಿ ಎಂದು ಆ ರೈತ ಬೇಡಿಕೆ ಮಂಡಿಸಿದ್ದಾನೆ.
ಈ ಬಗ್ಗೆ ದೂರು ಪಡೆದಿರುವ ಪೊಲೀಸರು ತನಿಖೆಗೆ ಮುಂದಾಗಿದ್ದಾರೆ. ಎಮ್ಮೆಗೆ ವೈದ್ಯಕೀಯ ಪರೀಕ್ಷೆ ನಡೆಸಲಾಗಿದೆ. ವರದಿ ಬಂದ ಬಳಿಕ ಸಾವಿಗೆ ಕಾರಣ ತಿಳಿದುಬರಲಿದೆ. ನಂತರ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.
ಓದಿ: ಜಾಲತಾಣಗಳಲ್ಲಿ ಆಯುಧದೊಂದಿಗೆ ಫೋಟೋ ಹಾಕುವಂತಿಲ್ಲ: ಬಂದೂಕು ಸಂಸ್ಕೃತಿಗೆ ಕಡಿವಾಣ
