ಕತಾರ್ ಏರ್‌ವೇಸ್​​​ನಲ್ಲಿ ಬಾಂಬ್​ ಭೀತಿ: ಪ್ರಯಾಣಿಕನೇ ಹಬ್ಬಿಸಿದ ಸುಳ್ಳು ಸುದ್ದಿ.. ತಪಾಸಣೆ ಬಳಿಕ ನಿಟ್ಟುಸಿರು ಬಿಟ್ಟ ಪ್ರಯಾಣಿಕರು!

ಕೋಲ್ಕತ್ತಾದಿಂದ ದೋಹಾಗೆ ತೆರಳ ಬೇಕಿದ್ದ ವಿಮಾನ ಟೇಕ್​ ಆಫ್​ ಆಗುವ ವೇಳೆ ಬಾಂಬ್​ ಇದೆ ಎಂಬ ಸುದ್ದಿ ಹರಡಿದೆ. ಈ ವೇಳೆ ಪ್ರಯಾಣಿಕರನ್ನು ಕೆಳಗಿಳಿಸಿ ಅಧಿಕಾರಿಗಳು ವಿಮಾನ ತಪಾಸಣೆ ನಡೆಸಿ,ಇದೊಂದು ಸುಳ್ಳು ಸುದ್ದಿ ಎಂಬುದನ್ನು ಖಚಿತ ಪಡಿಸಿಕೊಂಡಿದ್ದಾರೆ.

ಕೋಲ್ಕತ್ತಾ (ಪಶ್ಚಿಮ ಬಂಗಾಳ): ಇಲ್ಲಿನ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಮಂಗಳವಾರ ಬೆಳಗ್ಗೆ ವಿಮಾನದಲ್ಲಿ ಬಾಂಬ್ ಇದೆ ಎಂದು ಸುಳ್ಳು ಸುದ್ದಿ ಹರಡಿತ್ತು. ಪ್ರಯಾಣಿಕನೊಬ್ಬ ವಿಮಾನ ಹಾರಾಟಕ್ಕೆ ಮುನ್ನ ಈ ರೀತಿಯ ಭೀತಿಯೊಂದನ್ನು ಸೃಷ್ಟಿಸಿದ್ದ. ಇದರಿಂದ ವಿಮಾನದಲ್ಲಿದ್ದ ಪ್ರಯಾಣಿಕರನ್ನು ಕೆಳಕ್ಕೆ ಇಳಿಸಿ ತಪಾಸಣೆ ಮಾಡಲಾಯಿತು. ಆದರೆ ವಿಮಾನದಲ್ಲಿ ಬಾಂಬ್​ ಇರಲಿಲ್ಲ ಎಂಬ ಮಾಹಿತಿ ತಪಾಸಣೆ ಬಳಿಕ ಖಚಿತವಾಯಿತು. ಇದರಿಂದ ಪ್ರಯಾಣಿಕರು ನಿಟ್ಟುಸಿರು ಬಿಟ್ಟರು.

ಮುಂಜಾನೆ 3:29ಕ್ಕೆ ಕತಾರ್ ಏರ್‌ವೇಸ್ ವಿಮಾನದಲ್ಲಿ ಬಾಂಬ್ ಭೀತಿ ಹರಡಿತ್ತು. ಕೋಲ್ಕತ್ತಾದಿಂದ ದೋಹಾಗೆ ಹೊರಟಿದ್ದ QR 541 ವಿಮಾನದಲ್ಲಿ ಪ್ರಯಾಣಿಕ ಒಬ್ಬ ಕಿರುಚಾಟ ನಡೆಸಿದ್ದ, ಇದರಿಂದಾಗಿ ಸಿಬ್ಬಂದಿ ಭಯಭೀತರಾಗಿದ್ದರು. ಅಲ್ಲದೇ ಸಹ ಪ್ರಯಾಣಿಕರು ಸಹ ಭೀತಿಗೆ ಒಳಗಾಗಿದ್ದರು. ಬಾಂಬ್​ ಭೀತಿಯ ಸುದ್ದಿ ಕೇಳುತ್ತಿದ್ದಂತೆ ಸಿಬ್ಬಂದಿ ಭದ್ರತಾ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದರು.

ಭದ್ರತಾ ಅಧಿಕಾರಿಗಳು ಕಿರುಚಾಡುತ್ತಿದ್ದ ವ್ಯಕ್ತಿಯನ್ನು ವಿಚಾರಣೆ ನಡೆಸಿದ ಬಳಿಕ, ಆತನ ಹೇಳಿಕೆಯಂತೆ ವಿಮಾನದಲ್ಲಿದ್ದ ಪ್ರಯಾಣಿಕರು ಮತ್ತು ಸಿಬ್ಬಂದಿಯನ್ನು ಕೆಳಕ್ಕೆ ಇಳಿಸಿ, ವಿಮಾನವನ್ನು ತಪಾಸಣೆಗೆ ಒಳಪಡಿಸಿದ್ದರು. ತಪಾಸಣೆ ಬಳಿಕ ಅದರಲ್ಲಿ ಯಾವುದೇ ಬಾಂಬ್​ ಇರಲಿಲ್ಲ. ಇದೊಂದು ಸುಳ್ಳು ಸುದ್ದಿ ಎಂದು ಖಚಿತವಾಗಿತ್ತು.

ಇದನ್ನೂ ಓದಿ: ಮಣಿಪುರದಲ್ಲಿ ಭದ್ರತಾ ಪಡೆ ದಂಗೆಕೋರರ ನಡುವೆ ಗುಂಡಿನ ದಾಳಿ: ಬಿಎಸ್‌ಎಫ್ ಜವಾನ ಹುತಾತ್ಮ

ಈ ಹಿನ್ನೆಲೆಯಲ್ಲಿ ವಿಮಾನನಿಲ್ದಾಣದ ಭದ್ರತಾ ಸಿಬ್ಬಂದಿ ಹಾಗೂ ಸಿಐಎಸ್​ಎಫ್​ ಅಧಿಕಾರಿಗಳು ಕಿರುಚಾಟ ಹಾಗೂ ಕೂಗಾಟ ನಡೆಸಿದ್ದ ಮತ್ತು ಸುಳ್ಳು ಸುದ್ದಿಯನ್ನು ನೀಡಿದ ವ್ಯಕ್ತಿಯನ್ನು ವಿಚಾರಣೆಗೆ ಒಳಪಡಿಸಿದ್ದರು.

ಬಾಂಬ್ ಇದೆ ನಿನಗೆ ಹೇಗೆ ಗೊತ್ತಾಯಿತು ಎಂದು ಕೇಳಿದಾಗ ಯಾರೋ ಹೇಳಿದ್ದರು ಎಂದು ಉತ್ತರಿಸಿದ್ದ. ಆತ ಸರಿಯಾಗಿ ಉತ್ತರ ನೀಡದ ಹಿನ್ನೆಲೆಯಲ್ಲಿ ಯುವಕನ ತಂದೆಯನ್ನು ಕರೆಯಿಸಿ ವಿಚಾರಣೆ ನಡೆಸಿದ್ದಾರೆ. ಈ ವೇಳೆ ಸುಳ್ಳು ಸುದ್ದಿ ನೀಡಿದ ಯುವಕನ ತಂದೆ, ಮಗ ಅಪರೂಪದ ಕಾಯಿಲೆಯಿಂದ ಬಳಲುತ್ತಿರುವ ಬಗ್ಗೆ ಮಾಹಿತಿ ನೀಡಿದ್ದಾರೆ.

ತಂದೆ ಮಾತು ನಿಜವೇ ಎಂಬುದನ್ನು ಅಧಿಕಾರಿಗಳು ಬಾಯಿ ಮಾತನ್ನು ನಂಬದೇ ಯುವಕನ ವೈದ್ಯಕೀಯ ದಾಖಲೆಗಳನ್ನು ಕೊಡುವಂತೆ ತಿಳಿಸಿದ್ದಾರೆ. ಅದರಂತೆ ಕೂಗಿಕೊಂಡ ಪ್ರಯಾಣಿಕನ ಪೋಷಕರು, ತಮ್ಮ ಮಗನ ವೈದ್ಯಕೀಯ ಮಾಹಿತಿಗಳನ್ನು ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆಗೆ ನೀಡಿದ್ದರು. ಈ ದಾಖಲೆಗಳನ್ನು ಪರಿಶೀಲಿಸಿದ ಅಧಿಕಾರಿಗಳಿಗೆ ಆ ಯುವಕ ಮಾನಸಿಕ ಅಸ್ವಸ್ಥ ಎಂಬುದು ಖಚಿತವಾಗಿತ್ತು.

ಆ ಬಳಿಕವೂ ಪ್ರಯಾಣಿಕರ ಸುರಕ್ಷತೆಯ ದೃಷ್ಟಿಯಿಂದ ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆ ಅಧಿಕಾರಿಗಳು ಪೊಲೀಸ್ ಶ್ವಾನಗಳೊಂದಿಗೆ ವಿಮಾನವನ್ನು ಶೋಧಿಸಿದರು. ಈ ನಡುವೆ ಹೀಗೆ ಹಲ್​ ಚಲ್​ ಸೃಷ್ಟಿಸಿದ ಪ್ರಯಾಣಿಕನನ್ನು ಜಾನ್ ಜಾವೇದ್ ಖಾಜಿ ಎಂದು ಗುರುತಿಸಲಾಗಿದೆ.

ಇದನ್ನೂ ಓದಿ: ಪಾಕಿಸ್ತಾನದಿಂದ ಗುಜರಾತ್ ಮೀನುಗಾರರ ಬಿಡುಗಡೆ: ಸುರಕ್ಷಿತವಾಗಿ ತಾಯ್ನಾಡಿಗೆ ಮರಳಿದ 200 ಮೀನುಗಾರರು