ನೀಮುಚ್ (ಮಧ್ಯಪ್ರದೇಶ): ಮಧ್ಯಪ್ರದೇಶದ ನೀಮುಚ್ ಜಿಲ್ಲೆಯಿಂದ 15 ಕಿ.ಮೀಟರ್ ದೂರ ಸಾಗಿದರೆ ಸಿಗುವ ಥಾಡೋಡ್ ಗ್ರಾಮ ವಿಶೇಷ ಆಲದ ಮರಗಳಿಂದ ಪ್ರಸಿದ್ಧಿ ಪಡೆದಿದೆ. ಶತಮಾನಗಳಷ್ಟು ಹಳೆಯ ಆಲದ ಮರಗಳು ಈ ಗ್ರಾಮದಲ್ಲಿದ್ದು, ಇಡೀ ಭೂ ಪ್ರದೇಶ ಹಸಿರಿನಿಂದ ಕೂಡಿದೆ. ಸುಮಾರು 3 ಹೆಕ್ಟೇರ್ ಪ್ರದೇಶದಲ್ಲಿ ಆಲದ ಮರಗಳು ಹರಡಿಕೊಂಡಿದ್ದು, ಈ ಮರಗಳು ಎಷ್ಟು ವರ್ಷ ಹಳೆಯವು ಎಂಬುದು ನಿಖರವಾಗಿ ತಿಳಿದು ಬಂದಿಲ್ಲ.
ಕಾಲಚಕ್ರ ಉರುಳಿದಂತೆ ಈ ಆಲದ ಮರಗಳು ಹಳೇಯದಾಗುತ್ತಾ ಬಂದಿವೆ. ಈಗ ಈ ಮರಗಳು ಮುರಿದು ಬೀಳುವ ಹಂತಕ್ಕೂ ತಲುಪಿವೆ. ಕೆಲವು ಮರಗಳ ಬೇರುಗಳು ದುರ್ಬಲವಾಗಿದ್ದು, ಮಣ್ಣಿನಿಂದ ಮೇಲೆದ್ದು ಬರುತ್ತಿವೆ. ವಿಶೇಷ ಅಂದರೆ ಈ ಮರಗಳ ನೆರಳಿನಲ್ಲಿಯೇ ಹಜರಾತ್ ಗಾಲಿಬ್ ಷಾ ಬಾಬಾರ ದರ್ಗಾ ಕೂಡ ಇದೆ.
ಈ ಆಲದ ಮರದ ಕೆಳಗಿರುವ ದರ್ಗಾದಲ್ಲಿ ಹಿಂದೂಗಳು ಸಹ ಪ್ರಾರ್ಥಿಸುತ್ತಾರೆ. ಹೀಗಾಗಿ ಈ ದರ್ಗಾಕ್ಕೆ ವಿಶೇಷ ಪ್ರಾಮುಖ್ಯತೆ ಇದ್ದು, ದೂರದ ಊರಿನಿಂದಲೂ ಇಲ್ಲಿಗೆ ಪ್ರಾರ್ಥನೆ ಮಾಡುವುದಕ್ಕೆ ಅಂತಾ ಜನರು ಆಗಮಿಸುತ್ತಾರೆ. ಈ ಮರಗಳ ರಕ್ಷಣೆಯ ಕಾರ್ಯ ಅರಣ್ಯ ಅಧಿಕಾರಿಗಳ ಜವಾಬ್ದಾರಿಯಾಗಿತ್ತು. ಆದರೆ, ಕಳೆದ 10 ವರ್ಷಗಳಿಂದ ಮರಗಳ ರಕ್ಷಣೆಯ ಕಡೆ ಇಲಾಖೆ ಗಮನಹರಿಸಿಲ್ಲ ಎಂಬುದು ಸ್ಥಳೀಯರ ಆರೋಪವಾಗಿದೆ.
ಗ್ರಾಮಸ್ಥರ ಪ್ರಕಾರ, ಕೆಲವು ದಿನಗಳ ಹಿಂದೆ ಜಿಲ್ಲಾಧಿಕಾರಿ ಮನೋಜ್ ಪುಷ್ಪ್ ಗ್ರಾಮಕ್ಕೆ ಪ್ರವಾಸ ಕೈಗೊಂಡಾಗ ಈ ಮರಗಳ ಸ್ಥಳಕ್ಕೆ ಭೇಟಿ ನೀಡಿದ್ದರು. ಈ ವೇಳೆ, ಅಪರೂಪದ ಆಲದ ಮರಗಳ ರಕ್ಷಣೆಗೆ ಮುಂದಾಗುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದರು.
ಈ ಮರಗಳಿಗೆ ಅತ್ಯಧಿಕ ನೀರಿನ ಅವಶ್ಯಕತೆ ಇದೆ ಹೀಗಾಗಿ ಮರದ ಸುತ್ತಲೂ ಮಣ್ಣು ಹಾಕಿ ತೇವಾಂಶ ಕಾಪಾಡುವಂತೆ ಮಾಡಲಾಗುತ್ತದೆ. ಇದೀಗ ಶತಮಾನಗಳ ಹಿಂದಿನ ಮರಗಳ ಸಂರಕ್ಷಣೆಗೆ ಸ್ಥಳೀಯರೇ ಕೈಜೋಡಿಸಿದ್ದು, ಈ ಆಲದ ವನ ಕಾಪಾಡಲು ಪಣ ತೊಟ್ಟಿದ್ದಾರೆ.
