ಅಹಮದ್ನಗರ(ಮಹಾರಾಷ್ಟ್ರ): ಕೊರೊನಾ ವೈರಸ್ ಹರಡುವ ಭೀತಿಯಿಂದ ದೇಶವನ್ನು ಮೇ 3ರ ವರೆಗೆ ಸಂಪೂರ್ಣ ಲಾಕ್ಡೌನ್ ಮಾಡಲಾಗಿದೆ. ಈ ಹಿನ್ನೆಲೆಯಲ್ಲಿ ಅನೇಕ ಜನರು ತಮ್ಮೂರಿಗೆ ಕಾಲ್ನಡಿಗೆ ಮೂಲಕವೇ ತೆರಳುತ್ತಿದ್ದಾರೆ. ಇದೇ ರೀತಿ 500 ಕಿ.ಮೀ. ದೂರದಲ್ಲಿರುವ ತನ್ನೂರಿಗೆ ಕಾಲ್ನಡಿಗೆಯಲ್ಲೇ ತೆರಳುತ್ತಿದ್ದ ಗರ್ಭಿಣಿಯೊಬ್ಬಳಿಗೆ ಎಟಿಎಂ ಬೂತ್ನಲ್ಲಿ ಹೆರಿಗೆಯಾಗಿದೆ.
ಪುಣೆಯ ಕೊರೆಗಾಂವ್ ಭೀಮಾ-ವಾಗೋಲಿಯಲ್ಲಿ ಕೆಲಸ ಮಾಡುತ್ತಿದ್ದ ಕುಟುಂಬವೊಂದು ಲಾಕ್ಡೌನ್ ಸಂದರ್ಭದಲ್ಲಿ 500 ಕಿ.ಮೀ ದೂರವಿರುವ ಯವತ್ಮಾಳ್ಗೆ ಔರಂಗಬಾದ್ ಹೆದ್ದಾರಿ ಮೂಲಕ ಕಾಲ್ನಡಿಗೆಯಲ್ಲಿ ತೆರಳುತ್ತಿತ್ತು. ಈ ವೇಳೆ ಔರಂಗಾಬಾದ್ ಹೆದ್ದಾರಿ ಬಳಿಯಿರುವ ವಡಲಾ ಬಹಿರೋ ಬಳಿ ತಲುಪುವಾಗ ಮಹಿಳೆಗೆ ಹೆರಿಗೆ ನೋವು ಕಾಣಿಸಿಕೊಂಡಿತ್ತು. ತಕ್ಷಣವೇ ಆಕೆಯನ್ನು ಪಕ್ಕದಲ್ಲೇ ಇದ್ದ ಎಟಿಎಂ ಬೂತ್ಗೆ ಕರೆದೊಯ್ಯಲಾಯಿತು. ಇನ್ನು ವಿಷಯ ತಿಳಿದ ತಕ್ಷಣ ಕೆಲ ದಾದಿಯರು ಆಗಮಿಸಿ ಮಹಿಳೆಗೆ ಹೆರಿಗೆ ಮಾಡಿಸಿದ್ದಾರೆ. ಮಹಿಳೆ ಮುದ್ದಾದ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾಳೆ.
ಘಟನೆ ತಿಳಿದ ಬಳಿಕ ತಹಶೀಲ್ದಾರ್ ರೂಪೇಶ್ ಕುಮಾರ್ ಸುರಾನ, ತಾಲೂಕು ಆರೋಗ್ಯಾಧಿಕಾರಿ ಅಭಿರಾಜ್ ಸೂರ್ಯವಂಶಿ ಆಗಮಿಸಿ ಮಹಿಳೆ ಮತ್ತು ಮಗುವನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
