ಚೀನಾದ ಯಾವುದೇ ಬೆದರಿಕೆ ನಿಭಾಯಿಸಲು ಭಾರತ ಸಂಪೂರ್ಣ ಸಮರ್ಥ: ವಾಯುಪಡೆ ಮುಖ್ಯಸ್ಥ ಭದೌರಿಯಾ

ಲಡಾಖ್ ಗಡಿ ವಿಚಾರವಾಗಿ ಭಾರತ - ಚೀನಾ ನಡುವೆ ಯುದ್ಧದ ಪರಿಸ್ಥಿತಿ ನಿರ್ಮಾಣಗೊಂಡಿದ್ದು, ಇದೇ ವಿಚಾರವಾಗಿ ವಾಯುಪಡೆ ಮುಖ್ಯಸ್ಥ ಭದೌರಿಯಾ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದರು.

ನವದೆಹಲಿ: ಪೂರ್ವ ಲಡಾಖ್​​ನ ಗಡಿ ನಿಯಂತ್ರಣ ರೇಖೆ ಉದ್ದಕ್ಕೂ ಚೀನಾದಿಂದ ಉಂಟಾಗುವ ಯಾವುದೇ ಬೆದರಿಕೆ ನಿಭಾಯಿಸಲು ಭಾರತ ಸಂಪೂರ್ಣವಾಗಿ ಸಮರ್ಥವಾಗಿದೆ. ನಮ್ಮ ವಾಯು ಶಕ್ತಿ ಎದುರು ಚೀನಾ ಬಲಿಷ್ಠವಾಗಿಲ್ಲ ಎಂದು ಭಾರತೀಯ ವಾಯುಪಡೆಯ(ಐಎಎಫ್​) ಮುಖ್ಯಸ್ಥ ಆರ್​ಕೆಎಸ್​​ ಭದೌರಿಯಾ ಹೇಳಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಭಾಗಿಯಾಗಿ ಮಾತನಾಡಿದ ಅವರು, ಯಾವುದೇ ದಾಳಿಯಲ್ಲಿ ಚೀನಾದ ಬಳಿ ಭಾರತದಷ್ಟು ಉತ್ತಮವಾದ ಶಸ್ತ್ರಾಸ್ತ್ರಗಳು ಇಲ್ಲ. ಆದರೆ, ನಮ್ಮ ಬಳಿ 5ನೇ ತಲೆಮಾರಿನ ಸುಧಾರಿತ ಸಂವೇದಕಗಳು ಹಾಗೂ ಯುದ್ಧ ತಂತ್ರಜ್ಞಾನವಿದೆ ಎಂದಿದ್ದಾರೆ.

ಕಳೆದ ಕೆಲ ತಿಂಗಳಿಂದ ಭಾರತ-ಚೀನಾ ನಡುವೆ ಲಡಾಖ್​ನ ಗಡಿ ನಿಯಂತ್ರಣ ರೇಖೆ ವಿಚಾರವಾಗಿ ಗೊಂದಲದ ವಾತಾವರಣ ನಿರ್ಮಾಣಗೊಂಡಿದ್ದು, ಇದೇ ವಿಚಾರವಾಗಿ ಸೆಪ್ಟೆಂಬರ್ 10 ರಂದು ಮಾಸ್ಕೋದಲ್ಲಿ ನಡೆದ ಶಾಂಘೈ ಸಮಾವೇಶದಲ್ಲಿ ಕೇಂದ್ರ ರಕ್ಷಣಾ ಸಚಿವರು ಹಾಗೂ ಚೀನಾ ಸಚಿವರ ನಡುವೆ ಮಾತುಕತೆ ಸಹ ನಡೆದಿದೆ.

ಅಕ್ಟೋಬರ್​​ 8ರಂದು ವಾಯುಪಡೆಯ ದಿನಾಚರಣೆ ಆಗಿದ್ದು, ಅದಕ್ಕೂ ಮೊದಲೇ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿರುವ ಭದೌರಿಯಾ, ಭಾರತದ ವಾಯು ಶಕ್ತಿ ಎದುರು ಚೀನಾದ ಸಾಮರ್ಥ್ಯ ಅಷ್ಟೊಂದು ಗಟ್ಟಿಯಾಗಿಲ್ಲ. ಅಂತಹ ಸನ್ನಿವೇಶ ಎದುರಾದರೆ ನಾವು ಯುದ್ಧಕ್ಕೆ ಸಿದ್ಧವಾಗಿದ್ದೇವೆ ಎಂದು ಅವರು ತಿಳಿಸಿದ್ದಾರೆ.

ಬಲ ತುಂಬಿದ ರಫೆಲ್​

ಈಗಾಗಲೇ ಭಾರತೀಯ ವಾಯುಸೇನೆ ಬತ್ತಳಿಕೆಗೆ ರಫೆಲ್​ ಯುದ್ಧ ವಿಮಾನ ಸೇರಿಕೊಂಡಿದ್ದು, ಇವು ನಮಗೆ ಮತ್ತಷ್ಟು ಶಕ್ತಿ ನೀಡಿವೆ ಎಂದು ಏರ್​ ಚೀಫ್​ ಮಾರ್ಷಲ್​ ಹೇಳಿದ್ದಾರೆ. ಭಾರತ ಈಗಾಗಲೇ ಫೈಟರ್​ ಜೆಟ್​ಗಳಾದ ಸುಖೋಯ್ 30 ಎಂಕೆಐ, ಜಾಗ್ವಾರ್ ಮತ್ತು ಮಿರಾಜ್ 2000 ವಿಮಾನಗಳನ್ನು ಪೂರ್ವ ಲಡಾಖ್‌ನ ಪ್ರಮುಖ ಗಡಿ ಪ್ರದೇಶಗಳಲ್ಲಿ ನಿಯೋಜನೆ ಮಾಡಿದೆ. ಭಾರತದ ಬಳಿ ಇರುವ ಐದು ರಫೆಲ್​ ಯುದ್ಧ ವಿಮಾನಗಳನ್ನ ಪೂರ್ವ ಲಡಾಖ್​​ ಬಳಿ ನಿಯೋಜನೆ ಮಾಡಲು ನಿರ್ಧರಿಸಲಾಗಿದೆ ಎಂದಿದ್ದಾರೆ.