ಅಮ್ರೋಹಾ(ಉತ್ತರ ಪ್ರದೇಶ): ಕೋಮು ಸೌಹಾರ್ದತೆಯ ಅಪರೂಪದ ದೃಶ್ಯವೆಂಬಂತೆ ಉತ್ತರ ಪ್ರದೇಶದ ಪೊಲೀಸ್ ಕಾನ್ಸ್ಟೆಬಲ್ ಮತ್ತು ಇನ್ಸ್ಪೆಕ್ಟರ್ ಇಬ್ಬರೂ ಎರಡು ವಿಭಿನ್ನ ಸಮುದಾಯಕ್ಕೆ ಸೇರಿದ್ರೂ ಸೇರಿ ಒಟ್ಟಿಗೇ ಪ್ರಾರ್ಥನೆ ಮಾಡುತ್ತಿರುವ ದೃಶ್ಯವು ಜಾಲತಾಣದಲ್ಲಿ ವೈರಲ್ ಆಗಿದೆ.
ಹಸನ್ಪುರ ಪ್ರದೇಶದ ಈದ್ಗಾ ಮೈದಾನದಲ್ಲಿ ಕಾನ್ಸ್ಟೆಬಲ್ ಅಸ್ಗರ್ ಖಾನ್ ನಮಾಜ್ ಮಾಡುತ್ತಿರುವಾಗ ಇನ್ಸ್ಪೆಕ್ಟರ್ ಆರ್.ಪಿ. ಶರ್ಮಾ ಅವರು ಹತ್ತಿರ ನಿಂತು ಪ್ರಾರ್ಥನೆ ಸಲ್ಲಿಸುತ್ತಿದ್ದಾರೆ. ಈದ್ ಹಬ್ಬದಂದು ಅಮ್ರೋಹಾದ ಹಸನ್ಪುರ ಪಟ್ಟಣದಲ್ಲಿ ಚಿತ್ರವನ್ನು ಕ್ಲಿಕ್ ಮಾಡಲಾಗಿದೆ.
ಈದ್ ನಮಾಜ್‌ಗೆ ಯಾವುದೇ ಜನರು ಸೇರದಂತೆ ತಡೆಯಲು ಕಾನ್ಸ್ಟೆಬಲ್ ಅಸ್ಗರ್ ಖಾನ್ ಅವರನ್ನು ಈದ್ಗಾದಲ್ಲಿ ಕರ್ತವ್ಯಕ್ಕೆ ನಿಯೋಜಿಸಲಾಗಿತ್ತು. ಎಲ್ಲರೂ ತಮ್ಮ ಮನೆಗಳಲ್ಲಿಯೇ ಪ್ರಾರ್ಥಿಸುವಂತೆ ಮನವಿ ಮಾಡಿದ ಅವರು, ತಾವಿದ್ದ ಕರ್ತವ್ಯದ ಸ್ಥಳದಲ್ಲೇ ನಮಾಜ್ ಮಾಡಿದರು.
ಈ ಮಧ್ಯೆ ಅಲ್ಲಿಗೆ ಆಗಮಿಸಿದ ಹಸನ್ಪುರ ಇನ್ಸ್ಪೆಕ್ಟರ್ ಆರ್.ಪಿ. ಶರ್ಮಾ ಅವರು ಹತ್ತಿರದಲ್ಲೇ ನಿಂತು ಪ್ರಾರ್ಥನೆ ಸಲ್ಲಿಸಿದ್ದಾರೆ. ಈ ದೃಶ್ಯವನ್ನು ದಾರಿಹೋಕರು ಸೆರೆಹಿಡಿದಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ವೈರಲ್ ಆಗಿದೆ.
ಕರ್ತವ್ಯದ ಇದ್ದುದರಿಂದ ಪ್ರಾರ್ಥನೆ ವಿಳಂಬವಾದ ಕಾರಣ ಕಾನ್ಸ್ಟೆಬಲ್ ಅಲ್ಲೇ ನಮಾಜ್ ಮಾಡಲು ನಿರ್ಧರಿಸಿದರು. ಎಲ್ಲಾ ಭಾರತೀಯರ ಒಳಿತಿಗಾಗಿ ಅವರು ಪ್ರಾರ್ಥಿಸುವುದನ್ನು ನೋಡಿ, ನಾನು ಅವರೊಂದಿಗೆ ಸೇರಿ ಪ್ರಾರ್ಥನೆ ಸಲ್ಲಿಸಿದ್ದೇನೆ ಎಂದು ಇನ್ಸ್ಪೆಕ್ಟರ್ ಆರ್.ಪಿ. ಶರ್ಮಾ ಹೇಳಿದ್ದಾರೆ.
ಪೊಲೀಸ್ ಇಲಾಖೆಯ ಈ ಇಬ್ಬರು ಸಿಬ್ಬಂದಿಯ ಮಾದರಿ ನಡೆಗೆ ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆ ವ್ಯಕ್ತವಾಗ್ತಿದೆ.
