ಅಲ್ಕಾ ಲಂಬಾ ವಿರುದ್ದ ದೂರು ದಾಖಲಿಸಿದ ಕುಲದೀಪ್​​ ಸೆಂಗಾರ್​ ಪುತ್ರಿ

ಉನ್ನಾವೋ ಅತ್ಯಾಚಾರ ಪ್ರಕರಣದಲ್ಲಿ ಶಿಕ್ಷೆಗೆ ಒಳಗಾದ ಕುಲದೀಪ್​​ ಸೆಂಗಾರ್ ಬಗ್ಗೆ ಕಾಂಗ್ರೆಸ್​ ಸದಸ್ಯೆ ಅಲ್ಕಾ ಲಂಬಾ ಅವಹೇಳನಕಾರಿಯಾಗಿ ಟ್ವೀಟ್​ ಮಾಡಲಾಗಿದೆ ಎಂದು ಐಶ್ವರ್ಯ ಸೆಂಗಾರ್ ಪೊಲೀಸ್​ಗೆ ದೂರು ನೀಡಿದ್ದಾರೆ.

ಉನ್ನಾವ್ (ಉತ್ತರ ಪ್ರದೇಶ): ಅಪ್ರಾಪ್ತ ಬಾಲಕಿಯ ಮೇಲೆ ಅತ್ಯಾಚಾರ ನಡೆಸಿದ ಆರೋಪದಡಿ ತಿಹಾರ್​ ಜೈಲಿನಲ್ಲಿರುವ ಕುಲದೀಪ್​​ ಸೆಂಗಾರ್​ ಜಾಮೀನಿನ ಬಗ್ಗೆ ಕಾಂಗ್ರೆಸ್​​ ಸದಸ್ಯೆ ಅಲ್ಕಾ ಲಂಬಾ, ಅವಹೇಳನಕಾರಿಯಾಗಿ ಟೀಕಿಸಿದ್ದಾರೆ ಎಂದು ಕುಲದೀಪ್​​ ಸೆಂಗಾರ್​ ಪುತ್ರಿ ಐಶ್ವರ್ಯ ಸೆಂಗಾರ್ ಪೊಲೀಸ್ ವರಿಷ್ಠಾಧಿಕಾರಿಗೆ ದೂರು ಸಲ್ಲಿಸಿದ್ದಾರೆ.

2017 ರಲ್ಲಿ ಅಪ್ರಾಪ್ತ ಬಾಲಕಿಯ ಮೇಲೆ ಅತ್ಯಾಚಾರ ಎಸೆಗಿದ್ದಕ್ಕಾಗಿ ಬಿಜೆಪಿ ಶಾಸಕನಾಗಿದ್ದ ಕುಲದೀಪ್​​ ಸೆಂಗಾರ್​ಗೆ ಜೀವಾವಧಿ ಶಿಕ್ಷೆ ಘೋಷಿಸಲಾಗಿತ್ತು. ಕುಲದೀಪ್​ ಸೆಂಗರ್​ ಜೊತೆಗಿನ ಇತರ ನಾಲ್ವರು ಆರೋಪಿಗಳಿಗೆ ನ್ಯಾಯಾಲಯ ಜಾಮೀನು ನೀಡಿತ್ತು. ಇನ್ನು ಕುಲದೀಪ್​ ಸೆಂಗಾರ್​ ಬಗ್ಗೆ ಮೇ 23ರಂದು ಆಮ್ ಆದ್ಮಿ ಪಕ್ಷದ ಮಾಜಿ ಹಾಗೂ ಹಾಲಿ ಕಾಂಗ್ರೆಸ್​ನ ಸದಸ್ಯೆ ಅಲ್ಕಾ ಲಂಬಾ ಟ್ವೀಟ್​ ಮಾಡಿದ್ದು, ಅಲಹಾಬಾದ್ ಹೈಕೋರ್ಟ್ ಕುಲದೀಪ್ ಸೆಂಗಾರ್ ಅವರಿಗೆ ಪ್ರಧಾನಿ ಮತ್ತು ಗೃಹ ಸಚಿವರ ಆದೇಶದ ಮೇರೆಗೆ ಜಾಮೀನು ನೀಡಿದೆ ಎಂದಿದ್ದರು.

ಸದ್ಯ ಈ ಟ್ವೀಟ್​ ಬಗ್ಗೆ ತೀವ್ರ ವಿವಾದ ಉಂಟಾಗಿದ್ದು, ನನ್ನ ತಂದೆಯ ಬಗ್ಗೆ ಇಲ್ಲ ಸಲ್ಲದ ಆರೋಪವೆಸಗಿದ್ದಾರೆ ಹಾಗೂ ನ್ಯಾಯಾಲಯವನ್ನೂ ಸಹ ಅಲ್ಕಾ ಲಂಬಾ ಟ್ವೀಟ್​ ಮಾಡುವ ಭರದಲ್ಲಿ ನಿಂದಿಸಿದ್ದಾರೆ ಎಂದು ಕುಲದೀಪ್ ಸೆಂಗಾರ್ ಅವರ ಪುತ್ರಿ ಐಶ್ವರ್ಯ ಸೆಂಗಾರ್ ಉನ್ನಾವೋ ಪೊಲೀಸ್​ ವರಿಷ್ಠಾಧಿಕಾರಿಗೆ ದೂರು ಸಲ್ಲಿಸಿದ್ದಾರೆ.

ಈ ಪ್ರಕರಣದಲ್ಲಿ ಉಳಿದ ಆರೋಪಿಗಳಿಗೆ ನ್ಯಾಯಾಲಯ ಜಾಮೀನು ನೀಡಿದೆ. ಆದರೆ, ನಾವು ಯಾವುದೇ ಜಾಮೀನು ಅರ್ಜಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿಲ್ಲ. ಹೀಗಿರುವಾಗ ಅಲ್ಕಾ ಲಂಬಾ ಈ ರೀತಿಯಾಗಿ ಟ್ವೀಟ್​ ಮಾಡಿರುವುದು ನನಗೆ ಮತ್ತು ನನ್ನ ತಂಗಿಗೆ ಮಾನಸಿಕ ಯಾತನೆಯನ್ನು ಉಂಟು ಮಾಡಿದಂತಾಗಿದೆ ಎಂದು ಐಶ್ವರ್ಯ ಸೆಂಗಾರ್ ಈಟಿವಿ ಭಾರತ್​ಗೆ ತಿಳಿಸಿದ್ದಾರೆ.

ಅಲ್ಕಾ ಲಾಂಬಾ ಅವರ ಟ್ವಿಟರ್ ಖಾತೆಯ ಮೂಲಕ ಕುಲದೀಪ್​​ ಸೆಂಗಾರ್ ಹಾಗೂ ಕುಟುಂಬದ ವಿರುದ್ಧ ಅಸಭ್ಯವಾಗಿ ಪ್ರತಿಕ್ರಿಯಿಸಿದ್ದಾರೆ ಎಂದು ಆರೋಪಿಸಿ ದೂರು ಸಲ್ಲಿಸಲಾಗಿದೆ. ಈ ಬಗ್ಗೆ ಪ್ರಕರಣ ದಾಖಲಿಸಿದ್ದು, ಮುಂದಿನ ತನಿಖೆ ನಡೆಸಲಿದ್ದೇವೆ ಎಂದು ಉನ್ನಾವೊದ ಎಸ್‌ಪಿ ವಿಕ್ರಾಂತ್‌ವೀರ್ ಹೇಳಿದ್ದಾರೆ.