ಅಮಾನವೀಯ! ಬಾಕಿ ಸಂಬಳ ಕೇಳಿದ್ದಕ್ಕೆ ಮಹಿಳೆ ಮೇಲೆ ಮೂರು ದಿನ ಅತ್ಯಾಚಾರ, ಗಂಡನಿಗೆ ಹಲ್ಲೆ!

ಕೆಲಸ ಮಾಡಿ ಸಂಬಳ ಕೇಳಿದ್ದಕ್ಕಾಗಿ ಕೋಳಿ ಫಾರ್ಮ್​ ಮಾಲೀಕನೋರ್ವ ತನ್ನ ಸ್ನೇಹಿತರೊಂದಿಗೆ ಸೇರಿ ಬುಡಕಟ್ಟು ಜನಾಂಗದ ಮಹಿಳೆ ಮೇಲೆ ಅತ್ಯಾಚಾರ ನಡೆಸಿರುವ ಹೀನ ಕೃತ್ಯ ನಡೆದಿದೆ.

ಹೈದರಾಬಾದ್​: ಕೋಳಿ ಫಾರ್ಮ್​​ನಲ್ಲಿ ಕೆಲಸ ಮಾಡುತ್ತಿದ್ದ ದಂಪತಿಗೆ ಸರಿಯಾಗಿ ಸಂಬಳ ನೀಡದ್ದಕ್ಕಾಗಿ ಮಾಲೀಕನ ಬಳಿ ತಮ್ಮ ದುಡಿಮೆ ಹಣ ನೀಡುವಂತೆ ಕೇಳಿದ್ದಕ್ಕಾಗಿ ಮಹಿಳೆಯ ಮೇಲೆ ಅತ್ಯಾಚಾರವೆಸಗಿರುವ ಅಮಾನವೀಯ ಘಟನೆ ತೆಲಂಗಾಣದ ರಾಚಕೊಡದಲ್ಲಿ ನಡೆದಿದೆ.

ನಾಗರಕರ್ನೂಲ್​ ಮೂಲದ ಬುಡಕಟ್ಟು ದಂಪತಿ ಪ್ರಸಾದ್​ ರೆಡ್ಡಿ ಕೋಳಿ ಫಾರ್ಮ್​​ನಲ್ಲಿ ತಿಂಗಳ ಸಂಬಳ 15 ಸಾವಿರದಂತೆ ಕೆಲಸ ಮಾಡುತ್ತಿದ್ದರು. ಆದರೆ ಕಳೆದ ಎರಡು ತಿಂಗಳಿಂದ ಮಾಲೀಕ ಇವರಿಗೆ ಸಂಬಳ ನೀಡಿರಲಿಲ್ಲ. ಬಾಕಿ ಸಂಬಳ ಕೇಳಿದ್ದಕ್ಕಾಗಿ ಇಬ್ಬರನ್ನೂ ಕಾರಿನಲ್ಲಿ ತನ್ನ ಮೂವರು ಸ್ನೇಹಿತರೊಂದಿಗೆ ಸೇರಿ ಬೇರೊಂದು ಸ್ಥಳಕ್ಕೆ ಕರೆದುಕೊಂಡು ಹೋಗಿದ್ದಾನೆ. ಈ ವೇಳೆ ನಿರ್ಜನ ಪ್ರದೇಶದಲ್ಲಿ ವ್ಯಕ್ತಿಯ ಮೇಲೆ ಹಲ್ಲೆ ಮಾಡಿದ್ದು, ಆಕೆಯ ಪತ್ನಿಯ ಮೇಲೆ ಮೂವರೂ ಅತ್ಯಾಚಾರವೆಸಗಿದ್ದಾರೆ. ಸೆಪ್ಟೆಂಬರ್​ 18ರಿಂದ ಸೆಪ್ಟೆಂಬರ್​ 21ರವರೆಗೆ ನಿರಂತರವಾಗಿ ಈ ಕೃತ್ಯವೆಸಗಿದ್ದು, ಈ ಘಟನೆ ಬಗ್ಗೆ ಬಾಯಿ ಬಿಟ್ಟರೆ ಮಾಹಿತಿ ಜೀವಂತವಾಗಿ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾನೆ.

ಆರೋಪಿಗಳಿಂದ ತಪ್ಪಿಸಿಕೊಂಡ ಇವರು ಸೆಪ್ಟೆಂಬರ್​ 26ರಂದು ರಾಚಕೊಡ ಪೊಲೀಸ್ ಠಾಣೆಗೆ ಬಂದು ಪ್ರಕರಣ ದಾಖಲಿಸಿದ್ದಾರೆ. ಇದೀಗ ಮಹಿಳೆಗೆ ಚಿಕಿತ್ಸೆ ನೀಡಲಾಗುತ್ತಿದ್ದು, ತಲೆ ಮರೆಸಿಕೊಂಡ ಕಾಮುಕರಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ.