ಹೊಸದಿಲ್ಲಿ: ಕೊರೊನಾ ವೈರಸ್ ಬಿಕ್ಕಟ್ಟಿನಿಂದ ಸೂಕ್ಷ್ಮ, ಸಣ್ಣ ಹಾಗೂ ಮಧ್ಯಮ ಕೈಗಾರಿಕೆಗಳನ್ನು (ಎಂಎಸ್ಎಂಇ ವಲಯ ಕೈಗಾರಿಕೆಗಳು) ಕಾಪಾಡುವ ನಿಟ್ಟಿನಲ್ಲಿ ಸೂಕ್ತ ಕ್ರಮಕ್ಕೆ ಆಗ್ರಹಿಸಿ ಕಾಂಗ್ರೆಸ್ ಮುಖ್ಯಸ್ಥೆ ಸೋನಿಯಾ ಗಾಂಧಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದಾರೆ.
"ಭಾರತದ ಜಿಡಿಪಿಯಲ್ಲಿ ಮೂರನೇ ಒಂದರಷ್ಟು ಪಾಲು ಎಂಎಸ್ಎಂಇ ನೀಡುತ್ತಿದ್ದು, ಶೇ.50 ರಷ್ಟು ಒಟ್ಟು ರಫ್ತು ಇದೇ ವಲಯದಿಂದ ಆಗುತ್ತಿದೆ. ಆದರೆ ಕೊರೊನಾ ಲಾಕ್ಡೌನ್ನಿಂದಾಗಿ ದೇಶದ ಸುಮಾರು 6.3 ಕೋಟಿ ಎಂಎಸ್ಎಂಇ ಘಟಕಗಳು ಆರ್ಥಿಕ ಬಿಕ್ಕಟ್ಟಿನಲ್ಲಿವೆ. ಲಾಕ್ಡೌನ್ನ ಪ್ರತಿಯೊಂದು ದಿನ ಎಂಎಸ್ಎಂಇ ವಲಯಕ್ಕೆ 30,000 ಸಾವಿರ ಕೋಟಿ ರೂಪಾಯಿಗಳಷ್ಟು ನಷ್ಟ ಉಂಟಾಗುತ್ತಿದೆ. ಬಹುತೇಕ ಎಂಎಸ್ಎಂಇ ಗಳಿಗೆ ಹೊಸ ಆರ್ಡರ್ಗಳು ನಿಂತು ಹೋಗಿವೆ." ಎಂದು ಸೋನಿಯಾ ಪತ್ರದಲ್ಲಿ ತಿಳಿಸಿದ್ದಾರೆ.
ಎಂಎಸ್ಎಂಇ ವಲಯದ ಪುನಶ್ಚೇತನಕ್ಕೆ 5 ಅಂಶಗಳ ಸೂತ್ರವೊಂದನ್ನು ಸೋನಿಯಾ ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.
ಎಂಎಸ್ಎಂಇ ವಲಯಕ್ಕೆ 1 ಲಕ್ಷ ಕೋಟಿ ರೂ. ವೇತನ ಭದ್ರತಾ ಪ್ಯಾಕೇಜ್ ಘೋಷಿಸಬೇಕು. ಜೊತೆಗೆ 1 ಲಕ್ಷ ಕೋಟಿ ರೂ.ಗಳ ಸಾಲ ಖಾತರಿ ಫಂಡ್ ಮೀಸಲಿಡಬೇಕು. ಆರ್ಬಿಐ ಆದೇಶಗಳನ್ನು ವಾಣಿಜ್ಯ ಬ್ಯಾಂಕುಗಳು ಕಟ್ಟುನಿಟ್ಟಾಗಿ ಪಾಲಿಸಿ, ಎಂಎಸ್ಎಂಇ ಘಟಕಗಳಿಗೆ ಶೀಘ್ರವಾಗಿ ಹಾಗೂ ಸರಳವಾಗಿ ಸಾಲ ದೊರಕುವಂತೆ ಮಾಡಬೇಕು. ಎಂಎಸ್ಎಂಇಗಳ ಸಾಲ ಕಂತು ಮರುಪಾವತಿಯನ್ನು ಮೂರು ತಿಂಗಳಿಗೂ ಹೆಚ್ಚು ಮುಂದೂಡಬೇಕು. ಸಾಲ ನೀಡುವಾಗ ಬ್ಯಾಂಕುಗಳು ಕೇಳುವ ಹೆಚ್ಚಿನ ಭದ್ರತಾ ಖಾತರಿಯ ಕಾರಣದಿಂದ ಸಾಲ ಸಿಗುವುದೇ ಕಷ್ಟವಾಗಿದ್ದು, ಈ ಸಮಸ್ಯೆಯನ್ನು ಪರಿಹರಿಸಬೇಕೆಂಬ 5 ಅಂಶಗಳ ಬೇಡಿಕೆಯನ್ನು ಸೋನಿಯಾ ಪ್ರಧಾನಿ ನರೇಂದ್ರ ಮೋದಿಯವರ ಮುಂದಿಟ್ಟಿದ್ದಾರೆ.
