ನವದೆಹಲಿ: ಇಶಾ ಫೌಂಡೇಶನ್ ಮುಖ್ಯಸ್ಥ, ಆಧ್ಯಾತ್ಮಿಕ ಗುರು ಜಗ್ಗಿ ವಾಸುದೇವ್ ಅವರು ಕರೆ ನೀಡಿರುವ ಕಾವೇರಿ ಕೂಗಿಗೆ ನೀಡಿದ್ದ ಬೆಂಬಲವನ್ನು ವಾಪಸ್ ಪಡೆಯುವಂತೆ ಹಾಲಿವುಡ್ ನಟ ಲಿಯೋನಾರ್ಡೊ ಡಿಕ್ಯಾಪ್ರಿಯೋಗೆ ಸಂಘ ಸಂಸ್ಥೆಯೊಂದು ಪತ್ರ ಬರೆದಿದೆ.
ಇಶಾ ಫೌಂಡೇಶನ್ಗೆ ಭಾರತದಲ್ಲಿ ಒಳ್ಳೆಯ ಹೆಸರಿಲ್ಲ. ಅದು ತನ್ನ ಮುಖ್ಯ ಕಚೇರಿಯನ್ನು ಕಟ್ಟಲು ಆದಿವಾಸಿಗಳಿಗೆ ಮೀಸಲಿದ್ದ ಜಾಗ ಹಾಗೂ ಆನೆ ಕಾರಿಡಾರ್ ಜಾಗವನ್ನು ಒತ್ತುವರಿ ಮಾಡಿದೆ. ಬಹುಶಃ ನಿಮಗೆ ಯಾರೋ ತಪ್ಪು ಸಲಹೆ ನೀಡಿರಬಹುದು ಎಂದು ಲಿಯೋನಾರ್ಡೊ ಅವರಿಗೆ ಬರೆದಿರುವ ಪತ್ರದಲ್ಲಿ ತಿಳಿಸಲಾಗಿದೆ.
ನದಿ ತೀರ ಪ್ರದೇಶಗಳಲ್ಲಿ ಮರ ಬೆಳೆಸುವ ಉದ್ದೇಶ ಒಳ್ಳೆಯದೇ, ಇದಕ್ಕಾಗಿ ಸಾರ್ವಜನಿಕರಿಂದ ಹಣ ಸಂಗ್ರಹಿಸುವುದು ಸರಿಯಾದ ಮಾರ್ಗವಲ್ಲ. ಈ ರೀತಿ ಹಣ ಸಂಗ್ರಹಿಸುವ ಪದ್ಧತಿಯನ್ನು ಭಾರತೀಯರು ಬಹು ಕಾಲದಿಂದಲೂ ವಿರೋಧಿಸುತ್ತಾ ಬಂದಿದ್ದಾರೆ. ಇಶಾ ಫೌಂಡೇಶನ್ಗೆ ದೇಶ ವಿದೇಶಗಳಿಂದ ಕೋಟ್ಯಂತರ ರೂಪಾಯಿ ಹಣ ಹರಿದುಬರುತ್ತಿದೆ. ಅದೇ ಹಣದಲ್ಲಿ ಬೇಕಿದ್ದರೆ ಸಂಸ್ಥೆಯು ಈ ಕಾರ್ಯ ಪೂರೈಸಬಹುದು ಎಂದು ಎನ್ವಿರಾನ್ಮೆಂಟ್ ಸಪೋರ್ಟ್ ಗ್ರೂಪ್ (ಇಎಸ್ಜಿ) ಸಂಸ್ಥೆಯ ಸಂಚಾಲಕ ಲಿಯೋ ಎಫ್ ಸಲ್ಡಾನಾ ಅವರು ಬರೆದಿರುವ ಪತ್ರದಲ್ಲಿ ತಿಳಿಸಿದ್ದಾರೆ.
