ಅಹಮದಾಬಾದ್ (ಗುಜರಾತ್): ಸಮುದ್ರ ವಿಮಾನ (ಸೀ ಪ್ಲೇನ್) ಇಂದು ಅಹಮದಾಬಾದ್ ಬಳಿಯ ಸಬರಮತಿ ಏರೋಡ್ರಮ್ಗೆ ಆಗಮಿಸಿದ್ದು, ಅಕ್ಟೋಬರ್ 31ರಂದು ಪ್ರಧಾನಿ ಮೋದಿ ಈ ಸಮುದ್ರ ವಿಮಾನ ಸೇವೆಗೆ ಚಾಲನೆ ನೀಡಲಿದ್ದಾರೆ.
ಮಾಲ್ಡೀವ್ಸ್ನ ಮಾಲೆಯಿಂದ ಹೊರಟಿದ್ದ ಈ ಸಮುದ್ರ ವಿಮಾನ ತಾಂತ್ರಿಕ ವಿಚಾರಕ್ಕೆ ಕೇರಳದ ಕೊಚ್ಚಿಯ ವೆಂಡುರ್ತಿ ಕಾಲುವೆಯಲ್ಲಿ ಭಾನುವಾರ ಲ್ಯಾಂಡ್ ಆಗಿತ್ತು. ಈಗ ಕೊಚ್ಚಿಯಿಂದ ಅಹಮದಾಬಾದ್ನ ಸಬರಮತಿಗೆ ಬಂದು ತಲುಪಿದೆ.
19 ಆಸಗಳನ್ನು ಹೊಂದಿದ ಈ ಸಮುದ್ರ ವಿಮಾನದಲ್ಲಿ 12 ಪ್ರಯಾಣಿಕರು ಪ್ರಯಾಣಿಸಬಹುದು ಎಂದು ದಕ್ಷಿಣ ನೌಕಾ ವಲಯ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ. ಈಗ ಸದ್ಯಕ್ಕೆ ಈ ವಿಮಾನ ಸಬರಮತಿ ನದಿಯಿಂದ ಕೆವಾಡಿಯಾದ ಬಳಿಯಿರುವ ಏಕತಾ ಪ್ರತಿಮೆಯ ಬಳಿಗೆ ಪ್ರವಾಸಿಗರನ್ನು ಕರೆದೊಯ್ಯುವ ಆಂತರಿಕ ಸಂಚಾರಿ ವಿಮಾನವಾಗಿ ಬಳಕೆಯಾಗಲಿದೆ.
ಇದಕ್ಕಾಗಿ ಸಮುದ್ರ ವಿಮಾನ ಸೇವೆಗಾಗಿ ಸಬರಮತಿ ಮತ್ತು ಕೆವಾಡಿಯಾ ಬಳಿ ಏರೋಡ್ರಮ್ಗಳ ನಿರ್ಮಾಣ ಮಾಡಲಾಗಿತ್ತು. ಈ ಯೋಜನೆಯನ್ನು ಒಳನಾಡು ಜಲ ಸಾರಿಗೆ ಪ್ರಾಧಿಕಾರ ಮತ್ತು ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯ ಜಂಟಿಯಾಗಿ ನಿರ್ವಹಿಸುತ್ತಿದ್ದು, ಈ ಏರೋಡ್ರಮ್ಗಳ ಮೂಲಕವೇ ಸಮುದ್ರ ವಿಮಾನ ಸಂಚಾರ ಆರಂಭಿಸಲಿದೆ.
