ರೈಲು ಸಂಚಾರ ಹೇಗೆ? ಪ್ರಯಾಣಿಕರಿಗೆ ಗೊತ್ತಿರಬೇಕಾದ ಸೂಚನೆಗಳೇನು?: ಇಲ್ಲಿದೆ ಪೂರ್ಣ ಮಾಹಿತಿ

ದೇಶಾದ್ಯಂತ ಇಂದಿನಿಂದ ರೈಲುಗಳ ಸಂಚಾರ ಆರಂಭಗೊಳ್ಳಲಿದ್ದು, ಮಹತ್ವದ ಬದಲಾವಣೆಗಳೊಂದಿಗೆ ಚುಕುಬುಕು ರೈಲು ತನ್ನ ಸೇವೆ ಆರಂಭಿಸುತ್ತಿದೆ.

ನವದೆಹಲಿ: ಮಹಾಮಾರಿ ಕೊರೊನಾ ವೈರಸ್​ ಭೀತಿ ನಡುವೆ ಇಂದಿನಿಂದ ವಿಶೇಷ ರೈಲುಗಳು ದೇಶದಲ್ಲಿ ಪ್ರಯಾಣ ಆರಂಭಿಸಿವೆ. ದೇಶದ ಕೆಲವು ಆಯ್ದ ನಗರಗಳಿಗೆ ಸಂಜೆ 5 ಗಂಟೆಯಿಂದ ಜರ್ನಿ ಶುರುವಾಗಲಿದೆ. ಬರೋಬ್ಬರಿ ಒಂದೂವರೆ ತಿಂಗಳ ನಂತರ ಕೆಲವು ಬದಲಾವಣೆಗಳು, ಮಾರ್ಗಸೂಚಿಗಳು ಮೂಲಕ ರೈಲುಗಳ ಓಡಾಟ ನಡೆಯುತ್ತಿದೆ. ಇಲ್ಲಿ ಪ್ರಯಾಣಿಕರಿಗೆ ಗೊತ್ತಿರಲೇಬೇಕಾದ ಅಗತ್ಯ ಮಾಹಿತಿಗಳಿವೆ.

ಸಂಚಾರ ಮಾಡಲಿರುವ ಎಲ್ಲ 15 ರೈಲುಗಳು ಸಂಪೂರ್ಣವಾಗಿ ಹವಾ ನಿಯಂತ್ರಣದಿಂದ ಕೂಡಿದ್ದು, ಸೂಪರ್​ ಫಾಸ್ಟ್​ ರೈಲು ಸೇವೆ ಲಭ್ಯವಿದೆ. ನಿನ್ನೆ ಸಂಜೆ 06 ಗಂಟೆಯಿಂದ ಟಿಕೆಟ್ ಬುಕ್ಕಿಂಗ್​ ಆರಂಭಗೊಂಡಿದೆ. ರೈಲ್ವೆ ಇಲಾಖೆ ಮಾಹಿತಿ ನೀಡಿರುವ ಪ್ರಕಾರ, ಈಗಾಗಲೇ 80 ಸಾವಿರ ಜನರು ಟಿಕೆಟ್​​ ಬುಕ್​ ಮಾಡಿದ್ದು, ಇದರಿಂದ 16 ಕೋಟಿ ರೂ ಹಣ ಬಂದಿದೆ ಎಂದು ತಿಳಿಸಿದೆ.

ರೈಲ್ವೆ ಪ್ರಯಾಣಿಕರಿಗೆ ಸೂಚನೆಗಳು:

• ಇ-ಟಿಕೆಟ್‌ ಇದ್ದರೆ ಮಾತ್ರ ರೈಲು ನಿಲ್ದಾಣಕ್ಕೆ ಎಂಟ್ರಿ.
• ಪ್ರಯಾಣದ ವೇಳೆ ಸ್ಕ್ರೀನಿಂಗ್​ ಕಡ್ಡಾಯ.
• ಪ್ರಯಾಣಿಕರು ಕಡ್ಡಾಯವಾಗಿ ಮಾಸ್ಕ್ ಧರಿಸಿ ಸಾಮಾಜಿಕ ಅಂತರ ಕಾಯ್ದುಕೊಳ್ಳಬೇಕು.
• ಸ್ಯಾನಿಟೈಸರ್ ಮನೆಯಿಂದಲೇ ತರಬೇಕು
• ಹೊದಿಕೆಯನ್ನೂ ಪ್ರಯಾಣಿಕರೇ ತರಬೇಕು.
• ರೈಲಿನಲ್ಲಿ ಪ್ಯಾಕೇಜ್ಡ್‌ ಆಹಾರ ಮಾತ್ರ ನೀಡಲಾಗುವುದು.
• ರೈಲು ನಿಲ್ದಾಣಗಳಿಗೆ 90 ನಿಮಿಷಗಳಿಗೂ ಮೊದಲೇ ತಲುಪಲು ಸೂಚನೆ.
• ಪ್ರತಿಯೊಬ್ಬ ಪ್ರಯಾಣಿಕನಿಗೂ ವೈದ್ಯಕೀಯ ತಪಾಸಣೆ.
• ಕೋವಿಡ್​ ಲಕ್ಷಣ ಕಂಡು ಬಂದರೆ ಪ್ರಯಾಣಕ್ಕೆ ಅವಕಾಶವಿಲ್ಲ.
• ಆಹಾರ, ಅಗತ್ಯ ವಸ್ತುಗಳನ್ನು ಪ್ರಯಾಣಿಕರು ತೆಗೆದುಕೊಂಡು ಬರಬೇಕು.
• ಪ್ರಯಾಣ ರದ್ದು ಮಾಡಿಕೊಳ್ಳಲು 24 ಗಂಟೆಗೂ ಮೊದಲೇ ಅವಕಾಶ.
• ರೈಲು ನಿಲ್ದಾಣದಲ್ಲಿ ಬುಕ್ಕಿಂಗ್​​ ಕೌಂಟರ್​​ ಬಂದ್​ ಆಗಿರುವ ಕಾರಣ ಫ್ಲಾಟ್​ಫಾರ್ಮ್​ ಟಿಕೆಟ್​ ಪಡೆದುಕೊಳ್ಳುವ ಅವಶ್ಯಕತೆ ಇಲ್ಲ. ಈ ರೈಲುಗಳಲ್ಲಿ ಯಾವುದೇ ಸಾಮಾನ್ಯ ಬೋಗಿ ಇರುವುದಿಲ್ಲ.
• ನಿನ್ನೆ 6 ಗಂಟೆಯಿಂದ ಬುಕ್ಕಿಂಗ್​ ಆರಂಭವಾಗಿದ್ದು, ಕೇವಲ ಅರ್ಧಗಂಟೆಯಲ್ಲಿ ಬರೋಬ್ಬರಿ 18 ಸಾವಿರ ಟಿಕೆಟ್​ ಬುಕ್ಕಿಂಗ್​

ರೈಲು ಸಂಚಾರ ಹೇಗೆ?:

ದೇಶದಲ್ಲಿ ಒಟ್ಟು 15 ರೈಲುಗಳು ಇಂದಿನಿಂದ ಓಡಾಟ ನಡೆಸಲಿದ್ದು ಪ್ರಮುಖವಾಗಿ ಮುಂಬೈ, ಬೆಂಗಳೂರು, ಚೆನ್ನೈ ಸೇರಿದಂತೆ 15 ನಗರಗಳಿಗೆ ಸಂಚರಿಸಲಿದೆ.

ಎಲ್ಲಿಂದ ಎಲ್ಲಿಗೆ ರೈಲು ಸಂಚಾರ?

• ನವದೆಹಲಿಯಿಂದ ದೀಬ್ರೂಗಢ್​
• ನವದೆಹಲಿಯಿಂದ ಅಗರ್ತಲಾ
  

  ಎಲ್ಲಿಂದ ಎಲ್ಲಿಗೆ ರೈಲು ಸಂಚಾರ?

ಹೀಗೆ ಎಲ್ಲ ರೈಲುಗಳು ನವದೆಹಲಿಯಿಂದ ಹೌರಾ, ಪಾಟ್ನಾ, ವಿಲಾಸ್​ಪುರ, ರಾಂಚಿ, ಭುವನೇಶ್ವರ​, ಸಿಕಂದರಾಬಾದ್​, ಬೆಂಗಳೂರು, ಚೆನ್ನೈ, ತಿರುವನಂತಪುರಂ, ಮಡಗಾಂವ್, ಮುಂಬೈ ಸೆಂಟ್ರಲ್​, ಅಹಮದಾಬಾದ್​ ಹಾಗೂ ಜಮ್ಮುವಿನ ತಾವಿ ನಿಲ್ದಾಣಗಳಿಗೆ ತಲುಪಲಿವೆ. ನವದೆಹಲಿಯಿಂದ ಬೆಂಗಳೂರು, ಪಟನಾ, ಮುಂಬೈ, ಜಮ್ಮು, ಅಹಮದಾಬಾದ್​, ಭುವನೇಶ್ವರ್​ಗೆ ಪ್ರತಿದಿನ ರೈಲು ಸಂಚಾರ ನಡೆಸಲಿವೆ. ಕೆಲ ಆಯ್ದ ನಿಲ್ದಾಣಗಳಲ್ಲಿ ಮಾತ್ರ ಇವು ನಿಲ್ಲಲಿವೆ.

ಇಂದಿನಿಂದ ಬೆಂಗಳೂರು-ದೆಹಲಿ ನಿತ್ಯ ರೈಲು:

ಬೆಂಗಳೂರು ರೈಲು ನಿಲ್ದಾಣದಿಂದ ದೆಹಲಿಗೆ ಎಕ್ಸ್‌ಪ್ರೆಸ್ ಮಾದರಿಯ ರೈಲು ಸಂಚಾರ ಆರಂಭವಾಗಲಿದ್ದು, ರಾತ್ರಿ 8.30 ಕ್ಕೆ ದೆಹಲಿಯತ್ತ ಪ್ರಯಾಣ ಬೆಳಸಲಿದೆ. ಈ ರೈಲು ಗುರುವಾರ ಬೆಳಗ್ಗೆ 5.55 ಕ್ಕೆ ದೆಹಲಿ ತಲುಪಲಿದೆ.

ಟಿಕೆಟ್​​ ದರ ಇಂತಿದೆ:

ದೆಹಲಿಯ ನಿಜಾಮುದ್ದೀನ್​ ನಿಲ್ದಾಣದಿಂದ ಬೆಂಗಳೂರಿಗೆ ಪ್ರಯಾಣ ಬೆಳೆಸುವ ರಾಜಧಾನಿ ಎಕ್ಸ್​ಪ್ರೆಸ್​​ನಲ್ಲಿ ಎಸಿ 3 ಟೈರ್​​​ 3,830ರೂ, ಎಸಿ ಟೈರ್​ 2ನಲ್ಲಿ 5,425 ರೂ, ಎಸಿ ಟೈರ್​​​1ರಲ್ಲಿ ಪ್ರಯಾಣಿಸಲು 6,735 ಹಣ ನಿಗದಿಪಡಿಸಲಾಗಿದೆ.