ನಾಲ್ಕು ವಾಹನಗಳಿಗೆ ಬೆಂಕಿ: ಗಡ್​ಚಿರೋಲಿಯಲ್ಲಿ ನಕ್ಸಲರ ಅಟ್ಟಹಾಸ

ಛತ್ತೀಸ್​ಗಡ್​-ಮಹಾರಾಷ್ಟ್ರ ಗಡಿಯಲ್ಲಿರುವ ಗಡ್​ಚಿರೋಲಿ ಜಿಲ್ಲೆಯಲ್ಲಿ ನಕ್ಸಲರು ನಾಲ್ಕು ವಾಹನಗಳಿಗೆ ಬೆಂಕಿ ಹಚ್ಚಿ ದುಷ್ಕೃತ್ಯ ಎಸಗಿದ್ದಾರೆ.

ಗಡ್​ಚಿರೋಲಿ(ಮಹಾರಾಷ್ಟ್ರ): ಛತ್ತೀಸ್​ಗಡ್​-ಮಹಾರಾಷ್ಟ್ರ ಗಡಿಯಲ್ಲಿರುವ ಗಡ್​ಚಿರೋಲಿ ಜಿಲ್ಲೆಯಲ್ಲಿ ನಕ್ಸಲರು ನಾಲ್ಕು ವಾಹನಗಳಿಗೆ ಬೆಂಕಿ ಹಚ್ಚಿ ಅಟ್ಟಹಾಸ ಮೆರೆದಿದ್ದಾರೆ.

ತಮ್ಮ ಸಹಚರ ಮಹಿಳೆಯೊಬ್ಬಳನ್ನು ಪೊಲೀಸರು ಬೇಟೆಯಾಡಿರುವ ಬೆನ್ನಲ್ಲೇ ನಕ್ಸಲರು ಈ ದುಷ್ಕೃತ್ಯ ಎಸಗಿದ್ದಾರೆ. ಸಾವರ್​ಗಾಂವ್​ - ಮುರುಮ್​ಗಾಂವ್​ ರಸ್ತೆಯಲ್ಲಿ ಈ ದಾಳಿ ನಡೆಸಿದ್ದಾರೆ ಎಂದು ಗಡ್​ಚಿರೋಲಿ ಎಸ್​ಪಿ ಮಾಹಿತಿ ನೀಡಿದ್ದಾರೆ. ಈ ಬಂಡುಕೋರರು ಧನೋರಾ ತಾಲೂಕಿನ ರಸ್ತೆ ಬಂದ್​ ಮಾಡಿದ್ದರು. ಈ ವೇಳೆ ನಾಲ್ಕು ವಾಹನಗಳಿಗೆ ಬೆಂಕಿಯಿಟ್ಟಿದ್ದಾರೆ.

ನಕ್ಸಲ್​ ಗುಂಪಿನಲ್ಲಿದ್ದ ಕುಖ್ಯಾತ ಮಹಿಳೆ ಸ್ರುಜನಕ್ಕ ಎಂಬುವಳನ್ನು ಮೇ 1 ರಂದು ಪೊಲೀಸರು ಕಾರ್ಯಾಚರಣೆ ವೇಳೆ ಹೊಡೆದುರುಳಿಸಿದ್ದರು. ಈಕೆಯ ವಿರುದ್ಧ 34 ಆದಿವಾಸಿಗಳನ್ನು ಕೊಂದಿರುವ ಪ್ರಕರಣ ಸೇರಿದಂತೆ ಒಟ್ಟು 155 ಕೇಸ್​ಗಳು ದಾಖಲಾಗಿದ್ದವು.

ಭಾನುವಾರ ನಡೆದಿದ್ದ ಎನ್​ಕೌಂಟರ್​ನಲ್ಲಿ ಇಬ್ಬರು ಪೊಲೀಸರು ಹುತಾತ್ಮರಾಗಿದ್ದರು. ಅಲ್ಲದೆ, ಹಲವರು ಗಾಯಗೊಂಡಿದ್ದರು.