ಬೆಂಗಳೂರು: ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ ಭರ್ಜರಿ ಎರಡು ಶತಕ ಸಿಡಿಸಿ ಮಿಂಚಿರುವ ಮಯಾಂಕ್ ಅಗರವಾಲ್ ಹರಿಣಗಳ ವಿರುದ್ಧದ ಟೆಸ್ಟ್ ಸರಣಿ ಜಯಸುವಲ್ಲಿ ಮಹತ್ವದ ಪಾತ್ರ ನಿರ್ವಹಿಸಿದ್ದಾರೆ.
ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರು ಟೆಸ್ಟ್ ಪಂದ್ಯಗಳಲ್ಲಿ ಟೀಂ ಇಂಡಿಯಾ ಗೆಲುವು ದಾಖಲು ಮಾಡಿದ್ದು, ಇದೀಗ ಮುಂದಿನ ಬಾಂಗ್ಲಾ ವಿರುದ್ಧದ ಕ್ರಿಕೆಟ್ ಸರಣಿಗೆ ಸಜ್ಜುಗೊಳ್ಳಬೇಕಾಗಿದೆ. ಆದರೆ, ಬಾಂಗ್ಲಾ ವಿರುದ್ಧದ ಕ್ರಿಕೆಟ್ ಸರಣಿಗಾಗಿ ಇದೇ ತಿಂಗಳ 24ರಂದು ಟೀಂ ಇಂಡಿಯಾ ಪ್ರಕಟವಾಗಲಿದ್ದು, ತದನಂತರ ಸರಣಿಯಲ್ಲಿ ಭಾಗಿಯಾಗುವುದಕ್ಕೂ ಕಾಲಾವಕಾಶವಿದೆ.
ಹೀಗಾಗಿ ಆರಂಭಿಕ ಆಟಗಾರ ಮಯಾಂಕ್ ಅಗರವಾಲ್ ಇದೀಗ ಕರ್ನಾಟಕ ತಂಡದ ಪರ ವಿಜಯ್ ಹಜಾರೆ ಟೂರ್ನಿಯಲ್ಲಿ ಭಾಗಿಯಾಗಲು ಸಿದ್ಧರಾಗಿದ್ದಾರೆ. ಈಗಾಗಲೇ ಸೆಮಿಫೈನಲ್ಗೆ ಲಗ್ಗೆ ಹಾಕಿರುವ ಕರ್ನಾಟಕ ತಂಡ ಅಕ್ಟೋಬರ್ 23ರಂದು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಚತ್ತೀಸಗಢ ವಿರುದ್ಧ ಸೆಣಸಾಟ ನಡೆಸಲಿದೆ. ಈ ಪಂದ್ಯದಲ್ಲಿ ಮನೀಷ್ ಪಾಂಡೆ ನೇತೃತ್ವದ ತಂಡದಲ್ಲಿ ಮಯಾಂಕ್ ಅಬ್ಬರಿಸಲು ಸಜ್ಜಾಗಿರುವ ಕಾರಣ ತಂಡ ಈಗಾಗಲೇ ಅಭಿಷೇಕ್ ಕೈಬಿಟ್ಟಿದೆ.
ಇನ್ನೊಂದೆಡೆ ತಮಿಳುನಾಡು ತಂಡದ ಪರ ಆಲ್ರೌಂಡರ್ ಆರ್ ಅಶ್ವಿನ್ ಸಹ ಸೆಮಿಫೈನಲ್ನಲ್ಲಿ ಭಾಗಿಯಾಗಲಿದ್ದು, ಗುಜರಾತ್ ತಂಡದ ವಿರುದ್ಧ ತಮ್ಮ ಬೌಲಿಂಗ್ ಕೈಚೆಳಕ ತೋರಿಸಲಿದ್ದಾರೆ. ಒಂದು ವೇಳೆ ಸೆಮೀಸ್ನಲ್ಲಿ ಕರ್ನಾಟಕ- ತಮಿಳುನಾಡು ಗೆಲುವು ದಾಖಲು ಮಾಡಿದರೆ ಅಕ್ಟೋಬರ್ 25ರಂದು ಫೈನಲ್ನಲ್ಲಿ ಮುಖಾಮುಖಿಯಾಗಲಿವೆ.
