ಅಹಮದಾಬಾದ್: ನೂತನ ಮೋಟಾರು ವಾಹನ (ತಿದ್ದುಪಡಿ) ಕಾಯ್ದೆಯು ವಾಹನ ಸವಾರರನ್ನು ಹೈರಾಣ ಮಾಡಿರುವ ಬೆನ್ನಲ್ಲೇ, ಅಹಮದಾಬಾದ್ ಯುವಕನೋರ್ವನ ತಲೆ ಗಾತ್ರಕ್ಕೆ ಹೊಂದಿಕೊಳ್ಳದ ಹೆಲ್ಮೆಟ್ನಿಂದ ಪೊಲೀಸರು ಇಕ್ಕಟ್ಟಿಗೆ ಸಿಲುಕಿದ ಪ್ರಸಂಗ ನಡೆದಿದೆ.
ಹೆಲ್ಮೆಟ್ ಇಲ್ಲದೆ ದ್ವಿಚಕ್ರ ವಾಹನ ಚಾಲನೆ ಮಾಡುತ್ತಿದ್ದ ಝಾಕಿ ಎಂಬವರನ್ನು ಸಂಚಾರಿ ಪೊಲೀಸರು ರಸ್ತೆಯಲ್ಲಿ ಅಡ್ಡ ಗಟ್ಟಿದ್ದಾರೆ. ಈ ವೇಳೆ ಶಿರಸ್ತ್ರಾಣ ಧರಿಸದೇ ಇರುವುದಕ್ಕೆ ಆತ ತನ್ನ ಅಸಹಾಯಕತೆ ತೋಡಿಕೋಂಡಿದ್ದಾನೆ. ನನ್ನ ತಲೆ ದೊಡ್ಡದು. ಅದ್ರ ಗಾತ್ರಕ್ಕೆ ಹೊಂದಾಣಿಕೆಯಾಗುವ ಹೆಲ್ಮೆಟ್ ಸಿಗುತ್ತಿಲ್ಲ. ಹೀಗಾಗಿ, ಹೆಲ್ಮೆಟ್ ಇಲ್ಲದೆ ಸಂಚರಿಸುತ್ತಿದ್ದೇನೆ ಎಂದು ಹೇಳಿದ್ದಾನೆ.
ಪೊಲೀಸರು ಅಷ್ಟಕ್ಕೆ ಸುಮ್ಮನಾಗಲಿಲ್ಲ. ಸ್ಥಳದಲ್ಲಿಯೇ ಕೆಲವು ಹೆಲ್ಮೆಟ್ಗಳನ್ನು ಆತನ ತಲೆಗೆ ಧರಿಸಿ ಪರೀಕ್ಷಿಸಿದ್ದಾರೆ. ಆಗಲೂ ಯಾವುದೇ ಹೆಲ್ಮೆಟ್ಗಳು ಆತನಿಗೆ ಹೊಂದಾಣಿಕೆ ಆಗಲಿಲ್ಲ. ಬಳಿಕ ಯಾವುದೇ ದಂಡ ಶುಲ್ಕ ವಿಧಿಸದೆ ಸವಾರನನ್ನು ಬಿಟ್ಟು ಕಳುಹಿಸಿದ್ದಾರೆ.
ಈ ಬಗ್ಗೆ ಮಾತನಾಡಿದ ಝಾಕಿರ್, ನನಗೆ ಕಾನೂನಿನ ಬಗ್ಗೆ ಅಪಾರ ಗೌರವವಿದೆ. ಅದನ್ನು ಪಾಲಿಸಬೇಕೆಂದು ಬಹುತೇಕ ಕಡೆ ಹೋಗಿದ್ದೇನೆ. ಆದ್ರೆ, ಏನ್ಮಾಡ್ಲಿ? ನನ್ನ ತಲೆ ಗಾತ್ರಕ್ಕೆ ಹೊಂದಿಕೊಳ್ಳುವಂತಹ ಯಾವುದೇ ಹೆಲ್ಮೆಟ್ ಸಿಗ್ತಿಲ್ಲ. ಆದ್ರೆ, ಚಾಲನೆಗೆ ಸಂಬಂಧಿಸಿದ ಎಲ್ಲ ದಾಖಲೆಗಳನ್ನು ಇರಿಸಿಕೊಂಡಿದ್ದೇನೆ ಎಂದು ಹೇಳಿದ್ದಾರೆ.
