ಚೆನ್ನೈ: ಆದಾಯ ತೆರಿಗೆ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಂಗೀತ ಮಾಂತ್ರಿಕ ಎಂದೇ ಹೆಸರಾದ ಖ್ಯಾತ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ಗೆ ಚೆನ್ನೈ ಹೈಕೋರ್ಟ್ ನೋಟೀಸ್ ಜಾರಿ ಮಾಡಿದೆ. ಆದಾಯ ತೆರಿಗೆ ಆಯುಕ್ತರು ಸಲ್ಲಿಸಿದ್ದ ಮೇಲ್ಮನವಿ ಮೇರೆಗೆ ಎ.ಆರ್. ರೆಹಮಾನ್ಗೆ ಈ ನೋಟೀಸ್ ಜಾರಿ ಮಾಡಲಾಗಿದೆ.
2011-12 ರಲ್ಲಿ ಎ.ಆರ್. ರೆಹಮಾನ್ 15.98 ಕೋಟಿ ರೂಪಾಯಿ ಆದಾಯವನ್ನು ಘೋಷಿಸಿದ್ದರು. 2014 ರಲ್ಲಿ ತೆರಿಗೆ ಇಲಾಖೆ ಇದನ್ನು ಅಂಗೀಕರಿಸಿತ್ತು. ಆದರೆ ಇದರಲ್ಲಿ ಫೋಟಾನ್ ಕಥಾಸ್ ಪ್ರೊಡಕ್ಷನ್ನಿಂದ ಪಡೆದ 54 ಲಕ್ಷ ರೂಪಾಯಿ ಹಾಗೂ ಯುಕೆ ಮೂಲಕ ಲೆಬರಾ ಮೊಬೈಲ್ ಸಂಸ್ಥೆಯಿಂದ ಪಡೆದ 3.47 ಕೋಟಿ ರೂಪಾಯಿ ಬಗ್ಗೆ ವಿವರಗಳನ್ನು ಸಲ್ಲಿಸಲಾಗಿಲ್ಲ ಎಂದು ಆದಾಯ ತೆರಿಗೆ ಇಲಾಖೆ ರೆಹಮಾನ್ ಗಮನಕ್ಕೆ ತಂದಿತ್ತು. ನಂತರ ಎ.ಆರ್. ರೆಹಮಾನ್ ಮತ್ತೆ ಪರಿಷ್ಕೃತ ವಿವರಗಳನ್ನು ಆದಾಯ ತೆರಿಗೆ ಇಲಾಖೆಗೆ ನೀಡಿದ್ದರಿಂದ 2016 ರಲ್ಲಿ ಮತ್ತೆ ಇದನ್ನು ಅಂಗೀಕರಿಸಲಾಯ್ತು.
ತಮ್ಮ ಮೊಬೈಲ್ ಕಂಪನಿಗೆ ಕಾಲರ್ ಟ್ಯೂನ್ ಕಂಪೋಸ್ ಮಾಡಲು ಅಮೆರಿಕ ಮೂಲಕ ಲೆಬರಾ ಮೊಬೈಲ್ಸ್ ರೆಹಮಾನ್ಗೆ ಮೂರು ವರ್ಷಗಳ ಅವಧಿಗೆ ಅಗ್ರಿಮೆಂಟ್ ಮಾಡಿಕೊಂಡು 3.47 ಕೋಟಿ ರೂಪಾಯಿ ಸಂಭಾವನೆ ನೀಡಿತ್ತು.
ಆದರೆ ಎ.ಆರ್. ರೆಹಮಾನ್ ಪರ ನಿಂತ ಆದಾಯ ತೆರಿಗೆ ಮೇಲ್ಮನವಿ ನ್ಯಾಯಾಧಿಕರಣದ (ಐಟಿಎಟಿ) ನಿರ್ಧಾರದ ವಿರುದ್ಧ ಆದಾಯ ತೆರಿಗೆ ಪ್ರಧಾನ ಆಯುಕ್ತರು ಚೆನ್ನೈ ಹೈಕೋರ್ಟಿನಲ್ಲಿ ಮೇಲ್ಮನವಿ ಸಲ್ಲಿಸಿದ್ದಾರೆ. ಎ.ಆರ್. ರೆಹಮಾನ್ ತೆರಿಗೆ ವಂಚನೆ ಮಾಡಿದ್ದಾರೆ ಎಂದು ಆರೋಪಿಸಿರುವ ಕಾರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಂಗೀತ ಮಾಂತ್ರಿಕನಿಗೆ ನೋಟೀಸ್ ನೀಡಲಾಗಿದೆ. ಇದೀಗ ಮತ್ತೆ ತೆರಿಗೆ ಮೌಲ್ಯಮಾಪನಕ್ಕೆ ಸಂಬಂಧಿಸಿದಂತೆ ಎ.ಆರ್. ರೆಹಮಾನ್ ವಿವರಣೆ ನೀಡಬೇಕಿದೆ.
