ಶಾಜಾಪುರ (ಮಧ್ಯಪ್ರದೇಶ): ಚಲಿಸುತ್ತಿರುವ ಟ್ರಕ್‌ನ ಹಿಂಬದಿ ಬಾಗಿಲ ಬೀಗ ಒಡೆದು ಯುವಕರು ಕಳ್ಳತನ ಮಾಡಿರುವ ಘಟನೆ ಮಧ್ಯಪ್ರದೇಶದ ಶಾಜಾಪುರ ಹೆದ್ದಾರಿಯಲ್ಲಿ ನಡೆದಿದೆ.
ಚಲಿಸುತ್ತಿರುವ ಟ್ರಕ್‌ನಿಂದ ಕಳ್ಳತನ
ಶಾಜಾಪುರ ಹೆದ್ದಾರಿಯಲ್ಲಿ ಹೋಗುತ್ತಿದ್ದ ಟ್ರಕ್ ಅನ್ನು ಬೈಕ್ನಲ್ಲಿ ಬಂದ ಮೂವರು ಯುವಕರು ಹಿಂಬಾಲಿಸಿದ್ದಾರೆ. ಇವರಲ್ಲಿ ಓರ್ವ ಟ್ರಕ್ ಅನ್ನು ಹತ್ತಿ, ಅದರ ಹಿಂಬದಿ ಬಾಗಿಲ ಬೀಗ ಒಡೆದು ಟ್ರಕ್ನಲ್ಲಿದ್ದ ಕೆಲ ವಸ್ತುಗಳನ್ನು ಕದ್ದು ಬೈಕ್ನಲ್ಲಿದ್ದವರಿಗೆ ಕೊಟ್ಟಿದ್ದಾನೆ.
ಬೈಕ್ ಹಿಂದೆ ಬರುತ್ತಿದ್ದ ಕಾರಿನಲ್ಲಿದ್ದವರು ಈ ದೃಶ್ಯವನ್ನು ಮೊಬೈಲ್ನಲ್ಲಿ ಸೆರೆ ಹಿಡಿದಿದ್ದಾರೆ. ಇವರನ್ನು ಕಂಡ ಯುವಕರು ಕಾರಿನ ಚಾಲಕನಿಗೆ ಮುಂದೆ ಹೋಗುವಂತೆ ಸನ್ನೆ ಮಾಡಿ ತೋರಿಸಿದ್ದಾರೆ. ಮುಂದೆ ಹೋದ ಕಾರು ಚಾಲಕ, ಟ್ರಕ್ ಚಾಲಕನಿಗೆ ಖದೀಮರ ಕೃತ್ಯದ ಕುರಿತು ಮಾಹಿತಿ ನೀಡಿದ್ದಾರೆ. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
