ನವದೆಹಲಿ : ನಗರದ ದಕ್ಷಿಣ ಭಾಗದಲ್ಲಿರುವ ರಾಧಾ ಸ್ವಾಮೀ ಸತ್ಸಂಗ್ ಬಿಯಾಸ್ ಕೇಂದ್ರವನ್ನು ಈಗ ಬೃಹತ್ ಕೋವಿಡ್ ಕೇರ್ ಸೆಂಟರ್ ಆಗಿ ಪರಿವರ್ತಿಸಲಾಗಿದೆ. 1,700 x 700 ಚದರ ಅಡಿಯ ಈ ಕೇಂದ್ರವು ವಿಶ್ವದ ಅತೀ ದೊಡ್ಡ ಕೋವಿಡ್ ಕೇರ್ ಸೆಂಟರ್ ಆಗಿ ಪರಿವರ್ತಿನೆಯಾಗಿದೆ. ಸರ್ದಾರ್ ಪಟೇಲ್ ಕೋವಿಡ್ ಕೇರ್ ಸೆಂಟರ್ ಆಗಿ ಬದಲಾಗಿರುವ ಈ ಬೃಹತ್ ಪ್ರಾಂಗಣದಲ್ಲಿ ಈಗಾಗಲೇ 10 ಸಾವಿರ ಹಾಸಿಗೆಗಳ ವ್ಯವಸ್ಥೆ ಮಾಡಲಾಗಿದೆ. ಗಂಭೀರ ಗುಣ ಲಕ್ಷಣಗಳಿಲ್ಲದ ಕೋವಿಡ್ ರೋಗಿಗಳಿಗೆ ಇಲ್ಲಿ ಚಿಕಿತ್ಸೆ ನೀಡಲಾಗುತ್ತದೆ.
ಜುಲೈ 5 ರಿಂದ ಕಾರ್ಯಾರಂಭ :
ಎರಡು ಸಾವಿರ ಹಾಸಿಗೆಗಳೊಂದಿಗೆ ಜುಲೈ 5 ರಂದು ಈ ಬೃಹತ್ ಕೋವಿಡ್ ಕೇರ್ ಸೆಂಟರ್ ಕಾರ್ಯಾರಂಭ ಮಾಡಿದ್ದು, ದೆಹಲಿ ಲೆಫ್ಟಿನೆಂಟ್ ಗವರ್ನರ್ ಅನಿಲ್ ಬೈಜಾಲ್ ಈ ಕೇಂದ್ರದ ಉದ್ಘಾಟನೆ ಮಾಡಿದ್ದಾರೆ. ಸದ್ಯ ಇಲ್ಲಿ 200 ಕೊರೊನಾ ಸೋಂಕಿತರು ಚಿಕಿತ್ಸೆ ಪಡೆಯುತ್ತಿದ್ದಾರೆ. ಜೂನ್ ಎರಡನೇ ವಾರದಲ್ಲಿ ನಗರದಲ್ಲಿ ದಿನಕ್ಕೆ ಎರಡು ಸಾವಿರಕ್ಕೂ ಅಧಿಕ ಕೊರೊನಾ ಪ್ರಕರಣಗಳು ವರದಿಯಾದಾಗಿ, ಒಟ್ಟು ಸೋಂಕಿತರ ಸಂಖ್ಯೆ 40 ಸಾವಿರ ದಾಟಿತ್ತು. ದಿನೇ ದಿನೆ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಸರ್ಕಾರ ತಾತ್ಕಾಲಿಕ ಕೋವಿಡ್ ಕೇಂದ್ರದ ಸ್ಥಾಪನೆಗೆ ಯೋಜನೆ ರೂಪಿಸಿತ್ತು.
ಜೂನ್ 15 ರಂದು ಅಧಿಕೃತ ಭೇಟಿ:
ತಾತ್ಕಾಲಿಕ ಕೋವಿಡ್ ಕೇಂದ್ರ ಸ್ಥಾಪನೆಗೆ ದಕ್ಷಿಣ ದೆಹಲಿಯಲ್ಲಿರುವ ರಾಧಾ ಸ್ವಾಮೀ ಸತ್ಸಂಗ್ ಬಿಯಾಸ್ ಕೇಂದ್ರ ಸೂಕ್ತ ಸ್ಥಳವೆಂದು ನಿರ್ಧರಿಸಿದ ಸ್ಥಳೀಯ ಅಧಿಕಾರಿ ಬಿಎಂ ಮಿಶ್ರಾ, ಯೋಜನೆ ರೂಪಿಸಿ ಸರ್ಕಾರಕ್ಕೆ ವರದಿ ಸಲ್ಲಿಸಿದ್ದರು. ಯೋಜನೆ ಪ್ರಕಾರ ಜೂನ್ 14 ರಂದು ರಾಧಾ ಸ್ವಾಮೀ ಸತ್ಸಂಗ್ ಬಿಯಾಸ್ ಕೇಂದ್ರದಲ್ಲಿ ಕೋವಿಡ್ ಆರೈಕೆ ಕೇಂದ್ರದ ನಿರ್ಮಾಣಕ್ಕೆ ಸಿದ್ದತೆಗಳು ಪ್ರಾರಂಭಗೊಂಡವು. ಈ ವೇಳೆ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ಲೆಫ್ಟಿನೆಂಟ್ ಗವರ್ನರ್ ಅನಿಲ್ ಬೈಜಾಲ್ , ಕೋವಿಡ್ ಕೇಂದ್ರ ಸ್ಥಾಪನೆಗೆ ಹಸಿರು ನಿಶಾನೆ ತೋರಿದ್ದರು.
ಗೃಹ ಸಚಿವರಿಗೆ ಮುಖ್ಯಮಂತ್ರಿಗಳ ಪತ್ರ:
ಒತ್ತಡದ ಮಧ್ಯೆಯೂ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಮತ್ತು ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಜೂನ್ 18 ರಂದು ಕೋವಿಡ್ ಆರೈಕೆ ಕೇಂದ್ರಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದರು. ಬಳಿಕ ಜೂನ್ 23 ರಂದು ಕೇಂದ್ರ ಗೃಹ ಸಚಿವರಿಗೆ ಪತ್ರ ಬರೆದ ಸಿಎಂ ಕೇಜ್ರಿವಾಲ್, ಕೋವಿಡ್ ಕೇಂದ್ರವನ್ನು ಪರಿಶೀಲಿಸಲು ಆಹ್ವಾನಿಸಿದ್ದರು ಮತ್ತು ಕೇಂದ್ರದ ನಿರ್ವಹಣೆಯನ್ನು ಇಂಡೋ - ಟಿಬೆಟಿಯನ್ ಗಡಿ ಭದ್ರತಾ ಪಡೆ (ಐಟಿಬಿಪಿ) ಗೆ ನೀಡುವಂತೆ ಮನವಿ ಮಾಡಿದ್ದರು.
ಜೂನ್ 27 ರಂದು ಏಕಕಾಲಕ್ಕೆ ತಪಾಸಣೆ :
ಅರವಿಂದ್ ಕೇಜ್ರಿವಾಲ್ ಅವರ ಈ ಪತ್ರಕ್ಕೆ ಟ್ವೀಟ್ ಮೂಲಕ ಉತ್ತರಿಸಿದ ಗೃಹ ಸಚಿವ ಅಮಿತ್ ಶಾ, 10 ಸಾವಿರ ಹಾಸಿಗೆಗಳ ಕೋವಿಡ್ ಕೇರ್ ಸೆಂಟರ್ನ್ನು ನಿರ್ವಹಿಸುವ ಜವಾಬ್ದಾರಿಯನ್ನು ಗೃಹ ಸಚಿವಾಲಯ ಈಗಾಗಲೇ ಐಟಿಬಿಪಿಗೆ ವಹಿಸಿದೆ. ಇಲ್ಲಿ ಹೆಚ್ಚಿನ ಸೌಲಭ್ಯಗಳು ಜೂನ್ 26 ರಿಂದ ಪ್ರಾರಂಭವಾಗಲಿವೆ. ಮೂರು ದಿನಗಳ ಹಿಂದೆಯೇ ನಮ್ಮ ಸಭೆಯಲ್ಲಿ ಇದನ್ನು ನಿರ್ಧರಿಸಲಾಗಿದೆ ಎಂದು ತಿಳಿಸಿದ್ದರು. ಜೂನ್ 27 ರಂದು ಈ ಇಬ್ಬರು ನಾಯಕರು ಜೊತೆಗೂಡಿ ಏಕಕಾಲಕ್ಕೆ ಕೋವಿಡ್ ಕೇರ್ ಸೆಂಟರ್ ಪರಿಶೀಲಿಸಿದ್ದರು.
50 - 50 ಹಾಸಿಗೆಗಳ 200 ಬ್ಲಾಕ್ :
ಕೇಂದ್ರ ಗೃಹ ಸಚಿವ ಮತ್ತು ಸಿಎಂ ಕೇಜ್ರಿವಾಲ್ ಭೇಟಿಯ ವೇಳೆಗೆ ಕೋವಿಡ್ ಕೇಂದ್ರದ ಸಿದ್ದತೆಗಳು ಬಹುತೇಕ ಪೂರ್ಣಗೊಂಡಿದ್ದವು ಮತ್ತು 2 ಸಾವಿರ ಹಾಸಿಗೆಗಳ ಸಿದ್ದತೆಯನ್ನು ಅಂತಿಮಗೊಳಿಸಲಾಗಿತ್ತು. 50-50 ಹಾಸಿಗೆಗಳ 200 ಬ್ಲಾಕ್ಗಳನ್ನು ಸಿದ್ದಪಡಿಸಲಾಗಿತ್ತು. ಈ ಬಗ್ಗೆ ಐಟಿಬಿಪಿಯ ಡಿಜಿ ಗೃಹ ಸಚಿವರು ಮತ್ತು ಸಿಎಂಗೆ ಮಾಹಿತಿ ನೀಡಿದ್ದರು. ಜುಲೈ 5 ರಂದು ಲೆಫ್ಟಿನೆಂಟ್ ಗವರ್ನರ್ ಅನಿಲ್ ಬೈಜಾಲ್ ಕೇಂದ್ರ ಉದ್ಘಾಟನೆ ಮಾಡಿದರು.
ಡಿಡಿಯು ಆಸ್ಪತ್ರೆಯೊಂದಿಗೆ ಜೋಡಣೆ :
ಸದ್ಯ ಈ ಬೃಹತ್ ಕೋವಿಡ್ ಸೆಂಟರ್ ರೋಗ ಲಕ್ಷಣಗಳಿಲ್ಲದ ಮತ್ತು ಸಣ್ಣ ಪುಟ್ಟ ಲಕ್ಷಣಗಳಿರುವ ಕೊರೊನಾ ಸೋಂಕಿತರ ಆರೈಕೆ ಮಾಡಲು ಸಿದ್ದವಾಗಿದ್ದು, ಆಮ್ಲಜನಕ ಮತ್ತು ಆ್ಯಂಬುಲೆನ್ಸ್ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಇಲ್ಲಿ ದಾಖಲಾದ ಯಾರಿಗಾದರೂ ಆರೋಗ್ಯ ಹದೆಗೆಟ್ಟರೆ ಅವರನ್ನು ದೀನ್ ದಯಾಳ್ ಉಪಾಧ್ಯಾಯ ಆಸ್ಪತ್ರೆಗೆ ಕಳುಹಿಸಲಾಗುತ್ತದೆ. ಈ ಸರ್ದಾರ್ ಪಟೇಲ್ ಕೋವಿಡ್ ಕೇಂದ್ರವನ್ನು ಡಿಡಿಯು ಆಸ್ಪತ್ರೆಯೊಂದಿಗೆ ಜೋಡಿಸಲಾಗಿದೆ.
ಬೆಂಗಳೂರಿನಲ್ಲೂ ನಿರ್ಮಾಣವಾಗ್ತಿದೆ ಅತಿ ದೊಡ್ಡ ಕೇಂದ್ರ: ಬೆಂಗಳೂರಿನಲ್ಲೂ ಇಂತಹುದೇ ಕೋವಿಡ್ ಕೇರ್ ಸೆಂಟರ್ ನಿರ್ಮಾಣಗೊಳ್ಳುತ್ತಿದೆ. ಮುಂದಿನ ವಾರ ಇದು ಕಾರ್ಯಾರಂಭ ಮಾಡುವ ಸಾಧ್ಯತೆ ಇದೆ. 10,100 ಕ್ಕೂ ಹೆಚ್ಚಿನ ಬೆಡ್ಗಳನ್ನ ಇಲ್ಲಿ ವ್ಯವಸ್ಥೆ ಮಾಡಲಾಗಿದೆ.
