ನವದೆಹಲಿ: ಬಾಹ್ಯಾಕಾಶ ಕ್ಷೇತ್ರದಲ್ಲಿ ಮತ್ತೊಂದು ಮಹತ್ತರ ಮೈಲಿಗಲ್ಲು ಸ್ಥಾಪಿಸಲು ಭಾರತ ಸಜ್ಜಾಗಿದೆ. ಚಂದ್ರಯಾನ-2ರ ಮೂಲಕ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ(ಇಸ್ರೋ) ದೇಶದ ಕೀರ್ತಿ ಪತಾಕೆಯನ್ನು ಹಾರಿಸಲು ಕ್ಷಣಗಣನೆ ಆರಂಭವಾಗಿದೆ.
ಜುಲೈ 22ರ ಮಧ್ಯಾಹ್ನ 2.43ಕ್ಕೆ ಸರಿಯಾಗಿ ಆಂಧ್ರ ಪ್ರದೇಶದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಚಂದ್ರಯಾನ-2 ರಾಕೆಟ್ ಉಡಾವಣೆಯಾಗಲಿದೆ. ಇಡೀ ವಿಶ್ವವೇ ಕಾತರದಿಂದ ಕಾದಿರುವ ಈ ಮಹತ್ವದ ಯೋಜನೆಯ ಹಿಂದೆ ಕೆಲಸ ಮಾಡಿದ ಹಲವಾರು ಮಂದಿಯಲ್ಲಿ ಮುಂಚೂಣಿಯಲ್ಲಿರುವ ಹೆಸರು ಡಾ.ಜಿತೇಂದ್ರನಾಥ್ ಗೋಸ್ವಾಮಿ.
ಯಾರು ಈ ಜಿತೇಂದ್ರನಾಥ್ ಗೋಸ್ವಾಮಿ ಎಂದು ಹುಡುಕುತ್ತಾ ಹೋದರೆ ಅಸ್ಸೋಂಗೆ ನಾವು ತಲುಪುತ್ತೇವೆ. ಹೌದು, ಅಸ್ಸೋಂನ ಜೋರ್ಹತ್ ಜಿಲ್ಲೆಯ ಬೋರ್ಬೆಟಾದ ನಿವಾಸಿ ಡಾ.ಜಿತೇಂದ್ರನಾಥ್ ಗೋಸ್ವಾಮಿ ಸದ್ಯ ಉಡಾವಣೆಗೆ ಸಜ್ಜಾಗಿರುವ ಚಂದ್ರಯಾನ-2ರ ಹಿಂದಿರುವ ಬಹುದೊಡ್ಡ ಕೈ.
ಅಸ್ಸೋಂ ವಿಧಾನಸಭಾ ಸ್ಪೀಕರ್ ಹಿತೇಂದ್ರನಾಥ್ ಗೋಸ್ವಾಮಿಯ ಹಿರಿಯಣ್ಣ ಈ ಜಿತೇಂದ್ರಾನಥ್ ಗೋಸ್ವಾಮಿ, ಇವರು ಪ್ರಾಥಮಿಕ ಶಿಕ್ಷಣವನ್ನು ಬೊರ್ಬೆಟಾ ಪಬ್ಲಿಕ್ ಸ್ಕೂಲ್ನಲ್ಲಿ ಪೂರೈಸಿದ ಬಳಿಕ ಜೋರ್ಹತ್ನ ಸರ್ಕಾರಿ ಪ್ರೌಢಶಾಲೆಯಲ್ಲಿ ಮುಂದಿನ ಶಿಕ್ಷಣ ಪಡೆಯುತ್ತಾರೆ.
ಸಂಬಂಧಿಕರ ಮನೆಯಿಂದ ಶಾಲೆಗೆ ತೆರಳುತ್ತಿದ್ದ ಜಿತೇಂದ್ರನಾಥ್ ಗೋಸ್ವಾಮಿ, ಪಾಠದ ಜೊತೆಗೆ ಪಠ್ಯೇತರ ಚಟುವಟಿಕೆಯಲ್ಲೂ ಸದಾ ಮುಂದು. ಸದ್ಯ ಜಿತೇಂದ್ರನಾಥ್ ಕಾರ್ಯಕ್ಕೆ ಮನೆಯವರು ಹಾಗೂ ಸಂಬಂಧಿಕರು ಅತ್ಯಂತ ಖುಷಿಯಾಗಿದ್ದಾರೆ. ಜಿತೇಂದ್ರನಾಥ್ ಓದಿರುವ ಶಾಲೆಯ ಶಿಕ್ಷಕರು, ಆತ ಅಸ್ಸೋಂನ ಪುತ್ರ ಎಂದು ಹೆಮ್ಮೆಯಿಂದ ಹೇಳಿದ್ದಾರೆ.
