ಶಿಬಿರಕ್ಕೆ ಕರೆದೊಯ್ಯುವ ವೇಳೆ ಗಾಯಗೊಂಡಿದ್ದ ಕಾಡಾನೆ ಸಾವು.. ಕಂಬನಿ ಮಿಡಿದ ಗ್ರಾಮಸ್ಥರು

ತಮಿಳುನಾಡಿನ ಮದುಮಲೈ ಆನೆ ಶಿಬಿರಕ್ಕೆ ಕರೆದೊಯ್ಯುವ ಮಾರ್ಗಮಧ್ಯೆ ಗಾಯಗೊಂಡಿದ್ದ ಕಾಡಾನೆ ಮೃತಪಟ್ಟಿದೆ. ಅನೇಕ ವರ್ಷಗಳಿಂದ ಗ್ರಾಮಗಳ ಬಳಿ ತಿರುಗುತ್ತಿದ್ದರೂ ಯಾರಿಗೂ ಹಾನಿಮಾಡದ ಗಜರಾಜನ ಸಾವಿಗೆ ಗ್ರಾಮಸ್ಥರು ಕಂಬನಿ ಮಿಡಿದಿದ್ದಾರೆ.

ನೀಲಗಿರಿ (ತಮಿಳುನಾಡು): ಮೂರು ದಿನಗಳ ಹಿಂದೆ ಗಾಯಗೊಂಡಿದ್ದ ಗಜರಾಜನನ್ನು ವೈದ್ಯಕೀಯ ಚಿಕಿತ್ಸೆಗೆ ಎಂದು ತಮಿಳುನಾಡಿನ ಮದುಮಲೈ ಆನೆ ಶಿಬಿರಕ್ಕೆ ಕರೆದೊಯ್ಯುವ ಮಾರ್ಗಮಧ್ಯೆ ಅದು ಸಾವನ್ನಪ್ಪಿದೆ.

ನೀಲಗಿರಿ ಜಿಲ್ಲೆಯ ಮಸಿನಗುಡಿ ಅರಣ್ಯದಲ್ಲಿ 40 ವರ್ಷದ ಈ ಆನೆ ಗಾಯಗೊಂಡಿತ್ತು. ಆನೆಯ ಎಡ ಕಿವಿ ಹರಿದಿದ್ದು, ಸುಟ್ಟ ಗಾಯಗಳಿಂದ ಬಳಲುತ್ತಿತ್ತು. ಮರಣೋತ್ತರ ಪರೀಕ್ಷೆಯಲ್ಲಿ ದುಷ್ಕರ್ಮಿಗಳು ಪೆಟ್ರೋಲ್​ ಬಾಂಬ್​ ಸಿಡಿಸಿ, ಆನೆಯನ್ನು ಕೊಲ್ಲಲು ಯತ್ನಿಸಿದ್ದರೆಂಬುದು ಬಯಲಾಗಿದೆ.

ಇದನ್ನೂ ಓದಿ: ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ಬಾಲಕಿ ಹೃದಯಾಘಾತದಿಂದ ಸಾವು

ಈ ಬಗ್ಗೆ ತನಿಖೆ ನಡೆಸಲು ಸಮಿತಿಯೊಂದನ್ನು ರಚಿಸಲಾಗಿದೆ. ಕೃತ್ಯ ಎಸಗಿದ ಆರೋಪಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಮದುಮಲೈ ಹುಲಿ ಸಂರಕ್ಷಣಾ ವಲಯದ ನಿರ್ದೇಶಕ ಶ್ರೀಕಾಂತ್ ತಿಳಿಸಿದ್ದಾರೆ.

ಈ ಆನೆಯು ಅನೇಕ ವರ್ಷಗಳಿಂದ ಮಸಿನಗುಡಿ ಸುತ್ತಮುತ್ತಲಿನ ಗ್ರಾಮಗಳ ಬಳಿ ತಿರುಗುತ್ತಿದ್ದರೂ ಯಾರಿಗೂ ಹಾನಿಮಾಡಿರಲಿಲ್ಲ. ಹೀಗಾಗಿ ಗಜರಾಜನ ಸಾವಿನ ಸುದ್ದಿ ಕೇಳಿ ದುಃಖಿತರಾದ ಗ್ರಾಮಸ್ಥರು ಒಂದೆಡೆ ಸೇರಿ, ಆನೆಯ ಭಾವಚಿತ್ರಕ್ಕೆ ಪುಷ್ಪಾರ್ಚಣೆ ಮಾಡಿ, ದೀಪ ಬೆಳಗಿ ಮೌನಾಚರಣೆ ಮಾಡಿದ್ದಾರೆ.