ಮೇ ತಿಂಗಳಿನಿಂದ ಪೂರ್ವ ಲಡಾಖ್ ಮತ್ತು ಉತ್ತರ ಸಿಕ್ಕಿಂನಲ್ಲಿ ಗಡಿ ಸಮಸ್ಯೆ ಉಲ್ಬಣಗೊಂಡಿದ್ದು ಭಾರತ-ಚೀನಾದ ಸಂಘರ್ಷ ಕೊನೆಯಾಗುತ್ತದೆ ಎಂಬ ಲೆಕ್ಕಾಚಾರಗಳಿಗೆ ಹಿನ್ನಡೆ ಉಂಟುಮಾಡುವಂತಹ ದಿಢೀರ್ ಬೆಳವಣಿಗೆಯೊಂದು ನಡೆದಿದೆ. 'ಕವ್ಕಾಜ್ 20'(Caucasus - 20)ನಲ್ಲಿ ಭಾಗವಹಿಸದಿರಲು ಭಾರತ ನಿರ್ಧರಿಸಿದೆ. ಚೀನಾ ಮತ್ತು ಪಾಕಿಸ್ತಾನ ಕೂಡ ಭಾಗವಹಿಸುವ ಈ ಸಮರಾಭ್ಯಾಸದ ಆತಿಥ್ಯ ವಹಿಸಿರುವುದು ರಷ್ಯಾ ಸೇನೆ. ಭೂಸೇನೆ, ನೌಕಾದಳ, ವಾಯುಪಡೆ ಹೀಗೆ ಸೇನೆಯ ಮೂರೂ ಬಲಗಳು ಇಲ್ಲಿ ಸಮರಾಭ್ಯಾಸ ನಡೆಸುತ್ತವೆ.
ರಷ್ಯಾದ ಆಸ್ತ್ರಖ್ಯಾನ್ ಪ್ರದೇಶದಲ್ಲಿ ಸೆಪ್ಟೆಂಬರ್ 15 - 27ರವರೆಗೆ ನಡೆಯಲಿರುವ ‘ಕವ್ಕಾಜ್ 20’ ಸಮರಾಭ್ಯಾಸದಲ್ಲಿ ಅಣಕು ಭಯೋತ್ಪಾದನಾ ದಾಳಿ ಮತ್ತಿತರ ಸೇನಾ ಚಟುವಟಿಕೆಗಳಲ್ಲಿ ಚೀನಾ ಮತ್ತು ಪಾಕಿಸ್ತಾನ ಸೈನಿಕರೊಂದಿಗೆ ಭಾರತೀಯ ಯೋಧರು ಕೂಡ ಭಾಗವಹಿಸುವ ನಿರೀಕ್ಷೆ ಇತ್ತು.
ಬೆಳವಣಿಗೆಯನ್ನು ದೃಢಪಡಿಸಿರುವ ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಸೇನೆಯ ಉನ್ನತ ಮೂಲವೊಂದು ರಷ್ಯಾದಲ್ಲಿ ನಡೆಯಲಿರುವ ಸೇನಾ ಸಮರಾಭ್ಯಾಸ ;ಕವ್ಕಾಜ್ 20'ಗೆ ಭಾರತ ತನ್ನ ತಂಡವನ್ನು ಕಳುಹಿಸುತ್ತಿಲ್ಲ. ಈ ನಿರ್ಧಾರದ ಹಿಂದೆ ಚೀನಾ ಘಟನೆ ಮತ್ತು ಕೋವಿಡ್ 19 ಸೋಂಕು ಎರಡೂ ಕಾರಣಗಳಿವೆ ಎಂದು ತಿಳಿಸಿದೆ.
ಭಾರತದ ಈ ನಿರ್ಧಾರದಿಂದಾಗಿ ಏಷ್ಯಾದ ಎರಡು ದೈತ್ಯ ದೇಶಗಳ ನಡುವೆ ಮಧ್ಯಸ್ಥಿಕೆ ವಹಿಸುವ ರಷ್ಯಾದ ಯತ್ನಗಳಿಗೆ ಅಡ್ಡಿ ಉಂಟಾಗಿದೆ. ಚೀನಾ ಮತ್ತು ಭಾರತದ ಜಂಟಿ ಪಾಲ್ಗೊಳ್ಳುವಿಕೆಯಿಂದಾಗಿ ರಷ್ಯಾದ ಭೌಗೋಳಿಕ ರಾಜಕೀಯ ಕಾರ್ಯತಂತ್ರದ ಸಾಮರ್ಥ್ಯಕ್ಕೆ ಮಹತ್ವ ದೊರೆಯುತ್ತಿತ್ತು. ಜೊತೆಗೆ ಮಧ್ಯಸ್ಥಿಕೆ ವಹಿಸಲು ಅಮೆರಿಕ ವಿಫಲವಾದ ಹಿನ್ನೆಲೆಯಲ್ಲಿ ರಷ್ಯಾದ ಗರಿಮೆ ಹೆಚ್ಚುತ್ತಿತ್ತು.
ಅಮೆರಿಕ ಅಧ್ಯಕ್ಷ ಭಾರತ ಮತ್ತು ಚೀನಾ ನಡುವೆ ಮಧ್ಯಸ್ಥಿಕೆ ವಹಿಸುವುದನ್ನು ಎರಡೂ ದೇಶಗಳು ಇತ್ತೀಚೆಗೆ ತಿರಸ್ಕರಿಸಿದ್ದವು. ಭಾರತ 'ಕವ್ಕಾಜ್ 20' ಸಮರಾಭ್ಯಾಸದಲ್ಲಿ ಪಾಲ್ಗೊಂಡರೆ ಭಾರತ, ಅಮೆರಿಕ, ಜಪಾನ್ ಹಾಗೂ ಆಸ್ಟ್ರೇಲಿಯಾ ಸೇರಿ (ಕ್ವಾಡ್) ಚೀನಾ ವಿರೋಧಿ ಗುಂಪನ್ನು ರೂಪಿಸಲು ಅಡ್ಡಿ ಉಂಟಾಗುತ್ತಿತ್ತು.
ಮತ್ತೊಂದೆಡೆ, ಭಾರತದ ಶನಿವಾರದ ನಿರ್ಧಾರದಿಂದಾಗಿ ‘ಕ್ವಾಡ್’ ಮೇಲುಗೈ ಸಾಧಿಸಿದಂತಾಗಿದೆ. ಇನ್ನು ಕೆಲ ತಿಂಗಳುಗಳಲ್ಲಿ ಕ್ವಾಡ್ ದೇಶಗಳು ಪಾಲ್ಗೊಳ್ಳಲಿರುವ ‘ಮಲಬಾರ್ ಸಮರಾಭ್ಯಾಸ’ದ ಆತಿಥ್ಯ ವಹಿಸಲು ಭಾರತ ಮುಂದಾಗಿರುವುದಕ್ಕೆ ಈ ಬೆಳವಣಿಗೆ ಒಂದು ಉದಾಹರಣೆ. ಭಾರತ, ಅಮೆರಿಕ ಹಾಗೂ ಆಸ್ಟ್ರೇಲಿಯಾ ಈಗಾಗಲೇ ‘ಮಲಬಾರ್ ಸಮರಾಭ್ಯಾಸ’ದಲ್ಲಿ ಪಾಲ್ಗೊಳ್ಳುತ್ತಿವೆ. ಜಪಾನ್‌ಗೆ ಆಹ್ವಾನ ನೀಡುವ ಕುರಿತಂತೆ ಮಾತುಕತೆ ನಡೆಯುತ್ತಿದೆ.
ವಾಸ್ತವ ನಿಯಂತ್ರಣ ರೇಖೆ(ಎಲ್‌ಎಸಿ) ಮತ್ತು ಮುಂಚೂಣಿ ಪ್ರದೇಶಗಳಲ್ಲಿ ಉಪಕರಣಗಳು, ವಾಯುಪಡೆಯ ವಿಮಾನಗಳ ಜೊತೆಗೆ ಸುಮಾರು 1,00,000 ಸೈನಿಕರನ್ನು ಭಾರತ ಮತ್ತು ಚೀನಾ ಸೇನಾ ನಿಯೋಜಿಸಿದ ಪರಿಣಾಮ ಸಂಘರ್ಷಮಯ ವಾತಾವರಣ ನಿರ್ಮಾಣವಾಗಿದೆ.
ಕಾರ್ಪ್ಸ್ ಕಮಾಂಡರ್ ಮಟ್ಟದ ಮಾತುಕತೆ ಕೆಲವೇ ದಿನಗಳಲ್ಲಿ ನಡೆಯುವ ನಿರೀಕ್ಷೆ ಇದ್ದು ಒತ್ತಡದ ಕಾರಣಕ್ಕಾಗಿ ಎರಡೂ ದೇಶಗಳ ನಡುವೆ ಈವರೆಗೆ ನಡೆದ ಮಾತುಕತೆ ಯತ್ನಗಳು ಮಹತ್ವದ ಸಾಧನೆ ಮಾಡುವಲ್ಲಿ ವಿಫಲವಾಗಿವೆ. ಭಾರತದಿಂದ, ವೀಕ್ಷಕರು, ಭಾರತೀಯ ವಾಯುಪಡೆ ಮತ್ತು ನೌಕಾಪಡೆ ಮಾತ್ರವಲ್ಲದೆ ಡೋಗ್ರಾ ರೆಜಿಮೆಂಟಿನ ಸುಮಾರು 180 ಯೋಧರು ‘ಕವ್ಕಾಜ್ 20’ ಸಮರಾಭ್ಯಾಸದಲ್ಲಿ ಪಾಲ್ಗೊಳ್ಳಲು ಸಿದ್ಧರಾಗಿದ್ದರು.
ಇಷ್ಟಾದರೂ, ಕೇವಲ 13,000 ಸೈನಿಕರು ಮಾತ್ರ ಭಾಗವಹಿಸುವ ‘ಕವ್ಕಾಜ್ 20’ ಒಂದು ಸಾಧಾರಣ ಸಮರಾಭ್ಯಾಸ ಎಂದು ಹೇಳಲಾಗುತ್ತಿದೆ. ಕಳೆದ ವರ್ಷ, ಸುಮಾರು 1,28,000 ಸೈನಿಕರು, 20,000 ಮಿಲಿಟರಿ ಉಪಕರಣಗಳು, 600 ವಿಮಾನಗಳು ಮತ್ತು 15 ಹಡಗುಗಳು ‘ತ್ಸೆಂಟರ್ - 2019’ ಸಮರಾಭ್ಯಾಸದಲ್ಲಿ ಭಾಗವಹಿಸಿದ್ದವು.
ರಷ್ಯಾ ಪ್ರತಿ ನಾಲ್ಕು ವರ್ಷಗಳಿಗೆ ಒಮ್ಮೆ ನಾಲ್ಕು ಪ್ರಮುಖ ಸಮರಾಭ್ಯಾಸಗಳನ್ನು ಆಯೋಜಿಸುತ್ತದೆ. ತನ್ನ ಸೇನಾ ವಲಯಗಳಾದ ವೋಸ್ಟಾಕ್ (ಪೂರ್ವ), ಜಪಾದ್ (ಪಶ್ಚಿಮ), ತ್ಸೆಂಟರ್ (ಕೇಂದ್ರ) ಮತ್ತು ಕವ್ಕಾಜ್ (ದಕ್ಷಿಣ)ಗಳಲ್ಲಿ ಸರದಿಯಂತೆ ಸಮರಾಭ್ಯಾಸ ನಡೆಯುತ್ತದೆ. ಈ ಹಿಂದೆ 2012 ಮತ್ತು 2016 ರಲ್ಲಿ ಕವ್ಕಾಜ್ ಸೇನಾ ಚಟುವಟಿಕೆಗಳು ನಡೆದಿದ್ದವು.
-ಸಂಜೀವ್ ಕೆ ಬರುವಾ
