ಎಲ್ಲೆಡೆ ಕೊರೊನಾ ವೈರಸ್ ಆತಂಕ ಹರಡಿರುವಾಗ ಎಲ್ಲರೂ ಕೈಗಳನ್ನು ಆಗಾಗ ತೊಳೆಯುವುದರ ಬಗ್ಗೆ ಹೆಚ್ಚು ಗಮನ ಹರಿಸುತ್ತಿದ್ದಾರೆ. ಇದು ಒಳ್ಳೆಯ ಬೆಳವಣಿಗೆಯೂ ಹೌದು. ಆದರೆ, ನಿಮ್ಮ ಸ್ಮಾರ್ಟ್ಫೋನ್ ಕೊಳೆಯಾಗಿದ್ದು, ಕೈಗಳನ್ನು ಮಾತ್ರ ತೊಳೆಯುತ್ತಿದ್ದಲ್ಲಿ ಏನೂ ಪ್ರಯೋಜನವಿಲ್ಲ ಎಂಬುದು ಗೊತ್ತಿರಲಿ.
ಹೌದು... ನಿಮ್ಮ ಸ್ಮಾರ್ಟ್ಫೋನ್ ಸದಾ ಕೈಯಲ್ಲಿರುವುದರಿಂದ ಅದನ್ನು ಸ್ವಚ್ಛಗೊಳಿಸುವುದು ಅನಿವಾರ್ಯ. ಡಾಕ್ಟರ್ ಸ್ಪಿರಿಟ್ ಅಥವಾ ಅಲ್ಕೊಹಾಲ್ ಆಧರಿತ ಸ್ಯಾನಿಟೈಜರ್ನಿಂದ 90 ನಿಮಿಷಗಳಿಗೊಮ್ಮೆ ಸ್ಮಾರ್ಟ್ಫೋನ್ ಸ್ವಚ್ಛಗೊಳಿಸುತ್ತಿರಬೇಕೆಂದು ತಜ್ಞರು ಹೇಳುತ್ತಾರೆ.
ಇನ್ನು ಆಗಾಗ ಸ್ಮಾರ್ಟ್ಫೋನ್ ಮುಟ್ಟದಿರುವಂತೆ ಫೋನ್ ಕವರ್ ಅಥವಾ ಬ್ಲೂಟೂತ್ ಬಳಸುವುದು ಸೂಕ್ತ. ಕನಿಷ್ಠ ದಿನಕ್ಕೆ ಎರಡು ಬಾರಿಯಾದರೂ ಸ್ಮಾರ್ಟ್ಫೋನ್ ಸ್ವಚ್ಛಗೊಳಿಸಬೇಕು ಎನ್ನುತ್ತಾರೆ ಅವರು.
ಸ್ಮಾರ್ಟ್ಫೋನ್ಗಳ ಬಗ್ಗೆ ನಡೆದ ಸಂಶೋಧನೆಯೊಂದರ ಪ್ರಕಾರ, ಸ್ಮಾರ್ಟ್ಫೋನ್ ಸ್ಕ್ರೀನ್ ಒಂದರ ಮೇಲೆ ಶೌಚಾಲಯದಲ್ಲಿರುವುದಕ್ಕಿಂತಲೂ ಹೆಚ್ಚು ಬ್ಯಾಕ್ಟೀರಿಯಾಗಳಿರುತ್ತವೆಯಂತೆ. 20 ಜನ ಸ್ಮಾರ್ಟ್ಫೋನ್ ಬಳಕೆದಾರರಲ್ಲಿ ಒಬ್ಬರು ಆರು ತಿಂಗಳಿಗೊಮ್ಮೆ ಸಹ ತಮ್ಮ ಫೋನ್ ಸ್ವಚ್ಛಗೊಳಿಸುವುದಿಲ್ಲವಂತೆ!
"ಕೊರೊನಾ ವೈರಸ್ನ ಸಂಕಷ್ಟದ ಈ ಸಮಯದಲ್ಲಿ ಸ್ಯಾನಿಟೈಜರ್ನಿಂದ ಫೋನ್ ಸ್ವಚ್ಛಗೊಳಿಸುವುದು ಸೂಕ್ತ. ಸಂಜೆ ಆಫೀಸಿನಿಂದ ಮರಳಿದ ನಂತರ ಹಾಗೂ ಬೆಳಗ್ಗೆ ಆಫೀಸಿಗೆ ಹೋಗುವಾಗ ಒಂದು ಬಾರಿ ಸ್ಮಾರ್ಟ್ಫೋನ್ ಸ್ವಚ್ಛಗೊಳಿಸಬೇಕು." ಎನ್ನುತ್ತಾರೆ ನವದೆಹಲಿಯ ಶ್ರೀ ಬಾಲಾಜಿ ಆಕ್ಷನ್ ಮೆಡಿಕಲ್ ಇನ್ಸ್ಟಿಟ್ಯೂಟ್ ಮೈಕ್ರೊಬಯಾಲಜಿ ವಿಭಾಗದ ಸೀನಿಯರ್ ಕನ್ಸಲ್ಟಂಟ್ ಜ್ಯೋತಿ ಮುತ್ತಾ.
ಯುನೈಟೆಡ್ ಕಿಂಗಡಂ ನ ಸರ್ರೇ ವಿವಿ ನಡೆಸಿದ ಸಂಶೋಧನೆಯ ಪ್ರಕಾರ, ಸ್ಮಾರ್ಟ್ಫೋನ್ನ ಹೋಂ ಬಟನ್ ಮೇಲೆ ಮಿಲಿಯನ್ಗಟ್ಟಲೆ ಬ್ಯಾಕ್ಟೀರಿಯಾ ಇರುತ್ತವಂತೆ. ಇದರಲ್ಲಿ ಕೆಲವು ಅಪಾಯಕಾರಿಯೂ ಆಗಿರುತ್ತವಂತೆ.
ಇಷ್ಟೆಲ್ಲ ಸಂಶೋಧನೆಗಳು ಹೇಳುವಂತೆ ಒಟ್ಟಾರೆಯಾಗಿ ನಿಮ್ಮ ಕೈಗಳನ್ನು ಮಾತ್ರ ತೊಳೆದರೆ ಸಾಲದು, ಸ್ಮಾರ್ಟ್ಫೋನ್ ಅನ್ನು ಸಹ ಸ್ವಚ್ಛಗೊಳಿಸುತ್ತಿರುವುದು ಅತ್ಯಂತ ಅಗತ್ಯ ಎಂಬುದು ಗೊತ್ತಿರಲಿ.
