ಲಾಕ್​ಡೌನ್​ ವೇಳೆ ವರದಾನವಾದ ಅಮ್ಮ, ಅಣ್ಣ, ಅನ್ನಪೂರ್ಣ, ಇಂದಿರಾ, ಕುಡುಂಬಶ್ರೀ..

ಲಾಕ್​ಡೌನ್​ ವೇಳೆಯಲ್ಲಿ ಕೆಲವೊಂದು ಜನತೆ ತೀವ್ರ ಸಂಕಷ್ಟಕ್ಕೆ ಗುರಿಯಾಗಿದ್ದಾರೆ. ಬಡವರು, ನಿರ್ಗತಿಕರು ಹಸಿವಿನಿಂದ ಪರದಾಡುವ ಸ್ಥಿತಿ ಏರ್ಪಟ್ಟಿದೆ. ಸರ್ಕಾರಗಳೂ ಕೂಡಾ ಜನರ ಹಸಿವನ್ನು ನೀಗಿಸಲು ಪ್ರಯತ್ನಿಸುತ್ತಿವೆ. ದಕ್ಷಿಣ ಭಾರತದ ಕೆಲವೊಂದು ಮಹಾನಗರಗಳಲ್ಲಿ ಕ್ಯಾಂಟೀನ್​ಗಳು ಜನರಿಗೆ ವರದಾನವಾಗಿವೆ.

ಹೈದರಾಬಾದ್​​: ಕೊರೊನಾ ಮಹಾಮಾರಿ ವಿರುದ್ಧ ಹೋರಾಡಲು ಲಾಕ್​ಡೌನ್​ ಘೋಷಣೆ ಮಾಡಲಾಗಿದೆ. ಈ ವೇಳೆ ಸಾಕಷ್ಟು ಬಡವರು, ಕಾರ್ಮಿಕರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ದೇಶದ ಬಹುತೇಕ ಮಂದಿ ಸರಿಯಾದ ಸಮಯಕ್ಕೆ ಆಹಾರ ಸಿಗದೇ ಪರದಾಡುತ್ತಿದ್ದಾರೆ. ದಕ್ಷಿಣ ಭಾರತದಲ್ಲೂ ಕೂಡಾ ಇದೇ ಪರಿಸ್ಥಿತಿಯಿದ್ದು ಕೆಲವೊಂದು ನಗರಗಳಲ್ಲಿ ಕ್ಯಾಂಟೀನ್​ಗಳು ಬಡವರ ಹಸಿವು ನೀಗಿಸುತ್ತಿವೆ.

ಬೆಂಗಳೂರಿನಲ್ಲಿ ಹಸಿವು ನೀಗಿಸುತ್ತಿದೆ ಇಂದಿರಾ ಕ್ಯಾಂಟೀನ್​:

ಕರ್ನಾಟಕದ ಇಂದಿರಾ ಕ್ಯಾಂಟೀನ್​

ಲಾಕ್​ ಡೌನ್​ ವೇಳೆ ಕರ್ನಾಟಕದ ಇಂದಿರಾ ಕ್ಯಾಂಟೀನ್​ ಬಹುಪ್ರಮುಖ ಪಾತ್ರ ವಹಿಸುತ್ತಿದೆ. ಬೆಳಗ್ಗೆ 7ರಿಂದ 10 ಗಂಟೆಯವರೆಗೆ, ಮಧ್ಯಾಹ್ನ 12.30ರಿಂದ 3ರವರೆಗೆ, ರಾತ್ರಿ 7.30ರಿಂದ 9ರವರೆಗೆ ಈ ಕ್ಯಾಂಟೀನ್​ ಕಾರ್ಯ ನಿರ್ವಹಿಸುತ್ತಿದೆ. ಮೊದಲಿಗೆ ರಿಯಾಯಿತಿ ದರದಲ್ಲಿ ಊಟ ನೀಡುತ್ತಿದ್ದ ಈ ಕ್ಯಾಂಟೀನ್​ ಈಗ ಬೀದಿ ಬದಿ ವ್ಯಾಪಾರಿಗಳಿಗೆ, ಕಾರ್ಮಿಕರಿಗೆ ಹಾಗೂ ಬಡವರಿಗೆ ಉಚಿತ ಊಟ ನೀಡುತ್ತಿದೆ. ಇಲ್ಲಿ ಕಾರ್ಯನಿರ್ವಹಣೆ ಮಾಡುವ ಸಿಬ್ಬಂದಿ ಕೊರೊನಾ ಹರಡದಂತೆ ಮುಂಜಾಗ್ರತೆ ವಹಿಸುತ್ತಿದ್ದಾರೆ.

ಮುತ್ತಿನ ನಗರಿಯಲ್ಲಿ ''ಅನ್ನಪೂರ್ಣೆ''ಯಾಗಿ ಹಸಿವಿಗೆ ಮುಕ್ತಿ

ತೆಲಂಗಾಣದ ಅನ್ನಪೂರ್ಣ ಕ್ಯಾಂಟೀನ್​

ಹೈದರಾಬಾದ್​ನಲ್ಲಿ ಕೊರೊನಾ ಕಾರಣಕ್ಕೆ ಘೋಷಣೆಯಾದ ಲಾಕ್​ಡೌನ್​ನಿಂದ ಜನ ತತ್ತರಿಸಿದ್ದಾರೆ. ಈ ಹಿಂದೆ ಸರ್ಕಾರವೇ ಸ್ಥಾಪಿಸಿದ್ದ ಅನ್ನಪೂರ್ಣ ಕ್ಯಾಂಟೀನ್​ನಲ್ಲಿ ಮಾರ್ಚ್​ 29ರಿಂದ ಉಚಿತ ಆಹಾರ ನೀಡಲಾಗುತ್ತಿದೆ. ಸಾಮಾನ್ಯ ದಿನಗಳಲ್ಲಿ 5 ರೂಪಾಯಿಗೆ ಊಟ ನೀಡಲಾಗುತ್ತಿತ್ತು. ಹೈದರಾಬಾದ್​ನಾದ್ಯಂತ 150 ಅನ್ನಪೂರ್ಣ ಕ್ಯಾಂಟೀನ್​ಗಳಿದ್ದು ಪ್ರತಿದಿನ 40 ಸಾವಿರಕ್ಕೂ ಹೆಚ್ಚು ಮಂದಿಗೆ ಊಟ ಒದಗಿಸಲಾಗುತ್ತಿದೆ.

ತಮಿಳುನಾಡಿನ ಚೆನ್ನೈನಲ್ಲಿ ''ಅಮ್ಮ''ನ ಕೈತುತ್ತು..!

ತಮಿಳುನಾಡಿನ ಅಮ್ಮ ಕ್ಯಾಂಟೀನ್

ತಮಿಳುನಾಡಿನಲ್ಲಿ ಸ್ವ ಸಹಾಯ ಗುಂಪುಗಳಿಂದ ಅಮ್ಮಕ್ಯಾಂಟೀನ್​ ನಡೆಯುತ್ತಿದ್ದು ಲಾಕ್​ಡೌನ್​ ವೇಳೆ ಪ್ರಮುಖ ಪಾತ್ರ ವಹಿಸುತ್ತಿವೆ. ಇಲ್ಲಿ ಕಡಿಮೆ ಬೆಲೆಗೆ ಅಂದರೆ ಒಂದು ರೂಪಾಯಿಗೆ ಇಡ್ಲಿ ಹಾಗೂ ಮೂರು ರೂಪಾಯಿಗೆ ಮೊಸರನ್ನ, ಐದು ರೂಪಾಯಿಗೆ ಪೊಂಗಲ್​, ಚಿತ್ರಾನ್ನ ನೀಡಲಾಗುತ್ತಿದೆ. ಇದರ ಜೊತೆಗೆ ಕೊರೊನಾ ವೈರಸ್​ ಕುರಿತಾಗಿ ಜಾಗೃತಿಯನ್ನು ಮೂಡಿಸಲಾಗುತ್ತಿದೆ. ಈ ಅಮ್ಮ ಕ್ಯಾಂಟೀನ್​ಗೆ ಸರ್ಕಾರದ ಅನುದಾನವೂ ಸಿಗುತ್ತಿದೆ. ಚೆನ್ನೈ ಪ್ರವಾ, ವರ್ದಾ ಸೈಕ್ಲೋನ್​ ವೇಳೆ ಈ ಕ್ಯಾಂಟೀನ್​ ಮಹತ್ತರವಾದ ಪಾತ್ರ ವಹಿಸಿತ್ತು.

ಆಂಧ್ರದಲ್ಲಿ ಬಡವರ ಹಸಿವು ನೀಗಿಸುವ ''ಅಣ್ಣ''

ತಮಿಳುನಾಡಿನ ಅಮ್ಮ ಕ್ಯಾಂಟೀನ್​ ಥರನಾಗಿ ಆಂಧ್ರ ಪ್ರದೇಶದಲ್ಲಿ ಟಿಡಿಪಿ ಸರ್ಕಾರ ಅಣ್ಣ ಕ್ಯಾಂಟೀನ್​ಗಳನ್ನು ಪ್ರಾರಂಭಿಸಿತ್ತು. ರಾಜ್ಯ ಸರ್ಕಾರ ಅನುದಾನವಿರುವ ಈ ಕ್ಯಾಂಟೀನ್​ಗಳು ದಿನಕ್ಕೆ 2.15 ಲಕ್ಷ ಮಂದಿಗೆ ಊಟ ಒದಗಿಸುತ್ತಿವೆ. ಕೇವಲ 5 ರೂಪಾಯಿಗೆ ಊಟ ನೀಡುತ್ತಿದ್ದು ಲಾಕ್​ ಡೌನ್​ ವೇಳೆಯಲ್ಲಿ ತನ್ನದೇ ಆದ ಛಾಪು ಮೂಡಿಸಿವೆ.

ದೇವರನಾಡಲ್ಲಿ ಹಸಿದವರ ಹೊಟ್ಟೆ ತುಂಬಿಸುತ್ತೆ ಕುಡುಂಬಶ್ರೀ

ಕೇರಳದಲ್ಲಿ ಸುಮಾರು 1074 ಕ್ಯಾಂಟೀನ್​ಗಳಲ್ಲಿ ಕುಡುಂಬಶ್ರಿ ಮಿಷನ್​ ಆರಂಭಿಸಿದೆ. ಇದು ಸ್ವಸಹಾಯ ಗುಂಪುಗಳಿಂದ ನಡೆಯುತ್ತಿದ್ದು, ಇಲ್ಲಿಗೆ ಬರುವ ಬಡವರಿಗೆ ಕಡಿಮೆ ದರದಲ್ಲಿ ಲಘು ಉಪಹಾರ, ಮಧ್ಯಾಹ್ನದ ಊಟ, ಟೀ, ಕಾಫಿ ಹಾಗೂ ಸಾಂಪ್ರದಾಯಿಕ ತಿನಿಸುಗಳನ್ನು ಒದಗಿಸುತ್ತದೆ.