ಗಡಿಯಲ್ಲಿ ಸುರಂಗ ಕೊರೆದು ಜಮ್ಮುಕಾಶ್ಮೀರಕ್ಕೆ ನುಸುಳಲು ಪಾಕ್‌ ಕುತಂತ್ರ!

ಜಮ್ಮುಕಾಶ್ಮೀರದ ಸಾಂಬಾ ಜಿಲ್ಲೆಯಲ್ಲಿರುವ ಗಡಿ ರಕ್ಷಣಾ ರೇಖೆಯ ಬಳಿ ರಹಸ್ಯ ಸುರಂಗ ಮಾರ್ಗ ಪತ್ತೆಯಾಗಿದೆ.

ಶ್ರೀನಗರ: ಭಾರತ-ಪಾಕ್​ ಅಂತಾರಾಷ್ಟ್ರೀಯ ಗಡಿ ಪ್ರದೇಶ ಸಾಂಬಾ ಸೆಕ್ಟರ್​​ನಲ್ಲಿ ಬಿಎಸ್​ಎಫ್​ ಯೋಧರು ಸುರಂಗ ಮಾರ್ಗ ಪತ್ತೆ ಹಚ್ಚಿದ್ದು, ಈ ರೀತಿಯ ಮತ್ತಷ್ಟು ಮಾರ್ಗಗಳಿರುವ ಶಂಕೆ ವ್ಯಕ್ತವಾಗಿದೆ.

ಯೋಧರು ಪಹರೆ ನಡೆಸುತ್ತಿದ್ದ ವೇಳೆ ಭೂಮಿಯಿಂದ 20 ಮೀಟರ್​ ಆಳದಲ್ಲಿ ಕಂಡುಬಂದ ಈ ಸುರಂಗ, ಗಡಿಯಿಂದ 50 ಮೀಟರ್​​ ಒಳಗಿದೆ ಎಂದು ತಿಳಿದು ಬಂದಿದೆ. ಇದರ ಬಳಿ ಕೆಲ ಮರಳಿನ​ ಬ್ಯಾಗುಗಳು​ ಪತ್ತೆಯಾಗಿವೆ. ಈ ಬ್ಯಾಗುಗಳ ಮೇಲೆ ಪಾಕಿಸ್ತಾನದ ಕರಾಚಿ ಹಾಗೂ ಶಕ್ಕೇರ್​ಗಢದ ಹೆಸರುಗಳಿವೆ.

ಕಳೆದ ಕೆಲ ದಿನಗಳ ಹಿಂದೆ ಇದೇ ರೀತಿಯ ಬ್ಯಾಗುಗಳು ಲಭ್ಯವಾಗಿದ್ದವು. ಸುರಂಗ ಪತ್ತೆಯಾಗುತ್ತಿದ್ದಂತೆ ಸೇನೆ ಕಟ್ಟೆಚ್ಚರ ವಹಿಸಿದೆ. ಇವುಗಳನ್ನು ಪತ್ತೆ ಮಾಡಲು ಇದೀಗ ರಾಡಾರ್​ ಬಳಕೆ ಮಾಡಲಾಗುತ್ತಿದೆ. ಈ ಹಿಂದೆ ಕೂಡ ಅನೇಕ ಸಲ ಇಂತಹ ಸುರಂಗಗಳು ಬೆಳಕಿಗೆ ಬಂದಿದ್ದು, ಉಗ್ರರು ಒಳನುಸುಳಲು ಯತ್ನಿಸುತ್ತಿದ್ದಾರೆ ಎಂದು ಸೇನಾಧಿಕಾರಿಗಳು ತಿಳಿಸಿದ್ದಾರೆ.