ಭಾಗಲ್ಪುರ್(ಬಿಹಾರ): ಲಾಕ್ಡೌನ್ ಸಂದರ್ಭದಲ್ಲಿ ಬಿಹಾರದ ಕಾರ್ಮಿಕರು ವಿವಿಧ ರಾಜ್ಯಗಳಿಂದ ತಮ್ಮ ಸ್ವಂತ ಮನೆಗಳಿಗೆ ತೆರಳಲು ಸಾಕಷ್ಟ ಕಷ್ಟಪಟ್ಟಿದ್ದಾರೆ ಎಂದ ರಾಹುಲ್ ಗಾಂಧಿ, ಬಿಹಾರದ ಭಾಗಲ್ಪುರ್ದಲ್ಲಿ ಪ್ರಧಾನಿ ಮೋದಿ ವಿರುದ್ಧ ವಾಗ್ದಾಳಿ ನಡೆಸಿದರು.
ಕಾರ್ಮಿಕರು ಸ್ವಂತ ರಾಜ್ಯಕ್ಕೆ ತೆರಳಲು ಆಹಾರ, ಅನ್ನ ಇಲ್ಲದೇ ಸಾವಿರಾರು ಕಿಲೋ ಮೀಟರ್ ನಡೆದುಕೊಂಡು ಹೋದರು. ಈ ವೇಳೆ, ಪ್ರಧಾನಿ ನಿಮಗೆ ಸಹಾಯ ಮಾಡಿದ್ರಾ? ನಿಮ್ಮ ಬಗ್ಗೆ ಅವರು ಯೋಚನೆ ಕೂಡ ಮಾಡಿಲ್ಲ. ಕಾರ್ಮಿಕರು ಮನೆಗೆ ವಾಪಸ್ ಆಗಲು ಮೋದಿ ಬಸ್, ಟ್ರಕ್ ಹಾಗೂ ರೈಲು ನೀಡಿದ್ರಾ? ಎಂದು ಪ್ರಶ್ನೆ ಮಾಡಿದರು.
ಕೊರೊನಾ ವೇಳೆ, ನಾನು ಕಾರ್ಮಿಕರ ಭೇಟಿಯಾಗಿ ಮಾತುಕತೆ ನಡೆಸಿದೆ. ಈ ವೇಳೆ, ಪ್ರಧಾನಿ ಮೋದಿ ನಮಗೆ ಎರಡು ದಿನ ಅವಕಾಶ ನೀಡಿದ್ದರೆ, ಸುಲಭವಾಗಿ ಮನೆಗೆ ಮರಳುತ್ತಿದ್ದೆವು ಎಂದರು. ಆದರೆ, ಮೋದಿ ಅವರಿಗೆ ಒಂದು ದಿನವೂ ನೀಡಲಿಲ್ಲ ಯಾಕೆ ಎಂಬುದು ಅರ್ಥವಾಗಲಿಲ್ಲ ಎಂದರು.
ಪ್ರಧಾನಿ ಮೋದಿ ಏಕಾಏಕಿ ಲಾಕ್ಡೌನ್ ಘೋಷಣೆ ಮಾಡಿದರು. ಈ ವೇಳೆ, ದೇಶದ ಕಾರ್ಮಿಕರಿಗೆ ಹಣ, ಆಹಾರ, ಕುಡಿಯುವ ನೀರು ಹೇಗೆ ಸಿಗುತ್ತದೆ ಎಂದು ನಮೋ ಯೋಚನೆ ಸಹ ಮಾಡಲಿಲ್ಲ. ದೇಶದ ಅಭಿವೃದ್ಧಿಗಾಗಿ ಬಿಹಾರದ ಕಾರ್ಮಿಕರು ವಿವಿಧ ಭಾಗಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ. ಮುಂಬೈ, ದೆಹಲಿ ಹಾಗೂ ಪಂಜಾಬ್ಗಳಲ್ಲಿ ಕೆಲಸ ಮಾಡ್ತಿದ್ದಾರೆ. ನಮ್ಮ ಯೋಧರು ಲಡಾಖ್ನಲ್ಲಿ ಗಡಿ ರಕ್ಷಣೆಗೆ ನಿಂತಿರುವಂತೆ, ಬಿಹಾರದ ಕಾರ್ಮಿಕರು ಈ ರಾಷ್ಟ್ರಕ್ಕಾಗಿ ತಮ್ಮ ರಕ್ತ ಮತ್ತು ಬೆವರು ಹರಿಸುತ್ತಿದ್ದಾರೆ ಎಂದರು.
22 ದಿನಗಳಲ್ಲಿ ಭಾರತ ಕೊರೊನಾ ಮುಕ್ತವಾಗಲಿದೆ ಎಂದು ನಮೋ ಹೇಳಿದ್ದರು. ಕೋವಿಡ್ನಿಂದ ಭಾರತದ ಬಡವರು, ಕಾರ್ಮಿಕರು ಮತ್ತು ರೈತರು ಭಾರಿ ನಷ್ಟಕ್ಕೊಳಗಾಗುತ್ತಾರೆ ಎಂದು ನಾನು ಫೆಬ್ರವರಿ ತಿಂಗಳಲ್ಲಿ ಹೇಳಿದ್ದೇನೆ. ಆದರೆ, ಈ ವೇಳೆ ಅಪಹಾಸ್ಯ ಮಾಡಲಾಯಿತು ಎಂದರು. ಕಳೆದ 6-7 ತಿಂಗಳಲ್ಲಿ ಕೊರೊನಾ ದುಪ್ಟಟ್ಟುಗೊಂಡಿದೆ. ಆದರೆ, ಮೋದಿ ಒಂದೂ ಮಾತನ್ನೂ ಮಾತನಾಡಿಲ್ಲ ಎಂದು ರಾಗಾ ವಾಗ್ದಾಳಿ ನಡೆಸಿದರು.
