ಲಿಮಾ (ಪೆರು): ಕೋವಿಡ್-19 ಪಾಸಿಟಿವ್ ಆಗಿದ್ದ ಇಬ್ಬರು ಗರ್ಭಿಣಿಯರಿಗೆ ಹುಟ್ಟಿದ ಮಕ್ಕಳು ಸೋಂಕು ಮುಕ್ತರಾಗಿ ಹುಟ್ಟಿರುವುದು ಅಚ್ಚರಿ ಮೂಡಿಸಿದೆ. ಪೆರು ದೇಶದ ಲಿಮಾದಲ್ಲಿ ಈ ಸೋಜಿಗದ ಪ್ರಕರಣ ನಡೆದಿದೆ.
ಹೆರಿಗೆ ನಡೆದ ಎಡ್ಗಾರ್ಡೊ ರೆಬಾಗ್ಲಿಯಾಟಿ ಮಾರ್ಟಿನ್ಸ್ ನ್ಯಾಷನಲ್ ಆಸ್ಪತ್ರೆಯು ಕಟ್ಟುನಿಟ್ಟಾದ ಜೈವಿಕ ಸುರಕ್ಷತೆ ಪ್ರೊಟೊಕಾಲ್ಗಳನ್ನು ಪಾಲಿಸಿದ್ದರಿಂದಲೇ ಮಕ್ಕಳು ಕೋವಿಡ್ ಮುಕ್ತರಾಗಿ ಜನಿಸಿವೆ ಎಂದು ವೈದ್ಯರು ಹೇಳಿದ್ದಾರೆ.
ಕಳೆದ ಮಾರ್ಚ್ ತಿಂಗಳ ಅಂತ್ಯದಲ್ಲಿ ಮಕ್ಕಳು ಜನಿಸಿವೆ. ಮಾ.27 ರಂದು 32 ನೇ ವಾರದಲ್ಲಿ ಜನಿಸಿದ ಮಗು 1 ಕೆಜಿ 77 ಗ್ರಾಂ ತೂಕ ಹಾಗೂ ಮಾ.31 ರಂದು 38 ನೇ ವಾರದಲ್ಲಿ ಜನಿಸಿದ ಮಗು 3 ಕೆಜಿ 300 ಗ್ರಾಂ ತೂಕ ಹೊಂದಿವೆ. ಈ ಮಕ್ಕಳ ತಾಯಂದಿರು ಈಗಲೂ ಆಸ್ಪತ್ರೆಯಲ್ಲೇ ದಾಖಲಾಗಿದ್ದು, ಕೋವಿಡ್ಗಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಈಗ ಎರಡೂ ಶಿಶುಗಳಿಗೆ ಒಂದು ಬಾರಿ ಕೋವಿಡ್ ಟೆಸ್ಟ್ ಮಾಡಲಾಗಿದ್ದು ನೆಗೆಟಿವ್ ವರದಿ ಬಂದಿದೆ. ಎರಡನೇ ಟೆಸ್ಟ್ನ ವರದಿಯನ್ನು ಕಾಯಲಾಗುತ್ತಿದೆ ಎಂದು ಆಸ್ಪತ್ರೆ ಅಧಿಕಾರಿಗಳು ತಿಳಿಸಿದ್ದಾರೆ.
