ಮಲಪ್ಪುರಂ: ಆನ್ಲೈನ್ ಮೂಲಕ ಖರೀದಿಸುವ ಎಷ್ಟೋ ವಸ್ತುಗಳು ಅದಲು-ಬದಲಾಗಿದ್ದನ್ನು ನಾವು ಕಂಡಿದ್ದೇವೆ. ಫೋನ್ ಆರ್ಡರ್ ಮಾಡಿದರೆ ಕಲ್ಲು ಬಂದಿದ್ದು, ಇಯರ್ ಫೋನ್ ಖರೀದಿಸಿದ್ದರೆ ಬೇರೊಂದು ವಸ್ತು ಗ್ರಾಹಕರಿಗೆ ತಲುಪಿದ್ದನ್ನು ಕೇಳಿದ್ದೇವೆ. ಆದರೆ, ಇಲ್ಲೊಬ್ಬ ಯುವಕನಿಗೆ ಆಗಿದ್ದೇ ಬೇರೆ!
ಆನ್ಲೈನ್ ದೈತ್ಯ ಅಮೆಜಾನ್ನಲ್ಲಿ 1,400 ರೂ.ಗಳ ಪವರ್ ಬ್ಯಾಂಕ್ ಆರ್ಡರ್ ಮಾಡಿದ್ದ ನಬಿಲ್ ಎಂಬ ಲಕ್ಕಿ ಬಾಯ್ಗೆ ಪವರ್ ಬ್ಯಾಂಕ್ ಬದಲಾಗಿ ಬರೋಬ್ಬರಿ 8,000 ರೂ. ಮೌಲ್ಯದ ಆಂಡ್ರಾಯ್ಡ್ ಫೋನ್ ಬಂದಿದೆ. ಇದರಿಂದ ಆಶ್ಚರ್ಯಗೊಂಡ ನಬಿಲ್, ಈ ಬಗ್ಗೆ ಟ್ವೀಟ್ ಮಾಡಿದ್ದಾರೆ.
ನಾನು ಆರ್ಡರ್ ಮಾಡಿದ್ದು 1,400 ರೂ. ಮೌಲ್ಯದ ಪವರ್ ಬ್ಯಾಂಕ್, ಆದರೆ, ನೀವು 8,000 ರೂ. ಮೌಲ್ಯದ ಆಂಡ್ರಾಯ್ಡ್ ಮೊಬೈಲ್ ನೀಡಿದ್ದೀರಿ, ನಾವು ಇದನ್ನು ಇಟ್ಟುಕೊಳ್ಳಬೇಕೆ? ಅಥವಾ ಹಿಂದಿರುಗಿಸಬೇಕೇ ಎಂದು ಟ್ವೀಟ್ ಮಾಡುವ ಮೂಲಕ ಅಮೆಜಾನ್ಗೆ ಪ್ರಶ್ನೆ ಹಾಕಿದ್ದಾರೆ.
ಅಮೆಜಾನ್ ಕಂಪನಿ ಸಹ ಆಶ್ಚರ್ಯ ವ್ಯಕ್ತಪಡಿಸಿ ಟ್ವೀಟ್ ಮಾಡಿದೆ. ಟ್ವೀಟ್ನಲ್ಲಿ ಯುವಕನ ಪ್ರಾಮಾಣಿಕತೆಯನ್ನು ಶ್ಲಾಘಿಸಿದೆ. ಅಷ್ಟೇ ಅಲ್ಲದೇ ಮೊಬೈಲ್ ಅನ್ನು ನಿಮ್ಮ ಬಳಿಯೇ ಇಟ್ಟುಕೊಳ್ಳಿ ಎಂದು ತಿಳಿಸಿದೆ.
ನಬಿಲ್ ತನ್ನ ಸಹೋದರಿಗಾಗಿ ಆ. 10 ರಂದು ಅಮೆಜಾನ್ನಲ್ಲಿ 1,400 ರೂ. ಮೌಲ್ಯದ ಪವರ್ ಬ್ಯಾಂಕ್ವೊಂದನ್ನು ಆರ್ಡರ್ ಮಾಡಿದ್ದರು. ಅದರಂತೆ ಒಂದು ವಾರದೊಳಗೆ ಅಮೆಜಾನ್ ಕಂಪನಿಯು ನಬಿಲ್ ಅವರ ಮನೆಗೆ ಆರ್ಡರ್ ಅನ್ನು ತಲುಪಿಸಿತ್ತು. ಆದರೆ, ಅದನ್ನು ತೆರೆದು ನೋಡಿದಾಗ ನಬಿಲ್ಗೆ ಆಶ್ಚರ್ಯ ಕಾದಿತ್ತು. ಪವರ್ ಬ್ಯಾಂಕ್ ಬದಲಾಗಿ 8,000 ರೂ. ಮೌಲ್ಯದ ಆಂಡ್ರಾಯ್ಡ್ ಫೋನ್ ಇರುವುದನ್ನು ಕಂಡು ಆಶ್ಚರ್ಯ ವ್ಯಕ್ತಪಡಿಸಿ ಟ್ವೀಟ್ ಮಾಡಿದ್ದನು. ತಮ್ಮ ತಪ್ಪಿನ ಅರಿವಾಗಿ ಅಮೆಜಾನ್ ಕಂಪನಿಯೂ ಯುವಕನ ಪ್ರಾಮಾಣಿಕತೆಯನ್ನು ಹೊಗಳುವ ಮೂಲಕ ಮೊಬೈಲ್ ಅನ್ನು ಸಹ ಕೊಟ್ಟಿದೆ.
