ಚೆನ್ನೈ: ಶುಕ್ರವಾರ ನಿಧನರಾದ ಗಾಯಕ ಎಸ್ಪಿ ಬಾಲಸುಬ್ರಹ್ಮಣ್ಯಂ ಅವರ ಪುತ್ರ ಎಸ್ ಪಿ ಚರಣ್ ತಮ್ಮ ತಂದೆಯ ಚಿಕಿತ್ಸೆಯ ವೆಚ್ಚದ ಬಗ್ಗೆ ಹಬ್ಬುತ್ತಿರುವ ವದಂತಿಗಳ ಕುರಿತಂತೆ ಸ್ಪಷ್ಟನೆ ನೀಡಿದ್ದಾರೆ.
ಎಸ್ಪಿಬಿ ಚಿಕಿತ್ಸೆಗೆ ಚೆನ್ನೈನ ಪ್ರತಿಷ್ಟಿತ ಆಸ್ಪತ್ರೆ ಭಾರಿ ಮೊತ್ತದ ಬಿಲ್ ಮಾಡಿದೆ, ಎಲ್ಲಾ ಹಣವನ್ನು ನೀಡುವವರೆಗೆ ಪಾರ್ಥಿವ ಶರೀರ ನೀಡಿಲ್ಲ ಎಂದು ಸಾಮಾಜಿಕ ಜಾಲತಾಣದಲ್ಲಿ ವದಂತಿಗಳು ಹಬ್ಬುತ್ತಿವೆ. ಈ ಬಗ್ಗೆ ಫೇಸ್ಬುಕ್ನಲ್ಲಿ ಪೋಸ್ಟ್ ಮಾಡಿರುವ ವಿಡಿಯೋದಲ್ಲಿ ಸ್ಪಷ್ಟನೆ ನೀಡಿರುವ ಎಸ್ಪಿಬಿ ಪುತ್ರ ಚರಣ್, ಬೇಸರ ವ್ಯಕ್ತಪಡಿಸಿದ್ದಾರೆ.
ಜನರು ಏಕೆ ಈ ರೀತಿ ಮಾಡುತ್ತಾರೆ ಎಂಬುದು ನನಗೆ ತಿಳಿದಿಲ್ಲ. ಇದು ಜನರಿಗೆ ಇದು ನೋವುಂಟು ಮಾಡುತ್ತದೆ. ಖಂಡಿತವಾಗಿಯೂ ಈ ಕೃತ್ಯವನ್ನು ಎಸಗಿರುವವರು ಎಸ್ಪಿಬಿ ಅಭಿಮಾನಿಯಲ್ಲ, ಏಕೆಂದರೆ ಎಸ್ಪಿಬಿ ಅಭಿಮಾನಿ ಎಂದಿಗೂ ಈ ರೀತಿಯ ಕೃತ್ಯ ಎಸಗಲ್ಲ. ಅವರು ಇತರರನ್ನು ನೋಯಿಸುವ ವ್ಯಕ್ತಿಯಲ್ಲ, ಅವನು ಕ್ಷಮಿಸುವ ವ್ಯಕ್ತಿ. ನಾನು ಈ ವ್ಯಕ್ತಿಯನ್ನು ಕ್ಷಮಿಸುತ್ತೇನೆ ಎಂದಿದ್ದಾರೆ.
ವದಂತಿಗಳನ್ನು ಹರಡಿದ ವ್ಯಕ್ತಿಗೆ ಈ ವದಂತಿಯನ್ನು ಹರಡಲು ಯಾವುದೇ ಆಧಾರವಿಲ್ಲ. ಒಬ್ಬ ವ್ಯಕ್ತಿಯ ಕೃತ್ಯದಿಂದ ಎಷ್ಟು ಅನಾನುಕೂಲತೆ ಉಂಟಾಗುತ್ತದೆ. ಈ ಬಗ್ಗೆ ನಾನು ಏನನ್ನೂ ಹೇಳುವುದಿಲ್ಲ, ದೇವರು ನಿಮ್ಮನ್ನು ನೋಡಿಕೊಳ್ಳುತ್ತಾನೆ ಎಂದಿದ್ದಾರೆ.
