ಚೆನ್ನೈ: ಹೆಂಡ್ತಿ ಜೊತೆ ಜಗಳವಾಡಿದ ಗಂಡ ಕುಡಿದ ಮತ್ತಿನಲ್ಲಿ ರೈಲನ್ನೇ ನಿಲ್ಲಿಸಿರುವ ಘಟನೆ ತಮಿಳುನಾಡಿನಲ್ಲಿ ಸಂಚಲನ ಮೂಡಿಸಿದೆ.
ಶಿವಗಂಗೆ ಜಿಲ್ಲೆಯ ಮಾನಮದುರೈ ನಿವಾಸಿ ಷಣ್ಮುಗವೇಲು (26) ಶುಕ್ರವಾರ ಹೆಂಡ್ತಿಯ ಜೊತೆ ಜಗಳವಾಡಿ ತನ್ನ ಬೈಕ್ ಮೂಲಕ ತಿರುಭುವನಂ ಸೇರಿದ್ದಾನೆ. ಲಾಡನೆಂದಲ್ ರೈಲ್ವೇ ಹಳಿ ಪಕ್ಕ ಕುಡಿದು ಮಲಗಿದ್ದಾನೆ. ಶನಿವಾರ ಬೆಳಗ್ಗೆ ಷಣ್ಮುಗವೇಲು ಬೈಕ್ ರೈಲ್ವೇ ಹಳಿಯ ಮೇಲೆ ನಿಲ್ಲಿಸಿ ಅದರ ಮೇಲೆ ಕುಳಿತುಕೊಂಡಿದ್ದಾನೆ.
ಇನ್ನು ಬೆಳಗ್ಗೆ 7.40ಕ್ಕೆ ಮದುರೈನಿಂದ ರಾಮೇಶ್ವರ್ಗೆ ತೆರಳುತ್ತಿದ್ದ ರೈಲು ಬಂದಿದೆ. ಸ್ವಲ್ಪ ದೂರದಲ್ಲಿ ಹಳಿಗಳ ಮೇಲೆ ಬೈಕ್ ಮತ್ತು ಷಣ್ಮುಗ ಇರುವುದನ್ನು ಗಮನಿಸಿದ ಚಾಲಕ ಟ್ರೇನ್ಗೆ ಬ್ರೇಕ್ ಹಾಕಿ ನಿಲ್ಲಿಸಿದ್ದಾರೆ. ಇದ್ದಕ್ಕಿದ್ದಂತೆ ಟ್ರೇನ್ ನಿಂತಿದ್ದರಿಂದ ಕೆಳಗಿಳಿದ ಪ್ರಯಾಣಿಕರು ಷಣ್ಮುಗವೇಲ್ನನ್ನು ಯಾಕಪ್ಪ ಹೀಗೆ ಹಳಿ ಮೇಲೆ ಬೈಕ್ ಏರಿ ಕುಳಿತ್ತಿದ್ದೀಯಾ ಎಂದು ವಿಚಾರಿಸಿದ್ದಾರೆ. ಅಷ್ಟೇ ಅಲ್ಲ ಆತನನ್ನು ಸಮಾಧಾನಪಡಿಸಲು ಮುಂದಾಗಿದ್ದಾರೆ. ಆದ್ರೆ ಯಾವುದೇ ಪ್ರಯೋಜನವಾಗಿಲ್ಲ.
ಈ ಸುದ್ದಿ ರೈಲ್ವೇ ಪೊಲೀಸರಿಗೂ ಗೊತ್ತಾಗಿ, ಸ್ಥಳಕ್ಕೆ ದೌಡಿಯಿಸಿದ್ದಾರೆ. ತಕ್ಷಣ ಎಚ್ಚೆತ್ತುಕೊಂಡ ಷಣ್ಮುಗವೇಲು ಸ್ಥಳದಿಂದ ಪರಾರಿಯಾಗಿದ್ದಾನೆ. ಈ ಘಟನೆಯಿಂದ ರೈಲು ಅರ್ಧ ಗಂಟೆಗೂ ಹೆಚ್ಚು ಕಾಲ ತಡವಾಗಿ ಚಲಿಸಿದೆ. ಮಾನಮದುರೈ ರೈಲ್ವೇ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಷಣ್ಮುಗವೇಲು ಬಂಧನಕ್ಕೆ ಹುಡುಕಾಟ ನಡೆಸಿದ್ದಾರೆ.
