ನವದೆಹಲಿ: ರಾಜಕೀಯ, ಧಾರ್ಮಿಕ ಸೂಕ್ಷ್ಮ ವಿವಾದವಾಗಿರುವ ರಾಮಜನ್ಮಭೂಮಿ ಬಾಬರಿ ಮಸೀದಿ ಪ್ರಕರಣದ ಐತಿಹಾಸಿಕ ತೀರ್ಪಿಗೆ ಕ್ಷಣಗಣನೆ ಆರಂಭವಾಗಿದೆ.
ಸತತ 40 ದಿನಗಳ ಕಾಲ ನಿತ್ಯ ವಿಚಾರಣೆ ನಡೆಸಿದ ಮುಖ್ಯನ್ಯಾಯಮೂರ್ತಿ ರಂಜನ್ ಗೊಗೊಯಿ ನೇತೃತ್ವದ ಪೀಠ ಎಲ್ಲ ವಾದ-ಪ್ರತಿವಾದವನ್ನು ಆಲಿಸಿ, ತೀರ್ಪನ್ನು ಕಾಯ್ದಿರಿಸಿದೆ. ಅಷ್ಟಕ್ಕೂ 2.77 ಎಕರೆ ಜಾಗದ ಸುತ್ತ ಸುತ್ತಿಕೊಂಡಿರುವ ವಿವಾದ ಸಂಪೂರ್ಣ ಹಿನ್ನೋಟ ಇಲ್ಲಿದೆ.
ಅಯೋಧ್ಯೆ ಪ್ರಕರಣದ ವಾದ - ಪ್ರತಿವಾದ ಕೊನೆಗೂ ಅಂತ್ಯ: ಐತಿಹಾಸಿಕ ತೀರ್ಪು ಕಾಯ್ದಿರಿಸಿದ ಸುಪ್ರೀಂ!
ವಿವಾದದ ಘಟನಾವಳಿ:
- 1528: ಬಾಬರ್ ಆಡಳಿತದಲ್ಲಿ ಕಮಾಂಡರ್ ಆಗಿದ್ದ ಮೀರ್ ಭಕ್ಷಿ ಬಾಬ್ರಿ ಮಸೀದಿ ನಿರ್ಮಿಸಿತು.
- 1885: ರಾಮಜನ್ಮಭೂಮಿ- ಬಾಬ್ರಿ ಮಸೀದಿ ವಿವಾದ ಮೊದಲ ಬಾರಿಗೆ ಕೋರ್ಟ್ ಮೆಟ್ಟಿಲೇರಿತು. ರಾಮಜನ್ಮಭೂಮಿಯಲ್ಲಿ ಕಟ್ಟಡದ ಹೊರವಲಯಲ್ಲಿ ಮೇಲ್ಛಾವಣಿ ನಿರ್ಮಿಸಲು ಅನುಮತಿ ಕೋರಿ ಮಹಾಂತ ರಘುವೀರ್ ದಾಸ್ ಫೈಜಾಬಾದ್ ಕೋರ್ಟ್ನಲ್ಲಿ ಅರ್ಜಿ ಸಲ್ಲಿಕೆ ಮಾಡುತ್ತಾರೆ. ಕೋರ್ಟ್ ಅರ್ಜಿಯನ್ನು ತಿರಸ್ಕರಿಸುತ್ತದೆ.
- 23 ಡಿಸೆಂಬರ್ 1949: ಮಸೀದಿಯ ಕೇಂದ್ರಭಾಗದಲ್ಲಿ ದೇವರ ಮೂರ್ತಿಯನ್ನು ಇರಿಸುವ ಮೂಲಕ ಪರಿಸ್ಥಿತಿ ವಿಕೋಪಕ್ಕೆ ತಿರುಗುತ್ತದೆ.
- 16 ಜನವರಿ 1950: ರಾಮ್ ಲಲ್ಲಾರನ್ನು ಪೂಜಿಸಲು ಅನುಮತಿ ನೀಡಬೇಕು ಎಂದು ಗೋಪಾಲ್ ಸಿಂಗ್ ವಿಶಾರದ್ ಫೈಜಾಬಾದ್ ಕೋರ್ಟ್ನಲ್ಲಿ ಅರ್ಜಿ ಸಲ್ಲಿಸುತ್ತಾರೆ.
- 5 ಡಿಸೆಂಬರ್ 1950: ರಾಮಜನ್ಮಭೂಮಿಯಲ್ಲಿ ತಮ್ಮ ಪೂಜೆಯನ್ನು ಮುಂದುವರಿಸಲು ಅನುಮತಿ ಕೋರಿ ಮಹಾಂತ ಪರಮಹಂಸ ರಾಮಚಂದ್ರ ಅರ್ಜಿ ಸಲ್ಲಿಕೆ ಮಾಡುತ್ತಾರೆ.
- 17 ಡಿಸೆಂಬರ್ 1959: ವಿವಾದಿತ ಜಾಗವನ್ನು ಸ್ವಾಧೀನಪಡಿಸಿಕೊಳ್ಳಲು ನಿರ್ಮೋಹಿ ಅಖಾರ ಅರ್ಜಿ ಸಲ್ಲಿಸುತ್ತದೆ.
- 18 ಡಿಸೆಂಬರ್ 1961: ಉತ್ತರ ಪ್ರದೇಶದ ಕೇಂದ್ರ ವಕ್ಫ್ ಬೋರ್ಡ್ ಸಹ ಇದೇ ಜಾಗದ ಹಕ್ಕಿಗಾಗಿ ಅರ್ಜಿ ಸಲ್ಲಿಸುತ್ತದೆ.
- 1 ಜುಲೈ 1989: ಭಗವಾನ್ ರಾಮ್ ಲಲ್ಲಾ ವಿರಾಜ್ಮಾನ ಹೆಸರಿನಲ್ಲಿ ಐದನೇ ಅರ್ಜಿ ಕೋರ್ಟ್ನಲ್ಲಿ ಸಲ್ಲಿಕೆಯಾಗುತ್ತದೆ.
- 6 ಡಿಸೆಂಬರ್ 1992: ಬಾಬ್ರಿ ಮಸಿದಿಯನ್ನು ಕೆಡವಲಾಯಿತು.
- 1993: ಬಾಬ್ರಿ ಮಸೀದಿ ಧ್ವಂಸಗೊಳಿಸಿದ ಬಗ್ಗೆ ಹತ್ತಾರು ಅರ್ಜಿ ಸುಪ್ರೀಂನಲ್ಲಿ ಸಲ್ಲಿಕೆಯಾಯಿತು. ಇಸ್ಮಾಯಿಲ್ ಫಾರೂಖಿ ಕೆಲವಾರು ಕಾಯ್ದೆಯನ್ನು ಪ್ರಶ್ನಿಸಿ ಅಲಹಾಬಾದ್ ಕೋರ್ಟ್ನಲ್ಲಿ ಅರ್ಜಿ ಸಲ್ಲಿಸುತ್ತಾರೆ.
- 24 ಅಕ್ಟೋಬರ್ 1994: ಮಸೀದಿ ಮುಸ್ಲಿಮರ ಅವಿಭಾಜ್ಯ ಅಂಗವಲ್ಲ ಎಂದು ಸುಪ್ರೀಂ ಐತಿಹಾಸಿಕ ತೀರ್ಪು ನೀಡಿತು.
- 2002 ಏಪ್ರಿಲ್: ಮೂವರು ಹೈಕೋರ್ಟ್ ಜಡ್ಜ್ಗಳು ವಿವಾದಿತ ಜಾಗದ ಅರ್ಜಿಗಳ ವಿಚಾರಣೆ ಆರಂಭಿಸುತ್ತಾರೆ.
- 30 ಸೆಪ್ಟೆಂಬರ್ 2010: ಅಲಹಾಬಾದ್ನ ಲಖನೌ ಪೀಠ 2.77 ಎಕರೆಯ ವಿವಾದಿತ ಜಾಗವನ್ನು ಮೂರು ಭಾಗವನ್ನಾಗಿ ಮಾಡಿ ರಾಮ್ ಲಲ್ಲಾ, ಸುನ್ನಿ ವಕ್ಫ್ ಬೋರ್ಡ್ ಹಾಗೂ ನಿರ್ಮೋಹಿ ಅಖಾರಕ್ಕೆ ನೀಡುತ್ತದೆ.
- 9 ಮೇ 2011: ಅಲಹಾಬಾದ್ ತೀರ್ಪನ್ನು ಸುಪ್ರೀಂ ಕೋರ್ಟ್ ತಡೆಹಿಡಿಯುತ್ತದೆ.
- 26 ಫೆಬ್ರವರಿ 2016: ವಿವಾದಿತ ಸ್ಥಳದಲ್ಲಿ ರಾಮ ಮಂದಿರ ನಿರ್ಮಾಣಕ್ಕೆ ಅನುಮತಿ ನೀಡುವಂತೆ ಸುಬ್ರಮಣ್ಯಂ ಸ್ವಾಮಿ ಸುಪ್ರೀಂ ಮೊರೆ ಹೋಗುತ್ತಾರೆ.
- 21 ಮಾರ್ಚ್ 2017: ಅಯೋಧ್ಯೆ ಭೂವಿವಾದವನ್ನು ಕೋರ್ಟ್ ಹೊರಗೆ ಬಗೆಹರಿಸುವಂತೆ ಮುಖ್ಯ ನ್ಯಾಯಮೂರ್ತಿ ಖೇಹರ್ ಸಲಹೆ ನೀಡುತ್ತದೆ.
- 7 ಆಗಸ್ಟ್ 2017: ಸುಪ್ರೀಂನ ಮೂವರು ಸದಸ್ಯರ ಪೀಠ 2010 ಅಲಹಾಬಾದ್ ಕೋರ್ಟ್ ತೀರ್ಪಿನ ಮೇಲ್ಮನವಿ ಅರ್ಜಿಯನ್ನು ಕೈಗೆತ್ತಿಕೊಳ್ಳುತ್ತದೆ.
- 8 ಆಗಸ್ಟ್ 2017: ಮುಸ್ಲಿಂ ಬಾಹುಳ್ಯವಿರುವ ಪ್ರದೇಶದಲ್ಲಿ ಅಂದರೆ ವಿವಾದಿತ ಸ್ಥಳದಿಂದ ಕೊಂಚ ದೂರದಲ್ಲಿ ಮಸೀದಿ ನಿರ್ಮಿಸಬಹುದು ಎಂದು ಕೇಂದ್ರ ಶಿಯಾ ವಕ್ಫ್ ಬೋರ್ಡ್ ಸುಪ್ರೀಂಗೆ ತಿಳಿಸುತ್ತದೆ.
- 5 ಡಿಸೆಂಬರ್ 2017: ಅಯೋಧ್ಯೆ ಭೂವಿವಾದಕ್ಕೆ ಸಂಬಂಧಿಸಿದಂತೆ ಮುಖ್ಯನ್ಯಾಯಮೂರ್ತಿ ದೀಪಕ್ ಮಿಶ್ರಾ, ಜಸ್ಟೀಸ್ ಅಶೋಕ್ ಭೂಷಣ್ ಹಾಗೂ ಎಸ್ ಅಬ್ದುಲ್ ನಜೀರ್ ನೇತೃತ್ವದ ಕೊನೆಯ ವಿಚಾರಣೆ ನಡೆಸುತ್ತದೆ.
- 8 ಫೆಬ್ರವರಿ 2018: ಅಯೋಧ್ಯೆ ವಿವಾದವನ್ನು ಕೇವಲ ಭೂವಿವಾದವನ್ನಾಗಿ ಮಾತ್ರವೇ ಪರಿಗಣಿಸುವಂತೆ ಅರ್ಜಿದಾರರಿಗೆ ಸುಪ್ರೀಂ ಸೂಚಿಸಿ ವಿಚಾರಣೆಯನ್ನು ಮತ್ತೆ ಆರಂಭಿಸುತ್ತದೆ.
- 14 ಮಾರ್ಚ್ 2018: ಸುಬ್ರಮಣ್ಯಂ ಸ್ವಾಮಿ ಅರ್ಜಿ ಸೇರಿದಂತೆ ಎಲ್ಲ ಮಧ್ಯಂತರ ಅರ್ಜಿಯನ್ನು ಸುಪ್ರೀಂ ತಳ್ಳಿಹಾಕುತ್ತದೆ.
- 6 ಏಪ್ರಿಲ್ 2018: ವಿವಾದವನ್ನು ಮತ್ತೊಮ್ಮೆ ಪರಿಗಣಿಸಿ1994 ತೀರ್ಪನ್ನು ವಿಸ್ತೃತ ಪೀಠದಲ್ಲಿ ವಿಚಾರಣೆ ನಡೆಸುವಂತೆ ಹಿರಿಯ ವಕೀಲ ರಾಜೀವ ಧವನ್ ಅರ್ಜಿ ಸಲ್ಲಿಸುತ್ತಾರೆ.
- 27 ಸೆಪ್ಟೆಂಬರ್ 2018: ವಿಸ್ತೃತ ಪೀಠಕ್ಕೆ ವರ್ಗಾಯಿಸಲು ಕೋರ್ಟ್ ನಿರಾಕರಿಸಿ ತ್ರಿಸದಸ್ಯ ಪೀಠದಲ್ಲೇ ಅ.29ರಿಂದ ವಿಚಾರಣೆ ನಡೆಸುವುದಾಗಿ ಹೇಳುತ್ತದೆ.
- 4 ಜನವರಿ 2019: ಅಯೋಧ್ಯೆ ಭೂವಿವಾದವನ್ನು ಸೂಕ್ತ ಪೀಠ ಜನವರಿ 10ರಿಂದ ವಿಚಾರಣೆ ನಡೆಸಲಿದೆ ಎಂದು ದ್ವಿಸದಸ್ಯ ಪೀಠ ಹೇಳುತ್ತದೆ
- 8 ಜನವರಿ 2019: ಮುಖ್ಯ ನ್ಯಾಯಮೂರ್ತಿ ನೇತೃತ್ವದ ಪಂಚ ಸದಸ್ಯ ಪೀಠ( ಜಸ್ಟೀಸ್ ಎಸ್.ಎ.ಬೋಬ್ಡೆ, ಎನ್.ವಿ.ರಮಣ, ಯು,ಯು, ಲಲಿತ್ ಹಾಗೂ ಡಿ.ವೈ.ಚಂದ್ರಚೂಡ್) ಜನವರಿ 10ರಿಂದ ವಿಚಾರಣೆ ನಡೆಸಲಿದೆ ಎನ್ನುವ ತೀರ್ಮಾನ ಹೊರಬೀಳುತ್ತದೆ.
- 10 ಜನವರಿ 2019: ವಿಚಾರಣೆ ಆರಂಭದ ದಿನವೇ ಪೀಠದ ಸದಸ್ಯರಾದ ಯು.ಯು.ಲಲಿತ್ ಹಿಂದೆಸರಿಯುತ್ತಾರೆ.
- 20 ಫೆಬ್ರವರಿ 2019: ಅಯೋಧ್ಯೆ ಪೀಠವೇ ಭೂವಿವಾದ ವಿಚಾರಣೆ ನಡೆಸಲಿದೆ ಎಂದು ಸುಪ್ರೀಂ ಕೋರ್ಟ್ ಪ್ರಕಟಣೆ ತಿಳಿಸುತ್ತದೆ.
- 8 ಮಾರ್ಚ್ 2019: ಅಯೋಧ್ಯೆ ವಿವಾದವನ್ನು ಮಧ್ಯಸ್ಥಿಕೆ ಮೂಲಕ ಬಗೆಹರಿಸುವಂತೆ ಸುಪ್ರೀಂ ಹೇಳುತ್ತದೆ. ಇದಕ್ಕಾಗಿ ಜಸ್ಟೀಸ್ ಎಫ್.ಎಂ.ಐ.ಖಲೀಫುಲ್ಲಾ, ಧಾರ್ಮಿಕ ಗುರು ರವಿಶಂಕರ್ ಗುರೂಜಿ ಹಾಗೂ ಹಿರಿಯ ವಕೀಲ ಶ್ರೀರಾಮ್ ಪಂಚು ಒಳಗೊಂಡ ಸಮಿತಿಯನ್ನು ನೇಮಿಸುತ್ತದೆ.
- 2 ಆಗಸ್ಟ್ 2019: ಸುಮಾರು ಎಂಟು ವಾರಗಳ ಕಾಲ ನಡೆದ ರಹಸ್ಯ ಮಧ್ಯಸ್ಥಿಕೆ ಮಾತುಕತೆ ವಿವಾದವನ್ನು ಬಗೆಹರಿಸುವಲ್ಲಿ ವಿಫಲವಾಗಿದೆ ಎಂದು ಮುಖ್ಯನ್ಯಾಯಮೂರ್ತಿ ರಂಜನ್ ಗೊಗೊಯಿ ಹೇಳಿದರು. ಆಗಸ್ಟ್ 6ರಿಂದ ಸುಪ್ರೀಂ ನಿತ್ಯ ವಿಚಾರಣೆ ನಡೆಸುವುದಾಗಿ ಗೊಗೊಯಿ ತಿಳಿಸಿದರು.
- 6 ಆಗಸ್ಟ್ 2019: ಸುಪ್ರೀಂ ಕೋರ್ಟ್ ಅಯೋಧ್ಯೆ ಭೂವಿವಾದ ಪ್ರಕರಣದ ನಿತ್ಯ ವಿಚಾರಣೆ ಆರಂಭಿಸಿತು.
- 18 ಸೆಪ್ಟೆಂಬರ್ 2019: ಅಯೋಧ್ಯೆ ವಿವಾದವನ್ನು ಶೀಘ್ರ ಕೊನೆಗೊಳಿಸುವ ಸಲುವಾಗಿ ಅ.18ಕ್ಕೆ ಅಂತಿಮ ವಿಚಾರಣೆ ಎಂದು ರಂಜನ್ ಗೊಗೊಯಿ ಅರ್ಜಿದಾರರಿಗೆ ಹೇಳಿದರು.
- 20 ಸೆಪ್ಟೆಂಬರ್ 2019: ವಿಚಾರಣೆ ಶೀಘ್ರ ಪೂರ್ಣಗೊಳಿಸುವ ನಿಟ್ಟಿನಲ್ಲಿ ನಿತ್ಯ ವಿಚಾರಣೆಯನ್ನು ಒಂದು ಗಂಟೆ ಹೆಚ್ಚಳ ಮಾಡಲಾಯಿತು. ಕೋರ್ಟ್ ಅವಧಿಯನ್ನು ಸಂಜೆ 4ರ ಬದಲಾಗಿ 5ಕ್ಕೆ ವಿಸ್ತರಿಸಲಾಯಿತು.
- 16 ಅಕ್ಟೋಬರ್ 2019: ಸತತ 40 ದಿನಗಳ ನಡೆದ ನಿತ್ಯ ವಿಚಾರಣೆ ಪೂರ್ಣ. ಅರ್ಜಿದಾರರಿಗೆ ವಾದದ ಸಾರಾಂಶವನ್ನು ಕೋರ್ಟ್ಗೆ ಸಲ್ಲಿಸಲು ಮೂರು ದಿನದ ಕಾಲಾವಕಾಶ ನೀಡಿ ತೀರ್ಪನ್ನು ಕಾಯ್ದಿರಿಸಿದೆ.
