ಈವರೆಗೆ ಪ್ಯಾರಾ ಮಿಲಿಟರಿಯ ನೂರಕ್ಕೂ ಅಧಿಕ ಸಿಬ್ಬಂದಿ ಕೊರೊನಾಗೆ ಬಲಿ: ಕೇಂದ್ರ ಗೃಹ ಇಲಾಖೆ

ಈವರೆಗೆ ನೂರಕ್ಕೂ ಹೆಚ್ಚು ಪ್ಯಾರಾ ಮಿಲಿಟರಿ ಸಿಬ್ಬಂದಿ ಕೊರೊನಾ ಸೋಂಕಿನಿಂದ ಮೃತಪಟ್ಟಿದ್ದಾರೆ ಎಂದು ಕೇಂದ್ರ ಗೃಹ ಇಲಾಖೆ ಮಾಹಿತಿ ನೀಡಿದೆ.

ನವದೆಹಲಿ: ಕೊರೊನಾದಿಂದಾಗಿ ಈವರೆಗೆ ಸುಮಾರು ನೂರಕ್ಕೂ ಹೆಚ್ಚು ಅರೆಸೇನಾ ಪಡೆಗಳ ಸಿಬ್ಬಂದಿ ಮೃತಪಟ್ಟಿದ್ದಾರೆ ಎಂದು ಕೇಂದ್ರ ಗೃಹ ಇಲಾಖೆ ಮಾಹಿತಿ ನೀಡಿದೆ.

ಸೆಪ್ಟೆಂಬರ್ 10ರವರೆಗಿನ ಅಂಕಿ-ಅಂಶಗಳಂತೆ ಸಿಆರ್​​​​ಪಿಎಫ್​ನ 35, ಗಡಿ ಭದ್ರತಾ ಪಡೆಯ 23, ಕೇಂದ್ರಿಯ ಕೈಗಾರಿಕಾ ಭದ್ರತಾ ಪಡೆಯ 24, ಐಟಿಬಿಪಿಯ 7, ಎಸ್​ಎಸ್​ಬಿಯ 7, ಅಸ್ಸಾಂ ರೈಫಲ್ಸ್​ನ ಐದು ಮಂದಿ ಸೋಂಕಿನಿಂದ ಮೃತಪಟ್ಟಿದ್ದಾರೆ ಎಂದು ಕೇಂದ್ರ ಗೃಹ ಖಾತೆಯ ರಾಜ್ಯ ಸಚಿವ ನಿತ್ಯಾನಂದ ರಾಯ್ ಲೋಕಸಭೆಯಲ್ಲಿ ಸ್ಪಷ್ಟನೆ ನೀಡಿದ್ದಾರೆ.

ಕೊರೊನಾ ಸೋಂಕಿನಿಂದ ಸಾವನ್ನಪ್ಪಿದ ಸಿಆರ್​ಪಿಎಫ್ ಯೋಧರಿಗೆ 'ಭಾರತ್ ಕಾ ವೀರ್' ನಿಧಿಯ ಮೂಲಕ 15 ಲಕ್ಷ ರೂಪಾಯಿ ಪರಿಹಾರ ನೀಡಲು ನಿರ್ಧರಿಸಲಾಗಿದೆ ಎಂದು ನಿತ್ಯಾನಂದರಾಯ್ ಲೋಕಸಭೆಯಲ್ಲಿ ತಿಳಿಸಿದರು.

ಲಾಕ್​​ಡೌನ್ ವೇಳೆ ಕರ್ತವ್ಯದಲ್ಲಿದ್ದ ಅರೆಸೇನಾ ಪಡೆಯ ಸಾಕಷ್ಟು ಸಿಬ್ಬಂದಿಯಲ್ಲಿ ಕೊರೊನಾ ಸೋಂಕು ದೃಢಪಟ್ಟಿತ್ತು. ಆಂತರಿಕ ಭದ್ರತೆ ಹಾಗೂ ಕಂಟೇನ್​ಮೆಂಟ್ ಝೋನ್​ಗಳಲ್ಲಿದ್ದ ಸಿಬ್ಬಂದಿಗೆ ಕೋವಿಡ್ ಕಾಡಿತ್ತು. ಉತ್ತರ ಪ್ರದೇಶದ ಐಟಿಬಿಪಿ ರೆಫೆರಲ್ ಆಸ್ಪತ್ರೆಯಲ್ಲಿ ಸುಮಾರು 1,150 ಸಿಬ್ಬಂದಿಗೆ ಈವರಗೆ ಚಿಕಿತ್ಸೆ ನೀಡಲಾಗಿದೆ.