ನವದೆಹಲಿ: ಇನ್ಸ್ಟಾಗ್ರಾಂನಲ್ಲಿನ 'ಬಾಯ್ಸ್ ಲಾಕರ್ ರೂಂ' ಪ್ರಕರಣ ಸೋಶಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಎಚ್ಚೆತ್ತ ದೆಹಲಿ ಪೊಲೀಸರ ಸೈಬರ್ ಸೆಲ್ ವಿಭಾಗವು ದಕ್ಷಿಣ ದೆಹಲಿಯ ಪ್ರತಿಷ್ಠಿತ ಶಾಲೆಯೊಂದರ 15 ವರ್ಷದ ವಿದ್ಯಾರ್ಥಿಯೊಬ್ಬನನ್ನು ಬಂಧಿಸಿದ್ದು, ಪ್ರಕರಣದಲ್ಲಿ ಭಾಗಿಯಾದ ಇನ್ನೂ 22 ಬಾಲಕರ ಪತ್ತೆಗಾಗಿ ತನಿಖೆ ನಡೆಸಲಾಗುತ್ತಿದೆ.
'ಬಾಯ್ಸ್ ಲಾಕರ್ ರೂಂ' ಎಂಬ ಹೆಸರಿನ ಇನ್ಸ್ಟಾಗ್ರಾಂ ಚಾಟ್ ಗ್ರೂಪ್ ಮಾಡಿಕೊಂಡಿದ್ದ ಕೆಲ ಬಾಲಕರು, ಇದರಲ್ಲಿ ಅಪ್ರಾಪ್ತ ಬಾಲಕಿಯರನ್ನು ರೇಪ್ ಮಾಡಲು ಉತ್ತೇಜಿಸುವ ಸಂದೇಶಗಳನ್ನು ಹಾಗೂ ಬಾಲಕಿಯರ ಆಕ್ಷೇಪಾರ್ಹ ಫೋಟೊಗಳನ್ನು ಹಂಚಿಕೊಂಡಿದ್ದರು.
ಗ್ರೂಪ್ನ ಕೆಲ ಸ್ಕ್ರೀನ್ಶಾಟ್ಗಳು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದವು. ಅಪ್ರಾಪ್ತ ವಯಸ್ಸಿನ ಬಾಲಕಿರ ಫೋಟೊಗಳನ್ನು ಹಾಕಿ, ಅವರ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆಸುವ ಪ್ಲಾನ್ ಮಾಡಲಾಗುತ್ತಿತ್ತು ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಕಾರ್ಯಪ್ರವೃತ್ತರಾದ ಪೊಲೀಸರು ಓರ್ವ ಬಾಲಕನನ್ನು ಬಂಧಿಸಿದ್ದಾರೆ. ಐಪಿಸಿಯ ಸೆಕ್ಷನ್ 465 (ಫೋರ್ಜರಿ), 471 (ನಕಲಿ ದಾಖಲೆಗಳ ಬಳಕೆ), 469 (ತೇಜೋವಧೆ ಮಾಡಲು ನಕಲು ಮಾಡುವಿಕೆ), 509 (ಹೆಣ್ಣು ಮಕ್ಕಳ ಗೌರವಕ್ಕೆ ಧಕ್ಕೆ ತರುವ ಕೆಲಸ) ಹಾಗೂ ಇನ್ಫರ್ಮೇಶನ್ ಟೆಕ್ನಾಲಜಿ ಆ್ಯಕ್ಟ್ 67 ಮತ್ತು 67ಎ ಅಡಿ ಪ್ರಕರಣ ದಾಖಲು ಮಾಡಿಕೊಳ್ಳಲಾಗಿದೆ.
ದಕ್ಷಿಣ ದೆಹಲಿಯ ಸಾಕೇತ್ ಪ್ರದೇಶದಲ್ಲಿರುವ ಪ್ರತಿಷ್ಠಿತ ಶಾಲೆಯೊಂದರ ಪ್ರಿನ್ಸಿಪಾಲ್ ಒಬ್ಬರು ಸೋಮವಾರ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ಈ ಕುರಿತು ದೂರು ದಾಖಲಿಸಿ, ತನಿಖೆ ಕೈಗೊಳ್ಳುವಂತೆ ಮನವಿ ಮಾಡಿದ್ದರು. ಪ್ರಕರಣದ ತನಿಖೆಯನ್ನು ಸೈಬರ್ ಸೆಲ್ಗೆ ವರ್ಗಾಯಿಸಲಾಗಿತ್ತು. ಅಲ್ಲದೆ ಉತ್ತರ ದೆಹಲಿಯ ಪೊಲೀಸ್ ಠಾಣೆಯೊಂದರಲ್ಲಿ ಇನ್ಸ್ಟಾಗ್ರಾಂ ಗ್ರೂಪ್ ಪ್ರಕರಣದ ಕುರಿತು ತನಿಖೆ ನಡೆಸುವಂತೆ ಪಾಲಕರೊಬ್ಬರು ಪ್ರತ್ಯೇಕ ದೂರು ದಾಖಲಿಸಿದ್ದರು. 'ಬಾಯ್ಸ್ ಲಾಕರ್ ರೂಂ' ಗ್ರೂಪ್ ಸದಸ್ಯರ ಸಂಪೂರ್ಣ ಮಾಹಿತಿ ನೀಡುವಂತೆ ಮೆಸೇಜಿಂಗ್ ಆ್ಯಪ್ ಇನ್ಸ್ಟಾಗ್ರಾಂಗೆ ಪೊಲೀಸರು ಸೂಚನೆ ನೀಡಿದ್ದರು.
ದಕ್ಷಿಣ ದೆಹಲಿ ನಿವಾಸಿ ಬಾಲಕಿಯೋರ್ವಳು ಗ್ರೂಪ್ನ ಆಕ್ಷೇಪಾರ್ಹ ಪೋಸ್ಟ್ಗಳ ಸ್ಕ್ರೀನ್ಶಾಟ್ಗಳನ್ನು ಇತರ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರಿಂದ ಸಂಪೂರ್ಣ ಪ್ರಕರಣ ಬೆಳಕಿಗೆ ಬಂದಿತ್ತು. "ದಕ್ಷಿಣ ದೆಹಲಿಯ 17 ರಿಂದ 18 ವರ್ಷದ ಬಾಲಕರ ಗುಂಪೊಂದು ಬಾಯ್ಸ್ ಲಾಕರ್ ರೂಂ ಎಂಬ ಇನ್ಸ್ಟಾಗ್ರಾಂ ಗ್ರೂಪ್ ಮಾಡಿಕೊಂಡಿದ್ದು, ಹುಡುಗಿಯರ ಚಿತ್ರಗಳನ್ನು ಆಕ್ಷೇಪಾರ್ಹವಾಗಿ ಮಾರ್ಪಡಿಸಿ ಅದರಲ್ಲಿ ಪೋಸ್ಟ್ ಮಾಡಲಾಗುತ್ತಿದೆ. ನನ್ನ ಶಾಲೆಯ ಇಬ್ಬರು ಹುಡುಗರು ಆ ಗ್ರೂಪ್ನಲ್ಲಿದ್ದಾರೆ. ಈಗ ನಮ್ಮ ಮನೆಯವರಿಗೂ ವಿಷಯ ಗೊತ್ತಾಗಿದ್ದು, ನಾನು ಇನ್ಸ್ಟಾಗ್ರಾಂ ಬಿಟ್ಟು ಹೊರಬರುವಂತೆ ಒತ್ತಾಯಿಸುತ್ತಿದ್ದಾರೆ." ಎಂದು ಬಾಲಕಿ ಸೋಶಿಯಲ್ ಮೀಡಿಯಾದಲ್ಲಿ ಹೇಳಿದ್ದಳು.
ಗ್ರೂಪ್ ಸದಸ್ಯರು ಹಾಗೂ ಅದರಲ್ಲಿನ ಆಕ್ಷೇಪಾರ್ಹ ಫೋಟೊಗಳು ಮತ್ತು ಅದಕ್ಕೆ ಮಾಡಲಾದ ಕಮೆಂಟ್ಗಳ ಸ್ಕ್ರೀನ್ಶಾಟ್ಗಳನ್ನು ಬಾಲಕಿ ಶೇರ್ ಮಾಡಿದ್ದಾಳೆ.
