ಶಾಲಾ ಮಕ್ಕಳಿದ್ದ ಬಸ್ ಮೇಲೆ ಆಯುಧಗಳಿಂದ ದಾಳಿ.. ಚಾಲಕನಿಗೆ ಗಾಯ

ಪಂಜಾಬ್​​ನ ಬರ್ನಾಲಾದಲ್ಲಿ ಕೆಲವು ದುಷ್ಕರ್ಮಿಗಳು ಶಾಲಾ ಬಸ್ ಮೇಲೆ ಹರಿತವಾದ ಆಯುಧಗಳಿಂದ ದಾಳಿ ನಡೆಸಿದ್ದಾರೆ. ದಾಳಿಯಲ್ಲಿ ಚಾಲಕ ಗಾಯಗೊಂಡಿದ್ದು, ಎಲ್ಲಾ ಮಕ್ಕಳು ಸುರಕ್ಷಿತವಾಗಿದ್ದಾರೆ.

ಬರ್ನಾಲಾ(ಪಂಜಾಬ್​​): ಮಕ್ಕಳಿದ್ದ ಶಾಲಾ ಬಸ್‌ ಮೇಲೆ ದ್ವಿಚಕ್ರವಾಹನ ಸವಾರರು ಹರಿತವಾದ ಆಯುಧಗಳಿಂದ ದಾಳಿ ನಡೆಸಿದ ಘಟನೆ ಬರ್ನಾಲಾದಲ್ಲಿ ನಡೆದಿದೆ. ದುಷ್ಕರ್ಮಿಗಳು ಮೊದಲು ಬಸ್​​ ಚಾಲಕನ ಮೇಲೆ ದಾಳಿ ಮಾಡಿದ್ದಾರೆ. ಆದರೆ, ಚಾಲಕ ಧೈರ್ಯ ಮತ್ತು ಬುದ್ದಿವಂತಿಕೆ ಪ್ರದರ್ಶಿಸಿ ಸ್ಥಳದಿಂದ ವೇಗವಾಗಿ ಬಸ್​ ಅನ್ನು ಹತ್ತಿರದ ಡಿಎಸ್​​ಪಿ ಕಚೇರಿಗೆ ಕೊಂಡೊಯ್ದಿದ್ದಾನೆ. ಇದರಿಂದ ಭಾರಿ ಅನಾಹುತ ತಪ್ಪಿದೆ.

ದಾಳಿಯಲ್ಲಿ ಶಾಲಾ ಮಕ್ಕಳು ಸುರಕ್ಷಿತವಾಗಿದ್ದು, ಚಾಲಕ ಗಾಯಗೊಂಡಿದ್ದಾನೆ ಎಂದು ತಿಳಿದು ಬಂದಿದೆ. ಈ ಸಂಬಂಧ ಬರ್ನಾಲಾ ಪೊಲೀಸರು ತನಿಖೆ ಆರಂಭಿಸಿದ್ದು, ಓರ್ವ ಆರೋಪಿಯನ್ನು ಬಂಧಿಸಿದ್ದಾರೆ. ದಾಳಿಯ ಬಗ್ಗೆ ಬಸ್ ಚಾಲಕ ಮಾಹಿತಿ ನೀಡಿದ್ದು, ಬಸ್​​ನಲ್ಲಿ 35 ಮಕ್ಕಳಿದ್ದು, ಶಾಲೆಯಿಂದ ಕರೆತರುತ್ತಿತ್ತು. ಅಷ್ಟರಲ್ಲಿ ಕೆಲವು ಹುಡುಗರು ಬಸ್​​ ತಡೆದು ಕೆಳಗಿಳಿಯುವಂತೆ ಹೇಳಿ ಹಲ್ಲೆ ನಡೆಸಿದ್ದಾರೆ ಎಂದು ಮಾಹಿತಿ ನೀಡಿದ್ದಾನೆ.

ಘಟನೆಯ ಬಗ್ಗೆ ಪ್ರತಿಕ್ರಿಯಿಸಿದ ಬರ್ನಾಲಾ ಡಿಎಸ್​ಪಿ ಸತ್ವಿರ್ ಸಿಂಗ್, ಪ್ರಕರಣದ ತನಿಖೆ ನಡೆಸಲಾಗುತ್ತಿದೆ. ಮಕ್ಕಳನ್ನು ಸುರಕ್ಷಿತವಾಗಿ ಮನೆಗೆ ಕಳುಹಿಸಲಾಗಿದ್ದು, ಚಾಲಕನನ್ನು ವಿಚಾರಣೆ ನಡೆಸಲಾಗುತ್ತಿದೆ. ಚಾಲಕನಿಗೆ ದುಷ್ಕರ್ಮಿಗಳೊಂದಿಗೆ ಹಳೆ ದ್ವೇಷವಿತ್ತು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ಅದಕ್ಕಾಗಿಯೇ ಈ ದಾಳಿ ನಡೆಸಿದ್ದಾರೆ ಎನ್ನಲಾಗ್ತಿದೆ. ದಾಳಿಕೋರರಲ್ಲಿ ಕೆಲವರನ್ನು ಗುರುತಿಸಲಾಗಿದ್ದು, ಓರ್ವನನ್ನು ಬಂಧಿಸಲಾಗಿದೆ. ಶೀಘ್ರವೇ ಎಲ್ಲ ಆರೋಪಿಗಳನ್ನು ಬಂಧಿಸಿ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ: ಉಗ್ರರ ಅಡಗುತಾಣ ದ್ವಂಸಗೊಳಿಸಿದ ಸೇನೆ.. ಭಯೋತ್ಪಾದಕರು ಎಸ್ಕೇಪ್​​, ಶಸ್ತ್ರಾಸ್ತ್ರ ವಶ