ಪಟಿಯಾಲಾ (ಲುಧಿಯಾನ): ಬಂಧನ ಭೀತಿಯಿಂದ ಪೊಲೀಸರ ಕಣ್ತಪ್ಪಿಸಿಕೊಂಡು ಓಡಾಡುತ್ತಿರುವ ಖಲಿಸ್ತಾನ್ ಪ್ರತ್ಯೇಕತಾವಾದಿ ಅಮೃತ್ಪಾಲ್ ಸಿಂಗ್ ಮಾರ್ಚ್ 18 ರಿಂದ 20 ರವರೆಗೆ ಪಂಜಾಬ್ನಲ್ಲಿ ಮಾರುವೇಷದಲ್ಲಿ ತಿರುಗಾಡುತ್ತಿದ್ದ ಹಾಗೂ ಪಂಜಾಬ್ನಿಂದ ಆತ ತಪ್ಪಿಸಿಕೊಳ್ಳಲು ಪಾಪಲ್ಪ್ರೀತ್ ಸಿಂಗ್ ಮತ್ತು ಬಲ್ಜಿತ್ ಕೌರ್ ಸಹಾಯ ಪಡೆದಿರುವುದು ಈಗ ಸಿಸಿಟಿವಿ ದೃಶ್ಯಗಳಿಂದ ಸ್ಪಷ್ಟವಾಗಿದೆ. ಆ ಬಗೆಗಿನ ಸಿಸಿಟಿವಿ ವೀಡಿಯೋಗಳು ಈಗ ಬಯಲಿಗೆ ಬಂದಿವೆ.
ಮಾರ್ಚ್ 18 ರಂದು ಪಂಜಾಬ್ ಪೊಲೀಸರು ವಾರಿಸ್ ಪಂಜಾಬ್ ದಿ ಸಂಘಟನೆಯ ಮುಖ್ಯಸ್ಥ ಅಮೃತ್ಪಾಲ್ ಸಿಂಗ್ ಹಾಗೂ ಆತನ ಸಹಚರರನ್ನು ಬಂಧಿಸುವ ಸಲುವಾಗಿ ಕಾರ್ಯಾಚರಣೆ ಕೈಗೊಳ್ಳಲಾಗಿತ್ತು. ಈ ವೇಳೆ ಅಮೃತ್ಪಾಲ್ ಸಿಂಗ್ ಪೊಲೀಸರ ಕೈಗೆ ಸಿಗದೆ ಪರಾರಿಯಾಗಿದ್ದನು. ಆತನ ಕೆಲವು ಬೆಂಬಲಿಗರನ್ನು ಪೊಲೀಸರು ವಶಕ್ಕೆ ಪಡೆದಿದ್ದರು. ಆದರೆ ಆತನ ತಂದೆ ಮಾತ್ರ ತಮ್ಮ ಮಗನನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ಹೇಳಿಕೆ ನೀಡಿದ್ದರು. ಆದರೆ ಅಮೃತ್ಪಾಲ್ ಸಿಂಗ್ ಪರಾರಿಯಾಗಿದ್ದಾನೆ, ತಲೆಮರೆಸಿಕೊಂಡು ಓಡಾಡುತ್ತಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದರು.
ಸಹಚರರಿಂದ ತಪ್ಪಿಸಿಕೊಳ್ಳಲು ಸಹಾಯ: ಮಾರ್ಚ್ 18 ರ ರಾತ್ರಿಯ ಸಿಸಿಟಿವಿ ವಿಡಿಯೋ ಹೊರಬಂದಿದೆ. ಈ ವಿಡಿಯೋದಲ್ಲಿ ಅಮೃತ್ಪಾಲ್ಗೆ ತಪ್ಪಿಕೊಳ್ಳಲು ಅವನ ಸಹಚರ ಪಾಪಲ್ ಪ್ರೀತ್ ಸಹಾಯ ಮಾಡಿರುವುದು ಬಯಲಾಗಿದೆ. ಲುಧಿಯಾನ ರಸ್ತೆಯಲ್ಲಿ ಅಮೃತ್ಪಾಲ್ ಸಿಂಗ್ ಮತ್ತು ಸಹಚರ ಪಾಪಲ್ಪ್ರೀತ್ ಸಿಂಗ್ ಕಾಣಿಸಿಕೊಂಡಿದ್ದಾರೆ. ಗುಲಾಬಿ ಬಣ್ಣದ ಪೇಟ ಧರಿಸಿದ ಅಮೃತ್ಪಾಲ್ ರಸ್ತೆಯಲ್ಲಿ ಕಾಣಿಸಿಕೊಂಡಿದ್ದಾನೆ. ಸ್ಕೂಟಿ ಸವಾರನೊಬ್ಬನ ಬಳಿ ಫಿಲ್ಲೌರ್ನಿಂದ ಲಡೋವಲ್ನ ಕಚ್ಚಾರಸ್ತೆವರೆಗೆ ಲಿಫ್ಟ್ ತೆಗೆದುಕೊಂಡು ಬಂದು ತಲುಪಿದ್ದಾನೆ.
ಇಲ್ಲೂ ಸಿಸಿಟಿವಿ ಕ್ಯಾಮರಾದಲ್ಲಿ ಈತ ಕಾಣಿಸಿಕೊಂಡಿದ್ದಾನೆ. ಸಿಸಿಟಿವಿ ವಿಡಿಯೋದಲ್ಲಿ ಇಬ್ಬರ ಜೊತೆ ಮೂರನೇ ವ್ಯಕ್ತಿಯೂ ಕಾಣಿಸಿಕೊಂಡಿದ್ದು, ಆತನ ಗುರುತು ಪತ್ತೆಯಾಗಿಲ್ಲ. ಅಮೃತಪಾಲ್ ಸಿಂಗ್ ಲಾಡೋವಾಲ್‌ನಿಂದ ಜಲಂಧರ್ ಬೈಪಾಸ್‌ಗೆ ಆಟೋದಲ್ಲಿ ತೆರಳಿ, ಅಲ್ಲಿಂದ ಶೇರ್ಪುರ್ ಚೌಕ್‌ಗೆ ಆಟೋದಲ್ಲಿ ತೆರಳಿದ್ದನು ಎಂದು ಹೇಳಲಾಗುತ್ತಿದೆ. ಅಮೃತಪಾಲ್ ಪಾಪಲ್ಪ್ರೀತ್ ಜೊತೆ ಬಸ್ಗೆ ಸಮೀಪಿಸುತ್ತಿರುವ ವಿಡಿಯೋ ಕೂಡ ಶೇರ್ಪುರ್ ಚೌಕ್ನಲ್ಲಿ ಬೆಳಕಿಗೆ ಬಂದಿದೆ.
ಬಿಳಿ ಬಣ್ಣದ ಆಕ್ಟಿವಾದಲ್ಲಿ ತೆರಳಿದ ಅಮೃತ್ಪಾಲ್: ಮಾಧ್ಯಮ ವರದಿಗಳ ಪ್ರಕಾರ, ಪಟಿಯಾಲ ರಸ್ತೆಯಲ್ಲಿರುವ ಗುರುದ್ವಾರ ಸಹರ್ ನಿವಾರನ್ ಸಾಹಿಬ್ ಬಳಿ ಅಮೃತಪಾಲ್ ಸಿಂಗ್ ಕಾಣಿಸಿಕೊಂಡಿದ್ದಾನೆ. ಸ್ಕೂಟಿಯಲ್ಲಿ ಬಂದ ಅಮೃತ್ಪಾಲ್ ಗುರುತು ಪತ್ತೆಯಾಗದಂತೆ ಮುಖಕ್ಕೆ ಮಾಸ್ಕ್ ಹಾಕಿಕೊಂಡಿದ್ದನು. ಫೋಟೋದಲ್ಲಿ ಅಮೃತ್ಪಾಲ್ ಒಂದು ಕೈಯಲ್ಲಿ ಕಪ್ಪು ಚೀಲವನ್ನು ಹಿಡಿದುಕೊಂಡಿರುವುದು ಕಾಣಿಸುತ್ತಿದೆ. ಆತನ ಜೊತೆ ಇದ್ದ ಸಹಚರ ಪಾಪಲ್ಪ್ರೀತ್ ಸಿಂಗ್ ಕಪ್ಪು ಜೀನ್ಸ್ನಲ್ಲಿ ಕಾಣಿಸಿಕೊಂಡಿದ್ದನು.
ಪಾಪಲ್ಪ್ರೀತ್ ಕೂಡ ತನ್ನ ಚಹರೆಯನ್ನು ಮರೆಮಾಚಲು ನೈಸರ್ಗಿಕ ಗಡ್ಡದ ಬದಲು ಕೃತಕ ಗಡ್ಡವನ್ನು ಕಟ್ಟಿಕೊಂಡಿದ್ದನು. ಪೊಲೀಸರು ಹೇಳುವಂತೆ ಅಮೃತ್ಪಾಲ್ ಸಿಂಗ್ ತನ್ನ ಸಹಚರ ಪಾಪಲ್ಪ್ರೀತ್ ಸಿಂಗ್ ಜೊತೆ ಶಹಾಬಾದ್ನ ಸಿದ್ಧಾರ್ಥ್ ಕಾಲೊನಿಯಲ್ಲಿ ಒಂದು ದಿನ ತಂಗಿದ್ದನು. ಅಮೃತ್ ಪಾಲ್ ಹಾಗೂ ಸಹಚರ ಪಾಪಲ್ಪ್ರೀತ್ ಬಿಳಿ ಬಣ್ಣದ ಆ್ಯಕ್ಟಿವಾದಲ್ಲಿ ಶಹಾದಾಬಾದ್ ತಲುಪಿದ್ದು, ಮರುದಿನ ಅಲ್ಲಿಂದ ಬಲ್ಜಿತ್ ಕೌರ್ ಅದೇ ಆ್ಯಕ್ಟಿವಾದಲ್ಲಿ ಪಟಿಯಾಲದಲ್ಲಿ ಬಿಟ್ಟಿದ್ದಾನೆ. ಈ ದೃಶ್ಯಗಳೆಲ್ಲವೂ ಸಮೀಪದ ಸಿಸಿಟಿವಿ ಕ್ಯಾಮರಾಗಳಲ್ಲಿ ಸೆರೆಯಾಗಿದ್ದು, ಎಲ್ಲವೂ ಈಗ ಬೆಳಕಿಗೆ ಬಂದಿದೆ.
ಇದನ್ನೂ ಓದಿ: ಪರಾರಿಯಾಗಲು ಮರ್ಸಿಡಿಸ್ ಬೆಂಜ್, ಎಸ್‌ಯುವಿ ಕಾರು, ಬೈಕ್‌ ಬಳಸಿದ ಅಮೃತ್ಪಾಲ್!
