ಉಜ್ಜಯಿನಿ(ಮಧ್ಯಪ್ರದೇಶ): ಕರ್ನಾಟಕದ ಹಿಜಾಬ್- ಕೇಸರಿ ಸಂಘರ್ಷ ದೇಶದಲ್ಲಿಯೇ ಸದ್ದು ಮಾಡುತ್ತಿದೆ. ಈ ಸಂಘರ್ಷದ ಬಿಸಿ ಮಧ್ಯಪ್ರದೇಶಕ್ಕೂ ತಾಕಿದ್ದು, ಇಲ್ಲಿನ ಚುನಾವಣಾ ಆಯೋಗದ ಕಚೇರಿಗೆ ಅಪರಿಚಿತ ಗುಂಪೊಂದು ಹಿಜಾಬ್ ಪರವಾದ ವಿವಾದಾತ್ಮಕ ಘೋಷವಾಕ್ಯವುಳ್ಳ ಪೋಸ್ಟರ್ ಅಂಟಿಸಿದೆ.
'ತಮ್ಮ ಹೆಣ್ಣು ಮಕ್ಕಳನ್ನು ಮಾರುಕಟ್ಟೆಯ ಮೂಲಕ ಅರೆಬೆತ್ತಲೆಯಾಗಿ ಮೆರವಣಿಗೆ ಮಾಡುವವರಿಗೆ ಹಿಜಾಬ್‌ನ ಮಹತ್ವ ತಿಳಿದಿಲ್ಲ. ಇದು ಗೌರವಾನ್ವಿತ ಮಹಿಳೆಯ ಮರ್ಯಾದೆಯ ಸಂಕೇತವಾಗಿದೆ. ನಿಮ್ಮ ಮಹಿಳೆಯರಿಗೆ ಇದನ್ನು ಧರಿಸುವ ಭಾಗ್ಯವಿಲ್ಲ ಎಂದು ಹಿಂದು ಮಹಿಳೆಯರನ್ನು ಹೀಯಾಳಿಸುವ ರೀತಿ ಪೋಸ್ಟರ್ನಲ್ಲಿ ಬರೆಯಲಾಗಿದೆ. ಇದರ ಜೊತೆಗೆ 'ನಾರಾ-ಎ- ತಕ್ಬೀರ್ ಅಲ್ಲಾಹು ಅಕ್ಬರ್' ಎಂಬ ಧಾರ್ಮಿಕ ಘೋಷಣೆ ಮೊಳಗಿಸಲಾಗಿದೆ.
ಕೋಮು ಪ್ರಚೋದನೆ ನೀಡುವ ಬರಹವುಳ್ಳ ಪೋಸ್ಟರ್ ಬಗ್ಗೆ ಮಾಹಿತಿ ತಿಳಿದ ತಕ್ಷಣವೇ ಸ್ಥಳಕ್ಕೆ ಆಗಮಿಸಿದ ಸ್ಥಳೀಯ ಪೊಲೀಸ್ ಅಧಿಕಾರಿಗಳು ಪೋಸ್ಟರ್ ಅನ್ನು ತೆಗೆದು ಹಾಕಿ, ಪೋಸ್ಟರ್ ಅಂಟಿಸಿದ ದುಷ್ಕರ್ಮಿಗಳ ವಿರುದ್ಧ ಭಾರತೀಯ ದಂಡ ಸಂಹಿತೆ (ಐಪಿಸಿ) ಸೆಕ್ಷನ್ 294 ಮತ್ತು 505 ರ ಅಡಿ ಪ್ರಕರಣ ದಾಖಲಿಸಲಾಗಿದೆ. ಅಲ್ಲದೇ, ಪೋಸ್ಟರ್ ಅಂಟಿಸಿದ ದುಷ್ಕರ್ಮಿಗಳ ಪತ್ತೆಗೆ ಆ ಪ್ರದೇಶದಲ್ಲಿನ ಸಿಸಿಟಿವಿ ಕ್ಯಾಮೆರಾಗಳನ್ನು ಪರಿಶೀಲನೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಓದಿ: ಅಸ್ಸೋಂ - ರಾಜಸ್ಥಾನ ಪ.ಬಂಗಾಳದಲ್ಲಿ ಮೇಲ್ಮನೆ ರಚನೆಗೆ ಅಸ್ತು..17 ನ್ಯಾಯಮೂರ್ತಿಗಳ ನೇಮಿಸಿ ರಾಷ್ಟ್ರಪತಿ ಆದೇಶ
