ನವದೆಹಲಿ: ತಮ್ಮ ವಿಮಾನಗಳಲ್ಲಿ ಕೋವಿಡ್ ನಿಯಮಾವಳಿಗಳನ್ನು ಅನುಸರಿಸದ ಏಳು ಮಂದಿ ಪ್ರಯಾಣಿಕರನ್ನು ಈವರೆಗೆ ಅಲೈಯನ್ಸ್ ಏರ್, ಇಂಡಿಗೊ ಮತ್ತು ಏರ್ ಏಷ್ಯಾ ವಿಮಾನಯಾನ ಸಂಸ್ಥೆಗಳು ಕೆಳಗಿಳಿಸಿವೆ.
ಸಿಬ್ಬಂದಿ ಎಚ್ಚರಿಕೆ ನೀಡಿದ ಬಳಿಕವೂ ವಿಮಾನದೊಳಗೆ ಸರಿಯಾಗಿ ಮಾಸ್ಕ್ ಧರಿಸಿದ ಕಾರಣ ಅಲೈಯನ್ಸ್ ಏರ್ ವಿಮಾನದಿಂದ ನಾಲ್ವರು ಹಾಗೂ ಅಲೈಯನ್ಸ್ ಏರ್, ಇಂಡಿಗೊ ವಿಮಾನದಿಂದ ಮೂವರನ್ನು ಡಿ-ಬೋರ್ಡ್ ಮಾಡಲಾಗಿದೆ ಎಂದು ಕೇಂದ್ರ ನಾಗರಿಕ ವಿಮಾನಯಾನ ಮಹಾ ನಿರ್ದೇಶಕರು (ಡಿಜಿಸಿಎ) ತಿಳಿಸಿದ್ದಾರೆ.
ಇದನ್ನೂ ಓದಿ: ಕೋವಿಡ್ ನಿಯಮ ಉಲ್ಲಂಘಿಸಿದವರನ್ನ ವಿಮಾನದಿಂದ ಕೆಳಗಿಳಿಸಲಾಗುವುದು: ಡಿಜಿಸಿಎ ಎಚ್ಚರಿಕೆ
ಮಾರ್ಚ್ 13ರಂದು ವಿಮಾನದ ಒಳಗೆ ಪ್ರಯಾಣಿಕರು ಕೊರೊನಾ ನಿಯಮಾವಳಿಗಳನ್ನು ಪಾಲಿಸದಿದ್ದರೆ ಅಂತವರನ್ನು ವಿಮಾನ ಹೊರಡುವ ಮುನ್ನವೇ ಕೆಳಗಿಳಿಸಲಾಗುವುದು ಎಂದು ಡಿಜಿಸಿಎ ಎಚ್ಚರಿಕೆ ನೀಡಿದ್ದರು.
ವಿಮಾನದೊಳಗೆ ಮಾತ್ರವಲ್ಲ ವಿಮಾನ ನಿಲ್ದಾಣಕ್ಕೆ ಪ್ರವೇಶಿಸಿದ ನಂತರ ಆವರಣದಲ್ಲಿ ಪ್ರಯಾಣಿಕರು ಮಾಸ್ಕ್ ಸರಿಯಾಗಿ ಧರಿಸದೇ ಇದ್ದರೆ, ಧರಿಸಲು ನಿರಾಕರಿಸಿದರೆ, ದೈಹಿಕ ಅಂತರ ಕಾಯ್ದುಕೊಳ್ಳದಿದ್ದರೆ ಅವರನ್ನು 'ಅಶಿಸ್ತಿನ ಪ್ರಯಾಣಿಕ' ಎಂದು ಪರಿಗಣಿಸಲಾಗುವುದು ಎಂದು ಸುತ್ತೋಲೆ ಹೊರಡಿಸಲಾಗಿತ್ತು.
