ಲಕ್ನೋ: ಐದು ವರ್ಷಗಳ ಹಿಂದೆ ನಾಪತ್ತೆಯಾಗಿದ್ದ 23 ವರ್ಷದ ಬುಡಕಟ್ಟು ಯುವತಿಯೊಬ್ಬಳು ಆಧಾರ್ ಕಾರ್ಡ್ ಡೇಟಾಬೇಸ್ ಸಹಾಯದಿಂದ ಜಾರ್ಖಂಡ್‌ನಲ್ಲಿದ್ದ ತನ್ನ ಕುಟುಂಬದೊಂದಿಗೆ ಮತ್ತೆ ಸೇರಿಕೊಂಡಿದ್ದಾಳೆ.
ಜಾರ್ಖಂಡ್‌ನ ದಿನಗೂಲಿ ಕಾರ್ಮಿಕನ ಪುತ್ರಿ ರಶ್ಮಣಿ ಎಂಬಾಕೆಯನ್ನು 2017 ರಲ್ಲಿ ಏಜೆಂಟ್‌ ಒಬ್ಬಾತ ದೆಹಲಿಯಲ್ಲಿ ಕೆಲಸ ಕೊಡಿಸುವುದಾಗಿ ಭರವಸೆ ನೀಡಿ ಕರೆದೊಯ್ದಿದ್ದ. ಯುವತಿಯ ಕುಟುಂಬ ಆರ್ಥಿಕ ಸಂಕಷ್ಟದಲ್ಲಿದ್ದುದರಿಂದ ಕುಟುಂಬಸ್ಥರು ಯುವತಿಯನ್ನು ಕರೆದೊಯ್ಯಲು ಒಪ್ಪಿಗೆ ನೀಡಿದ್ದರು.
ಆದರೆ ಏಜೆಂಟ್‌ನೊಂದಿಗೆ ರೈಲು ಹತ್ತಿದ ನಂತರ ರಶ್ಮಣಿಗೆ ಏನೋ ಅಪಾಯ ಕಾದಿದೆ ಎನಿಸಿತ್ತು. ಹೀಗಾಗಿ ಆಕೆ ಫತೇಪುರ್ ನಿಲ್ದಾಣದಲ್ಲಿ ಇಳಿದು ಆತನಿಂದ ತಪ್ಪಿಸಿಕೊಂಡಿದ್ದಳು. ನಂತರ ರೈಲ್ವೆ ಪೊಲೀಸರು ಆಕೆಯನ್ನು ರಕ್ಷಿಸಿ ಆಶ್ರಯಧಾಮದಲ್ಲಿ ಇರಿಸಿದ್ದರು. ಅಲ್ಲಿ ಆಕೆಗೆ ರಾಶಿ ಎಂದು ಹೆಸರಿಡಲಾಗಿತ್ತು.
ಯುವತಿಯ ಊರು, ವಿಳಾಸ ಪತ್ತೆಯಾಗದ ಕಾರಣದಿಂದ ಪೊಲೀಸರು ಅವಳನ್ನು ಅಲಹಾಬಾದ್‌ನಲ್ಲಿರುವ ಮಹಿಳಾ ಆಶ್ರಯ ಮನೆಗೆ ಕಳುಹಿಸಿದ್ದರು.
ಆದರೆ ಯುವತಿ ಮತ್ತೆ ತನ್ನ ಕುಟುಂಬದೊಂದಿಗೆ ಸೇರಿದ ಬಗ್ಗೆ ಮಾತನಾಡಿದ ಲಕ್ನೋದ ಮಹಿಳಾ ಆಶ್ರಯಧಾಮದ ಸೂಪರಿಂಟೆಂಡೆಂಟ್ ಆರತಿ ಸಿಂಗ್, ಜುಲೈನಲ್ಲಿ ಆಕೆಯನ್ನು ಪುನರ್ವಸತಿಗಾಗಿ ಲಕ್ನೋಗೆ ಕರೆತರಲಾಗಿತ್ತು. ನಾವು ಅವಳಿಗೆ ಆಧಾರ್ ಕಾರ್ಡ್ ಕೊಡಿಸುವ ಸಲುವಾಗಿ ಅರ್ಜಿ ಸಲ್ಲಿಸಿದ್ದೆವು. ಆದರೆ ಆಧಾರ್ ಅರ್ಜಿ ತಿರಸ್ಕೃತವಾಗಿತ್ತು. ಆರನೇ ಪ್ರಯತ್ನದಲ್ಲಿ ಆಕೆಯ ಹೆಸರಲ್ಲಿ ಆಧಾರ್ ಈಗಾಗಲೇ ಇರುವುದು ಪತ್ತೆಯಾಗಿತ್ತು. ಈ ಮೂಲಕ ಆಕೆಯ ಮೂಲ ವಿಳಾಸ ಪತ್ತೆಹಚ್ಚಲಾಯಿತು ಎಂದು ತಿಳಿಸಿದರು.
ಅಂತಿಮವಾಗಿ ಪೊಲೀಸರು ರಶ್ಮಣಿಯನ್ನು ಜಾರ್ಖಂಡ್‌ಗೆ ಕರೆದೊಯ್ದು ಆಕೆಯ ಕುಟುಂಬದೊಂದಿಗೆ ಮತ್ತೆ ಸೇರಿಸಿದ್ದಾರೆ.
