ರಾಯ್ಪುರ್ (ಛತ್ತೀಸ್ಗಢ): ಕೊರೊನಾ ಅಲೆಯಲ್ಲಿ ಜನ ಸಾಮಾನ್ಯರ ಜೀವನ ಅಕ್ಷರಶಃ ನರಕದಂತಾಗಿದೆ. ಹೀಗಿರುವಾಗ ಲಾಕ್ಡೌನ್ನಿಂದ ಇನ್ನಷ್ಟು ಸಂಕಷ್ಟದ ಸ್ಥಿತಿಗೆ ತಲುಪಿದ್ದಾರೆ. ಇನ್ನೊಂದೆಡೆ ಕೊರೊನಾ ತಡೆಗೆ ಎಂದು ಪೊಲೀಸರು ಹಗಲಿರುಳು ದುಡಿಯುತ್ತಿದ್ದಾರೆ. ಅಲ್ಲದೇ ಜನರ ಹಸಿವು ನೀಗಿಸುವ ಕಾರ್ಯಕ್ಕೂ ಈಗ ಪೊಲೀಸರು ಮುಂದಾಗಿದ್ದು, ಇದಕ್ಕಾಗಿ ರಾಯ್ಪುರದ ಗೋಕುಲ್ ನಗರದಲ್ಲಿ ‘ಖಾನಾ ಚೌಕಿ’ ಎಂಬ ವಿನೂತನ ಕಾರ್ಯಕ್ರಮ ಹಮ್ಮಿಕೊಂಡಿದ್ದಾರೆ.
ಲಾಕ್ಡೌನ್ನಿಂದ ಆಹಾರ ಸಿಗದ ಜನತೆಗೆ ಪೊಲೀಸರು ಆಹಾರ ತಯಾರಿಸಿ ಹಂಚುವ ಕಾರ್ಯ ಮಾಡುತ್ತಿದ್ದಾರೆ. ಬೆಳಗ್ಗೆ ಹಾಗೂ ಸಂಜೆ ಎರಡು ಹೊತ್ತು ಬಡವರ ಹೊಟ್ಟೆ ತುಂಬಿಸುತ್ತಿದ್ದಾರೆ. ಈ ಕಾರ್ಯದಲ್ಲಿ 10ಕ್ಕೂ ಹೆಚ್ಚು ಪೊಲೀಸರು ನಿತ್ಯ ತೊಡಗಿಕೊಂಡಿದ್ದು, ಆಹಾರದ ಅಗತ್ಯ ಇರುವರ ಬಳಿ ತೆರಳಿ ವಿತರಣೆ ಮಾಡುತ್ತಿದ್ದಾರೆ.
ಮೇ ಮೊದಲ ವಾರದಲ್ಲಿ ಪೊಲೀಸ್ ಕಾನ್ಸ್ಸ್ಟೇಬಲ್ ಮಹೇಶ್ ನೇತಮ್ ಹಾಗೂ ಇತರ ಸಿಬ್ಬಂದಿ ಸೇರಿ ಮೊದಲ ಖಾನಾ ಚೌಕಿ ಆರಂಭಿಸಿದರು.
ಮೊದ ಮೊದಲು ತನ್ನ ಸ್ವಂತ ಖರ್ಚಿನಲ್ಲಿ ಸಣ್ಣ ಪ್ರಮಾಣದಲ್ಲಿ ಈ ಕಾರ್ಯಕ್ಕೆ ಪೊಲೀಸ್ ಸಿಬ್ಬಂದಿ ಕೈ ಹಾಕಿದ್ದರು. ಬಳಿಕ ಇತರ ಸಿಬ್ಬಂದಿಯೂ ಕೈಜೋಡಿಸಲು ಆರಂಭಿಸಿದರು. ಠಾಣೆಯ ಉನ್ನತ ಅಧಿಕಾರಿಗಳು ಮೆಚ್ಚುಗೆ ವ್ಯಕ್ತಪಡಿಸಿ ಈ ಕಾರ್ಯಕ್ಕೆ ಬೆನ್ನೆಲುಬಾಗಿ ನಿಂತರು.
ಈ ಖಾನಾ ಚೌಕಿಯಲ್ಲಿ ಕೋವಿಡ್ ಮುಂಜಾಗೃತೆ ತೆಗೆದುಕೊಂಡು ಆಹಾರ ತಯಾರಾಗುತ್ತದೆ. ಸ್ವಚ್ಛತೆಯ ಜೊತೆಗೆ ದೈಹಿಕ ಅಂತರ ಹಾಗೂ ಸಿಬ್ಬಂದಿ ಕೈಗಳಿಗೆ ಗ್ಲೌಸ್ ಬಳಕೆ ಮಾಡಿ ಅಡುಗೆ ಕಾರ್ಯ ಮಾಡುತ್ತಾರೆ.
ಬೆಳಗ್ಗೆ 8ರಿಂದ 11 ಗಂಟೆಯ ವರೆಗೆ ಆಹಾರ ನೀಡಿದರೆ, ಸಂಜೆ 4ರಿಂದ 7ಗಂಟೆಯ ವರೆಗೆ ಆಹಾರ ನೀಡುತ್ತಾರೆ. ಆಹಾರ ಸಿದ್ದಗೊಂಡ ಬಳಿಕ ನಗರದಲ್ಲಿ ಸುತ್ತಾಡಿ ವಿತರಣೆ ಕಾರ್ಯವನ್ನೂ ಇವರೇ ಮಾಡುತ್ತಾರೆ. ಒಟ್ಟಾರೆ ಲಾಕ್ಡೌನ್ನಲ್ಲಿ ಲಾಠಿ ಹಿಡಿದು ನಿಲ್ಲುತ್ತಿದ್ದ ಪೊಲೀಸರು ಹಸಿದವರ ಪಾಲಿಗೆ ಅನ್ನದಾತರಾಗಿದ್ದು, ಜನರ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.
