ಬೆಂಗಳೂರು : ತ್ವರಿತವಾಗಿ ಸಾಲ ನೀಡುವ ಹಲವಾರು ಆ್ಯಪ್ಗಳು ಗೂಗಲ್ ಪ್ಲೇ ಸ್ಟೋರ್ನಲ್ಲಿರುವುದು ಅನೇಕರಿಗೆ ಗೊತ್ತಿರುವ ವಿಚಾರ. ಆದರೆ ಅಂಥ ಎಲ್ಲ ಆ್ಯಪ್ಗಳೂ ಅಧಿಕೃತ ಆ್ಯಪ್ಗಳಲ್ಲ ಎಂಬುದು ಮಾತ್ರ ಅನೇಕರಿಗೆ ಗೊತ್ತಿಲ್ಲ. ಇಂಥ ಆ್ಯಪ್ಗಳ ಹಿನ್ನೆಲೆಯನ್ನು ಸರಿಯಾಗಿ ಪರಿಶೀಲನೆ ಮಾಡದೆ ವಿವೇಚನಾರಹಿತರಾಗಿ ಸಾಲ ಪಡೆದುಕೊಂಡಿದ್ದೇ ಆದಲ್ಲಿ ನೀವು ಭವಿಷ್ಯದಲ್ಲಿ ಸುಖಾಸುಮ್ಮನೆ ಸಮಸ್ಯೆಗಳಿಗೆ ಸಿಲುಕಬಹುದು. ಇಂಥ ವಂಚನೆಯ ಆ್ಯಪ್ಗಳಿಂದ ಗ್ರಾಹಕರನ್ನು ರಕ್ಷಿಸುವ ಸಲುವಾಗಿ ಗೂಗಲ್ ಭಾರತದಲ್ಲಿ 2022ನೇ ಸಾಲಿನಲ್ಲಿ 3500ಕ್ಕೂ ಹೆಚ್ಚು ಆ್ಯಪ್ಗಳ ವಿರುದ್ಧ ಕ್ರಮ ಕೈಗೊಂಡಿದೆ ಎಂದು ಪ್ಲೇ ಪ್ರೊಟೆಕ್ಟ್ ರಿಪೋರ್ಟ್ನಲ್ಲಿ ತಿಳಿಸಲಾಗಿದೆ. ಪ್ಲೇ ಸ್ಟೋರ್ನ ನಿಯಮಗಳನ್ನು ಪಾಲಿಸದ ಕಾರಣಕ್ಕೆ ಇವುಗಳನ್ನು ಸ್ಟೋರ್ನಿಂದ ತೆಗೆದುಹಾಕಲಾಗಿದೆ.
2021 ರಲ್ಲಿ ವೈಯಕ್ತಿಕ ಸಾಲಗಳನ್ನು ನೀಡುವುದನ್ನು ಒಳಗೊಂಡಂತೆ ಭಾರತದಲ್ಲಿ ಹಣಕಾಸು ಸೇವೆಗಳ ಅಪ್ಲಿಕೇಶನ್‌ಗಳಿಗಾಗಿ Google ತನ್ನ ನಿಯಮಾವಳಿಗಳನ್ನು ಬದಲಾಯಿಸಿದೆ. ಈ ನೀತಿಯು ಸೆಪ್ಟೆಂಬರ್ 2021 ರಲ್ಲಿ ಜಾರಿಗೆ ಬಂದಿತು. ಜನರಿಗೆ ಸಾಲ ಬಟವಾಡೆ ಮಾಡಲು ಇಚ್ಛಿಸುವ ಆ್ಯಪ್ಗಳು ಅದಕ್ಕಾಗಿ ಭಾರತೀಯ ರಿಸರ್ವ್ ಬ್ಯಾಂಕ್ನಿಂದ ಲೈಸೆನ್ಸ್ ಪಡೆದಿರಬೇಕು ಹಾಗೂ ಅಂಥ ಲೈಸೆನ್ಸ್ನ ಕಾಪಿಯೊಂದನ್ನು ಗೂಗಲ್ಗೆ ಸಲ್ಲಿಬೇಕೆಂದು ನಿಯಮ ಮಾಡಲಾಯಿತು. ಒಂದು ವೇಳೆ ಆ್ಯಪ್ ನಿರ್ವಾಹಕರು ಅಂಥ ಪರವಾನಗಿ ಹೊಂದಿಲ್ಲದಿದ್ದರೆ, ಪರವಾನಗಿ ಹೊಂದಿರುವ ಕಂಪನಿಗೆ ಮಾತ್ರ ಅವರು ಪ್ಲಾಟ್ಫಾರ್ಮ್ ಆಗಿ ಕೆಲಸ ಮಾಡಬಹುದು. ಅಲ್ಲದೆ ಆ್ಯಪ್ ಡೆವಲಪರ್ ಅಕೌಂಟ್ ಹೆಸರು ಅವರ ನೋಂದಾಯಿತ ವ್ಯಾಪಾರ ಪರವಾನಿಗೆಯಲ್ಲಿನ ಹೆಸರಿಗೆ ಹೊಂದಾಣಿಕೆಯಾಗಬೇಕು.
2022 ರಲ್ಲಿ, ಬ್ಯಾಂಕಿಂಗ್ ಅಲ್ಲದ ಹಣಕಾಸು ಕಂಪನಿಗಳು (NBFC ಗಳು) ಮತ್ತು ಬ್ಯಾಂಕ್‌ಗಳಿಗೆ ಫೆಸಿಲಿಟೇಟರ್‌ಗಳಾಗಿ ವೈಯಕ್ತಿಕ ಸಾಲಗಳನ್ನು ನೀಡುವ ಅಪ್ಲಿಕೇಶನ್ ಡೆವಲಪರ್‌ಗಳಿಗೆ ಗೂಗಲ್ ಮತ್ತಷ್ಟು ನಿಯಮಗಳನ್ನು ಜಾರಿಗೊಳಿಸಿತು. ಈ ಡೆವಲಪರ್‌ಗಳು ತಮ್ಮ ಪಾಲುದಾರ NBFC ಗಳು ಮತ್ತು ಬ್ಯಾಂಕ್‌ಗಳ ಹೆಸರನ್ನು ಅಪ್ಲಿಕೇಶನ್‌ನ ವಿವರಣೆಯಲ್ಲಿ ಬಹಿರಂಗಪಡಿಸಬೇಕು ಮತ್ತು ಅವರು ಅಧಿಕೃತ ಏಜೆಂಟ್‌ಗಳೆಂದು ಪಟ್ಟಿ ಮಾಡಲಾದ ಆಯಾ ವೆಬ್‌ಸೈಟ್‌ಗಳಿಗೆ ಲೈವ್ ಲಿಂಕ್ ಅನ್ನು ಒದಗಿಸಬೇಕು ಎಂದು ನಿಯಮ ಮಾಡಲಾಯಿತು. ಇದು ಪರ್ಸನಲ್ ಲೋನ್ ಆ್ಯಪ್ ಡಿಕ್ಲರೇಷನ್ನ ಭಾಗವಾಗಿತ್ತು.
ಪ್ರಸ್ತುತ ಪ್ಲೇ ಸ್ಟೋರ್ ನೀತಿ ನಿಯಮಗಳನ್ನು ಉಲ್ಲಂಘಿಸಿದ್ದಕ್ಕಾಗಿ 2022 ರಲ್ಲಿ ಭಾರತದಲ್ಲಿ 3,500 ಕ್ಕೂ ಹೆಚ್ಚು ಸಾಲದ ಆ್ಯಪ್ಗಳ ವಿರುದ್ಧ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಗೂಗಲ್ ಗುರುವಾರ ಹೇಳಿದೆ. ಗೂಗಲ್ ಪ್ಲೇನಲ್ಲಿ ನಿಯಮಾವಳಿಗಳನ್ನು ಪಾಲಿಸದ 1.43 ಮಿಲಿಯನ್ ಅಪ್ಲಿಕೇಶನ್‌ಗಳನ್ನು ಅಪ್‌ಲೋಡ್ ಮಾಡುವುದನ್ನು ತಡೆಯಲಾಗಿದೆ ಮತ್ತು ದುರುದ್ದೇಶದ 1,73,000 ಖಾತೆಗಳನ್ನು ನಿರ್ಬಂಧಿಸಲಾಗಿದೆ ಎಂದು ಗೂಗಲ್ ಹೇಳಿದೆ.
ಈ ತಿಂಗಳ ಆರಂಭದಲ್ಲಿ, ಗೂಗಲ್ ವೈಯಕ್ತಿಕ ಸಾಲಗಳಿಗೆ ಸಂಬಂಧಿಸಿದಂತೆ ತನ್ನ ನೀತಿ ನಿಯಮಗಳನ್ನು ಮಾರ್ಪಡಿಸಿತ್ತು. ವೈಯಕ್ತಿಕ ಸಾಲಗಳನ್ನು ಒದಗಿಸುವ ಅಥವಾ ಒದಗಿಸುವಲ್ಲಿ ಸಹಾಯ ಮಾಡುವ ಅಪ್ಲಿಕೇಶನ್‌ಗಳು ಬಳಕೆದಾರರ ಸೂಕ್ಷ್ಮ ಮಾಹಿತಿಗೆ ಸೀಮಿತ ಪ್ರವೇಶವನ್ನು ಹೊಂದಿರುತ್ತದೆ ಎಂದು ಘೋಷಿಸಿತ್ತು. ಬಳಕೆದಾರರ ಕಾಂಟ್ಯಾಕ್ಟ್ ಲಿಸ್ಟ್, ಲೊಕೇಶನ್, ಫೋಟೋಗಳು, ವೀಡಿಯೊಗಳು, ಫೈಲ್‌ಗಳು ಅಥವಾ ಕರೆ ಲಾಗ್‌ಗಳನ್ನು ಇನ್ನು ಮುಂದೆ ಲೋನ್ ಆ್ಯಪ್ಗಳಿಗೆ ಸಿಗದಂತೆ ಮಾಡಲಾಗಿದೆ. ಪರಿಷ್ಕೃತ ನೀತಿಯು 31 ಮೇ 2023 ರಂದು ಜಾರಿಗೆ ಬರಲಿದೆ.
ಇದನ್ನೂ ಓದಿ: ಪ್ರತಿ ಆರ್ಡರ್ಗೆ 2 ರೂ. ಪ್ಲಾಟ್ಫಾರ್ಮ್ ಫೀ ಜಾರಿಗೊಳಿಸಿದ Swiggy
