ಮಳೆ ತಂದ ಅವಾಂತರ.. ಮುಂಬೈನಲ್ಲಿ ಮನೆ, ಗೋಡೆ, ಗುಡ್ಡ ಕುಸಿದು 21 ಜನ ದುರ್ಮರಣ

ಮುಂಬೈನಲ್ಲಿ ಭಾರೀ ಮಳೆಯ ಪರಿಣಾಮ ಸಂಭವಿಸಿದ ಭೂಕುಸಿತದಲ್ಲಿ ಮೃತಪಟ್ಟವರ ಸಂಖ್ಯೆ 21ಕ್ಕೆ ಏರಿದೆ. ರಕ್ಷಣಾ ಕಾರ್ಯ ಭರದಿಂದ ನಡೆಯುತ್ತಿದೆ. ಅವಶೇಷಗಳ ಅಡಿಯಲ್ಲಿ ಇನ್ನೂ ಹಲವು ಮಂದಿ ಸಿಲುಕಿಕೊಂಡಿದ್ದು, NDRF ಕಾರ್ಯಾಚರಣೆ ನಡೆಸುತ್ತಿದೆ.

ಮುಂಬೈ : ಮಹಾರಾಷ್ಟ್ರದಲ್ಲಿ ಮಳೆ ಆರ್ಭಟ ಜೋರಾಗಿದ್ದು, ಜನರು ಮತ್ತೊಮ್ಮೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ನಗರದ ಮೂರು ಕಡೆಗಳಲ್ಲಿ ಮನೆ, ಗೋಡೆ, ಗುಡ್ಡ ಕುಸಿದು ಬಿದ್ದು ಒಟ್ಟು 21 ಜನ ಮೃತಪಟ್ಟಿದ್ದಾರೆ. ಹಲವರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ನಗರದ ಚೆಂಬೂರಿನ ಭಾರತ್ ನಗರ, ವಿಖ್ರೋಲಿ ಮತ್ತು ಮುಲುಂದ್​ನಲ್ಲಿ ಮನೆ, ಗೋಡೆ ಮತ್ತು ಗುಡ್ಡ ಕುಸಿತ ಸಂಭವಿಸಿದೆ. ಚೆಂಬೂರಿನಲ್ಲಿ 4-5 ಮನೆಗಳು ನೆಲ ಸಮಗೊಂಡಿದ್ದು ಒಟ್ಟು 17 ಮಂದಿ ಮೃತಪಟ್ಟಿದ್ದಾರೆ. ಹಲವರು ಗಾಯಗೊಂಡಿದ್ದು, ಒಟ್ಟು 19 ಜನರನ್ನು ರಕ್ಷಣೆ ಮಾಡಲಾಗಿದೆ.