- उत्तराखंड मा फिर बढ़ी कोरोना की रफ्तार
उत्तराखंड मां धीरे-धीरे कोरोना की रफ्तार एक बार फिर से बढ़ण लग गी. आज कोरोना का 6,054 नया मामला संमणि ऐनी, जैका बाद प्रदेश मां कोरोना संक्रमितुं की संख्यां 1,17, 221ह्ववे गी, जबकि यां से मन्न वालौ की संख्या 2417 च. प्रदेश मा कोरोना संक्रमित मरीजुं की रिकवरी रेट 69.52 % च.
- द्वी हाईटेक लाइफ सपोर्ट एंबुलेंस सीएम आवास बटी रवाना
आज मुख्यमंत्री तीरथ सिंह रावत न नेशनल हाईवे एंड इंफ्रास्ट्रक्चर डेवलपमेंट कारपोरेशन लिमिटेड की ओर से प्रदान द्वी दो बहु-उपयोगी लाइफ सपोर्ट एंबुलेंसुं थै रवाना करी. यु लाइफ सपोर्ट एंबुलेंस चमोली और उत्तरकाशी जनपदुं मा सेवाएं द्याला.कोविड-19 का कारण उपजी विपरीत परिस्थित्यूं मा या लाइफ सपोर्ट एंबुलेंस लोखूं थै काफी लाभकारी च, जैकु फैदा अब जल्द ही लोग उठै साकला.
- देहरादून जिला मा अब मसूरी कई और जगहूं पर भी कर्फ्यू
कोरोना संक्रमण थै रौकणै तीरथ सरकार कड़ा निर्णय लेंणी च. ई कड़ी मा डीएम देहरादून न नगर पालिका परिषद डोईवाला, हरबर्टपुर, विकासनगर और मसूरी मा 29 अप्रैल बटी कर्फ्यू लगौणा आदेश दिनी. देहरादून का यूं इलाकों मा 3 मई तक कोरोना कर्फ्यू रालू. ये दौरान दिन मा द्वी बजी तक दुकान खुली राली. जिलाधिकारी देहरादूनै तरफा बटी कोविड कर्फ्यू का तहत संशोधित आदेश जारी करे गी.
- सरकारी कार्यालय 1 मई तक बंद
उत्तराखंड मा कोरोना का बिगड़दा हालात थै देखी राज्य सरकार न एक मई तक प्रदेश का सबी शासकीय कार्यालयूं थै बंद रखणौ आदेश जारी करेली. सचिव पंकज कुमार पांडे की ओर से जारी आदेश का मुताबिक सरकारी कार्यालय 29, 30 अप्रैल और 1 मई थै बंद राला.यां से पैली 28 अप्रैल तक शासकीय कार्यालय बंद रखणौ आदेश जारी करे गी छौ.
- सुशीला तिवारी अस्पताल मां 18 घंटे मा 12 की मौत
कुमाऊं का सबसे बड़ा अस्पताल सुशीला तिवारी हॉस्पिटल मा 18 घंटा का भीतर 12 कोरोना संक्रमितूं की मौत ह्वे गी. जबकि अभी 140 से ज्यादा लोखूं की हालत यख गंभीर बंणी च. सुशीला तिवारी अस्पताल का एमएस डॉ. अरुण जोशी न बथै कि अस्पताल मा लगातार मरीजुं की संख्या बढ़णी च. अभी अस्पताल मा 425 संक्रमित मरीज भर्ती छन, ज्या मा 140 की स्थिति गंभीर च.
- ऊर्जा विभाग ने सरकार थै दिनी 7 करोड़
प्रदेश मा कोरोना संक्रमण का बढ़ते प्रभाव का बीच ऊर्जा विभाग न भी मदद थै हाथ बढ़ैन. ऊर्जा सचिव राधिका झा का नेतृत्व मा ऊर्जा विभाग न बुधवारौ राज्य सरकार थै कोरोना महामारी से लड़नौ सहायता राशि प्रदान करी. UJVN लिमिटेड का प्रबंध निदेशक संदीप सिंघल और UPCL का प्रबंध निदेशक नीरज खैरवाल न सामाजिक दायित्व निर्वहन योजना का अंतर्गत कोरोना संक्रमणै रोकथाम थै 7 करोड़ 64 लाख 91हजार 752 रुप्या कु चेक राज्य आपदा प्रबंधन प्राधिकरण का नौ जारी करी.
- महाकुंभै समाप्ति का बाद हरिद्वार मा कर्फ्यू
महाकुंभै समाप्ति का बाद देर रात डीएम सी रविशंकरै ओर से 3 मई तक हरिद्वार मा कर्फ्यू लगौणौ निर्णय लिये गी. आज बटी हरिद्वार मा कर्फ्यू कु असर भी दिखेण शुरू ह्वे गी. हर की पैड़ी पर भी बहुत ही कम संख्या मा श्रद्धालु दिखेन. आज हरिद्वार का बाजार बंद रैन, सड़कूं पर भी क्वी नी दिखे. स्थानीय लोग कर्फ्यू का कारण भैर की निललिनी.
- आयुष विभाग बंणालू हेल्प डेस्क
प्रदेश मा कोरोना का मामलौ थै देखी आज आयुष मंत्री डॉ. हरक सिंह रावत न विधानसभा मा होम्योपैथिक, आयुर्वेदिक और यूनानी चिकित्सा सेवा का अधिकार्यूं दगड़ि बैठक करी. बैठक मा कोविड-19 से सम्बन्धित कई महत्वपूर्ण निर्णय लिये गिन ज्यां मा लोखूं थै आयुष किट देंण से आयुष हेल्प डेस्क स्थापित कन्न पर विस्तार से चर्चा करे गी.
- एक मई बटी कोरोना वैक्सीनेशन अभियान
उत्तराखंड मा 1 मई से 18 साल से 45 साल तक का लोखूं थै वैक्सीन लगये जाली. जानकारी का मुताबिक 18 साल से 45 साल तक का करीब 50 लाख लोखूं थै वैक्सीन लगये जाली, ज्या पर 450 करोड़ कु खर्च आलू, जै थै राज्य सरकार वहन करली. 18 से 45 साल का लोखू थै लगण वाली वैक्सीन मा 90 प्रतिशत कोविशील्ड और 10 प्रतिशत कोवैक्सीन कु टीका लगये जालू.
- UKSSSC न स्थगित करी अभिलेख सत्यापन कार्यक्रम
कोरोना संक्रमण का बढ़दा मामलौ थै देखी उत्तराखंड अधीनस्थ सेवा चयन आयोग (UKSSSC) न बड़ू निर्णय लिनी. यां का तहत कृषि विभाग का सहायक कृषि अधिकारी वर्ग-3 (पद कोड-132) और पेयजल निगम का कनिष्ठ अभियंता, सिविल (पद कोड- 131, 532) का चयनित अभ्यर्थ्यूं का मई से शुरू होंण वाला अभिलेख सत्यापन थै अगले आदेशुं तक स्थगित करे गी. अभिलेख सत्यापन थै आयोग न 4 मई से 20 मई की तारीख निर्धारित करी छै.
