CM धामी न करी पुलै शिलान्यास: मुख्यमंत्री पुष्कर सिंह धामी न आज भारत नेपाल थै जोड़न्न वाला पिथौरागढ़ का पैला मोटर पुल कु शिलान्यास करी. यू पूल भारत-नेपाल का बीच काली नदी पर बणनू च. ये पूलै लंबाई 110 मीटर पुल मीटर च. ये पूल का निर्माण से भारत और नेपाल का बीच आपसी संबंध और मजबूत होला. दगड़ा मा ही चीन सीमा से लग्यां क्षेत्र मा भारत और नेपाल का बीच व्यावसायिक गतिविधियूं थै भी बढ़ावा मिललू.
एलबीएस अकादमी मा राज्यपाल गुरमीत सिंह: राज्यपाल गुरमीत सिंह (Governor Gurmeet Singh) भारी सुरक्षा का बीच आज मसूरी पौंछिन. यख राज्यपाल गुरमीत सिंह न लाल बहादुर शास्त्री प्रशासनिक अकादमी (Lal Bahadur Shastri Administrative Academy) मा आयोजित कार्यक्रम मा शिरकत करी. एलबीएस एकादमी का डायरेक्टर श्रीनिवास आर कटीकथला न राज्यपालौ स्वागत करी गया. कार्यक्रम का दौरान राज्यपाल न आयुर्वेद जीवन शैली पर आधारित पुस्तिका व ज्वाइंट सिविल मिलिट्री प्रोग्राम रिपोर्ट कु शुभारंभ करी.
हिमाचल चुनाव मा प्रचार करला उत्तराखंड का नेता: हिमाचल विधानसभा चुनाव मा उत्तराखंड भाजपा का नेता चुनाव प्रचार करला. ये मैना का आखिर मा 49 नेता हिमाचल जाला. उत्तराखंड का यू वरिष्ठ और अनुभवी नेता हिमाचल मा चुनाव प्रबंधनै कमान संभालला. केंद्रीय नेतृत्व न हिमाचल प्रदेशै 19 विधानसभा सीटूं पर उत्तराखंड का नेताऊं थै जिम्मेदारी दिनी.
यूकेएसएसएससी मामला थै लेकी एनएसयूआई कु प्रदर्शन : यूकेएसएसएससी भर्ती घोटालै सीबीआई जांचै मांग थै लेकी प्रदेश भर मा प्रदर्शन होंणा छन. ई कड़ी मा आज एनएसयूआई कार्यकर्ता (NSUI Workers Protest) राजपुर रोड स्थित कांग्रेस प्रदेश मुख्यालय मा एकत्रित ह्वेन. ज्या का बाद यख बटी एनएसयूआई कार्यकर्ताऊं एक जुलूस निकाली, यख बटी एनएसयूआई कार्यकर्ता पैदल मार्च करी सचिवालय की तरफां बढीन, मगर सुभाष रोड पर मौजूद भारी पुलिस बल न प्रदर्शनकारियूं थै रोकेली. ज्या पर जमकर हंगामा ह्वे.
हरिद्वार लाइब्रेरी घोटाला मामलै सुप्रीम कोर्ट मा सुणवै: उत्तराखंड बीजेपी का पूर्व अध्यक्ष और मौजूदा हरिद्वार विधायक मदन कौशिकै मुश्किल बढ़णा वाली छन. हरिद्वार लाइब्रेरी घोटाला मा सुप्रीम कोर्ट न मदन कौशिक बटी 14 अक्टूबर तक जवाब मांगी. हरिद्वार लाइब्रेरी घोटाला मा देहरादून निवासी सच्चिदानंद डबराल न सुप्रीम कोर्ट मा एसएलपी दाखिल करी छै, ज्या पर आज सुप्रीम कोर्ट न सुणवै करी मदन कौशिक और जिम्मेदार अधिकारियूं से जवाब मांगी .
बांसबाड़ा का समणि केदारनाथ हाईवे बाधित: केदारनाथ राष्ट्रीय राजमार्ग बांसबाड़ा का समणि आज एक बार फिर से बाधित (Kedarnath National Highway blocked) ह्वे गी.केदारनाथ हाईवे बाधित होंण का बाद राजमार्ग का द्वी ओर वाहनूं की लंबी कतार लग गीन. राष्ट्रीय राजमार्ग बाधित होंण से स्थानीय लोखूं का दगड़ा ही यात्रियूं थै परेशानी उठौण पड़ा. बथै द्या कुछ दिनौं बटी केदारघाटी मा लगातार बरखा होंणी च, ज्या का कारण जन जीवन अस्त व्यस्त ह्वे गी, बरखा का कारण पहाड़ी क्षेत्रूं मा भूस्खलनै घटना भी बढ़णी छन.
21 सितंबर बटी देहरादू मा क्रिकेट कु महाकुंभ: 21 सितंबर बटी देहरादून का राजीव गांधी इंटरनेशनल स्टेडियम मा Road Safety World Series 2022 का मैच खेले जाला. ईं सीरीज मा भाग लेणौ दुनियाभर का दिग्गज खिलाड़ी देहरादून पौंछण शुरू ह्ववे गीन. आज ऑस्ट्रेलिया और बांग्लादेश का खिलाड़ी देहरादून पौंछिन. जौलीग्रांट एयरपोर्ट पर ऑस्ट्रेलिया का मशहूर क्रिकेटर ब्रेट ली नजर ऐन.
देहरादून मा आयोजित होली मैराथन: सरदार वल्लभ भाई पटेलै जंयती पर उत्तराखंड पुलिस रन फॉर यूनिटी कु आयोजन करली. यां का तहत देहरादून मा मैराथन कु आयोजन किये जालू. ई मैराथन मा 21 किलोमीटर और 10 किलोमीटरै दौड़ करये जाली. यां मा विजेता प्रतिभागियूं थै ₹10 लाख रुप्या की राशि दिये जाली. 30 अक्टूबरौ उत्तराखंड पुलिस देहरादून मैराथन कु चौथूं संस्करण आयोजित करली.
चारधाम यात्रा मा बढणी यात्र्यूं की संख्या: चारधाम यात्रा मा एक बार फिर से तीर्थयात्रियूं की संख्या बढ़ण लग गी. हालांकि मौसम खराब होंण का कारण यात्रियूं थै परेशानी भी होंणी च. यां का बाद भी बदरीनाथ, केदारनाथ, गंगोत्री व यमुनोत्री धाम मा यात्र्यूं की संख्या दिनों-दिन बढणी च. अक्टूबर मैना मा दीपावली तक हेली सेवा की बुकिंग भी फुल ह्वे गीन.15 सितंबर तक लगभग 46.64 लाख तीर्थयात्रियूं न चारधाम यात्रा थै पंजीकरण करै, ज्या मा 35.81 लाख श्रद्धालुऊं न दर्शन करीन.
उत्तराखंड मा कोरोना का मामला: उत्तराखंड मां धीरे-धीरे कोरोना का मामलौ मा कमी औंणी च. सरकार और स्वास्थ्य विभाग यां कु थै लेकी लगातार प्रयास कन्ना छन. आज प्रदेश मा कोरोना का 20 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103,925 ह्वे गी, जबकि यां से मन्न वालौ की संख्या 329 च.
