CM धामी न करी रानीबाग पुल कु लोकार्पण: मुख्यमंत्री पुष्कर सिंह धामी न हल्द्वानी बटी कुमाऊं का पर्वतीय क्षेत्रूं थै जोड़न वाला रानीबाग पुल कु आज शुभारंभ (Ranibagh bridge inaugurated) करेली. ये दौरान केंद्रीय रक्षा राज्य मंत्री अजय भट्ट, नैनीताल जिला की प्रभारी मंत्री रेखा आर्य, भीमताल विधायक राम सिंह कैड़ा भी कार्यक्रम मा मौजूद रैन. 7 करोड़ 17 लाखै लागत से बण्या टू लेन पुल का बणन से अब अल्मोड़ा, पिथौरागढ़, बागेश्वर, चंपावत और नैनीताल का पर्वतीय क्षेत्रूं थै जांण वाला लोखूं थै राहत मिलली.
बीजेपी प्रदेश अध्यक्ष न कालीमठ मंदिर मा करी पूजा: बीजेपी प्रदेश अध्यक्ष महेन्द्र भट्ट पैली बार केदारनाथ विधानसभा क्षेत्र मा पौंछिन. जख बीजेपी कार्यकर्ताऊं न ऊंकु पहाड़ी अंदाज मा जोरदार स्वागत करी. यां का बाद बीजेपी प्रदेश अध्यक्ष महेन्द्र भट्ट (BJP State President Mahendra Bhatt) न सिद्धपीठ कालीमठ मंदिर मा पूजा अर्चना भी करी. या का बाद महेंद्र भट्ट न कार्यकर्ताऊं थै संबोधित करी. ऊंन कार्यकर्ताऊं से आगामी चुनावु थै तैयार रौंणौ बोली.
उत्तराखंड सपा मा बडू फेरबदल: समाजवादी पार्टी न उत्तराखंड संगठन मा बडू बदलाव करी. समाजवादी पार्टी का राष्ट्रीय अध्यक्ष अखिलेश यादव न प्रदेश संगठन मा फेरबदल करी शंभू पोखरियाल थै उत्तराखंड समाजवादी पार्टी का अध्यक्ष पदै जिम्मेदारी सौंपी. वखी, डॉ सत्यनारायण सचान थै राष्ट्रीय सचिवै जिम्मेदारी दिये गी. अब्दुल मतीन सिद्दीकी थै उत्तराखंड कु प्रदेश प्रभारी भी नियुक्त करे गी.
हरिद्वार का पंचायत चुनाव कु ऐलान: हरिद्वार का पंचायत चुनाव कु ऐलान ह्वे गी. हरिद्वार पंचायत चुनाव 26 सितंबरौ होला. 28 सितंबरौ पंचायत चुनाव की मतगणना होली. हरिद्वार जिला मा एक चरण मा ही पंचायत चुनाव संपन्न करये जाला. जिलाधिकारी विनय शंकर पांडे (Haridwar DM Vinay Shankar Pandey)न बथै 6 से 8 सितंबर तक पंचायत चुनाव का नामांकन होला. 9 से 11 सितंबर तक नामांकन पत्रों की जांच होली. 12 सितंबर नामांकन वापस लेणौ तिथि होली. 13 सितंबरौ प्रतीकों कु आवंटन होलू.
हरिद्वार पंचायत चुनाव थै कांग्रेस न गठित करी कमेटी: हरिद्वार पंचायत चुनाव (Haridwar Panchayat Election 2022) कु ऐलान ह्वे गी. उत्तराखंड कांग्रेस न हरिद्वार पंचायत चुनाव मा मजबूती से उतन्नौ 16 सदस्यीय कमेटी कु गठन करेली. कमेटी मा प्रदेश अध्यक्ष करण माहरा, नेता प्रतिपक्ष यशपाल आर्य, पूर्व मुख्यमंत्री हरीश रावत, काजी निजामुद्दीन, प्रीतम सिंह, गणेश गोदियाल, अनुपमा रावत, सतपाल ब्रह्मचारी, ममता राकेश, फुरकान अहमद सहित 16 लोग शामिल छन. ये सबी अधिकृत किये जांण वाला प्रत्याशियूं का चयन एवं चुनाव का सफल संचालन कु काम करला.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
UKSSSC मा ब्लैकलिस्ट होली आउटसोर्सिंग एजेंसी: UKSSSC का सचिव सुरेंद्र सिंह रावत (UKSSSC Secretary Surendra Rawat) न पेपर लीक का बाद बड़ू ऐलान करी. ऊंन बोली की UKSSSC बटी आउटसोर्सिंग एजेंसी थै ब्लैकलिस्ट किये जालू. यां का अलावा आयोग परिसर मा भी सबी बाहरी व्यक्तियूं का प्रवेश पर प्रतिबंधित लगये गी. UKSSSC का सचिव सुरेंद्र सिंह रावत न बोली पेपर लीक मामला का बाद आयोगै छवि थै बड़ू झटका लगी. पेपर लीक मामला का बाद लंबा समय से एक ही पोस्ट पर बैठ्य़ा लोखूं थै भी बदले गी.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
