UKSSSC paper leak मामला मा 30 वीं गिरफ्तारी: UKSSSC paper leak मा उत्तराखंड एसटीएफ लगातार कार्रवाई कन्नी च. ये मामला मा एसटीएफ ने एक और आरोपी थै गोवा बटी गिरफ्तार करी. आरोपी कु नौ फिरोज हैदर च, जु की उत्तर प्रदेश का नकल माफिया गिरोह से जुड़्यू च. ये आरोपी कु काम लखनऊ मा छप्या पेपर हल्द्वानी लौणौ छौ. यूकेएसएसएससी पेपर लीक मामला मा या 30वीं गिरफ्तारी च.
हाईकोर्ट पौंछि UKSSSC पेपर लीक मामला: UKSSSC पेपर लीक कु मामला अब उत्तराखंड हाईकोर्ट पौंछ गी. ये मामला मा सीबीआई जांचै मांग थऐ लेकी कांग्रेस विधायक और उत्तराखंड विधानसभा का उप नेता प्रतिपक्ष भुवन कापड़ी न उत्तराखंड हाईकोर्ट मा याचिका दायर करी. ये मामला मा सुणवै सोमवारौ ह्वे सकदी.भुवन कापड़ी न उत्तराखंड हाईकोर्ट से मामलै निष्पक्ष और प्रभावी जांच करौणै मांग करी.
हरिद्वार का पंचायत चुनाव कु ऐलान: हरिद्वार का पंचायत चुनाव कु ऐलान ह्वे गी. हरिद्वार पंचायत चुनाव 26 सितंबरौ होला. 28 सितंबरौ पंचायत चुनाव की मतगणना होली. हरिद्वार जिला मा एक चरण मा ही पंचायत चुनाव संपन्न करये जाला. जिलाधिकारी विनय शंकर पांडे (Haridwar DM Vinay Shankar Pandey)न बथै 6 से 8 सितंबर तक पंचायत चुनाव का नामांकन होला. 9 से 11 सितंबर तक नामांकन पत्रों की जांच होली. 12 सितंबर नामांकन वापस लेणौ तिथि होली. 13 सितंबरौ प्रतीकों कु आवंटन होलू.
हरिद्वार पंचायत चुनाव थै कांग्रेस न गठित करी कमेटी: हरिद्वार पंचायत चुनाव (Haridwar Panchayat Election 2022) कु ऐलान ह्वे गी. उत्तराखंड कांग्रेस न हरिद्वार पंचायत चुनाव मा मजबूती से उतन्नौ 16 सदस्यीय कमेटी कु गठन करेली. कमेटी मा प्रदेश अध्यक्ष करण माहरा, नेता प्रतिपक्ष यशपाल आर्य, पूर्व मुख्यमंत्री हरीश रावत, काजी निजामुद्दीन, प्रीतम सिंह, गणेश गोदियाल, अनुपमा रावत, सतपाल ब्रह्मचारी, ममता राकेश, फुरकान अहमद सहित 16 लोग शामिल छन. ये सबी अधिकृत किये जांण वाला प्रत्याशियूं का चयन एवं चुनाव का सफल संचालन कु काम करला.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
धन सिंह रावत न करी NHM समीक्षा बैठक: स्वास्थ्य महानिदेशालय देहरादून मा आज स्वास्थ्य मंत्री धन सिंह रावत न राष्ट्रीय स्वास्थ्य मिशनै समीक्षा बैठक करी. बैठक मा धन सिंह रावत न सरकारी अस्पतालूं मा टेक्नीशियन एवं पैरामेडिकल स्टॉफै कमी दूर कन्नौ एनएचएम का तहत स्वीकृत पदूं थै शीघ्र भन्नै बात बोली. ज्या का तहत प्रदेश में 1071 पद भरे जाला. यां का अलावा धन सिंह रावत ने 6 सितंबर से 2 अक्टूबर तक प्रदेशभर मा स्वास्थ्य जन जागरूकता अभियान चलौणै बात भी बोली .
लेफ्टिनेंट जनरल वीके मिश्रा बणिन IMA का नया कमांडेंट: भारतीय सैन्य अकादमी (IMA) मा 51वा कमांडेंट के रूप मा लेफ्टिनेंट जनरल वीके मिश्रा न आज पदभार ग्रहण (Lt Gen VK Mishra take charge in IMA) करी. ई औपचारिकता से पैली ऊंथै IMA का कमांडेंट लेफ्टिनेंट जनरल हरिंदर सिंह न अकादमी की बैटन कमान सौंपी. लेफ्टिनेंट जनरल विजय कुमार मिश्रा थै दिसंबर 1985 मा जम्मू और कश्मीर राइफल्सै 17वीं बटालियन मा नियुक्त करे गी छौ. लेफ्टिनेंट जनरल विजय कुमार मिश्रा डिफेंस सर्विसेज स्टाफ कॉलेज, वेलिंगटन बटी स्नातक छन.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
उत्तराखंड मा फिर बढ़ी कोरोना: उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 61 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103, 213 ह्वे गी, जबकि यां से मन्न वालौ की संख्या 321 च.
