मुख्यमंत्री उदीयमान खिलाड़ी उन्नयन योजना कु शुभारंभ: राष्ट्रीय खेल दिवस का मौका पर मुख्यमंत्री पुष्कर धामी न देहरादून मा मुख्यमंत्री उदीयमान खिलाड़ी उन्नयन योजना कु शुभारंभ करी. ई योजना का प्रदेश मा 3900 छात्रूं कु चयन करे गी, जौ थै हर मैना 1500 रुप्या की छात्रवृत्ति दिये जाली. ये दौरान सीएम धामी न मलखम्ब खेल थै राज्य खेल पॉलिसी मा शामिल कन्नै घोषणा भी करी. योजना शुभारंभ का मौका पर खेल मंत्री रेखा आर्य और स्थानीय विधायक विनोद चमोली भी मौजूद रैन.
UKSSSC पेपर लीक मामला मा कांग्रेस हमलावर: UKSSSC पेपर लीक मामला पर कांग्रेस लगातार हमलावर मोड मा च. ये मामला मा आज कांग्रेस न दिल्ली मा प्रेस कॉन्फ्रेंस करी राज्य सरकार थै घेरी. UKSSSC Paper Leak मामला मा कांग्रेस न बोली राज्य सरकार ये मामला मा बड़ी मछलियूं थै बचौणौ काम कन्नी च. कांग्रेस न ये मामला मा सीबीआई जांच कन्नै बात होली. उत्तराखंड कांग्रेस प्रदेश अध्यक्ष करण माहरा न बोली UKSSSC परीक्षा पेपर लीक मामला मा बीजेपी सरकारै बड़ी लापरवाही समणी ऐ. अब ये मामला मा कार्रवाई होंण चयेंदी.
विस भर्ती मामला मा TSR न CM धामी थै घेरी: पूर्व मुख्यमंत्री और भाजपा का वरिष्ठ नेता त्रिवेंद्र सिंह रावत न विधानसभा भर्ती मामला पर मुख्यमंत्री पुष्कर सिंह धामी और वित्त मंत्री प्रेमचंद्र अग्रवाल थै कटघरा मा खड़ू करी. त्रिवेंद्र सिंह रावत न स्पष्ट करी की ऊंन ये मामला मा परीक्षा का जरिया भर्ती करौणा आदेश दिनी छा, मगर उंका हटद ही कुछ और ही ह्वे गी. ऊन बोली दूसरी सरकारै घोटाले बात बोली आप अपणा काम थै जायज नी ठैरे सकदा .
महिला कांग्रेस कु विरोध प्रदर्शन: उत्तराखंड हाईकोर्ट न राज्य सरकार का यूकेपीएससी (उत्तराखंड लोक सेवा आयोग) मा राज्य की महिलाऊं थै 30 प्रतिशत क्षैतिज आरक्षण मामला पर रोक लगयेली. ये मामला थै लेकी आज उत्तराखंड कांग्रेस महिलाऊं न सीएम आवास का समणि विरोध प्रदर्शन करी. महिला कांग्रेस न प्रदेश सरकार पर कोर्ट मा कमजोर पैरवी कु आरोप लगै. ऊंन ये मामला मा महिलाऊं का हक छीनने बात बोली.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
जितेंद्र नारायण त्यागी थै सुप्रीम कोर्ट बटी झटका: विवादित बयानू से सुर्खियूं मा रौंण वाला जितेंद्र नारायण त्यागी (Jitendra Narayan Tyagi) उर्फ वसीम रिजवी कु मुसीबत कम नी होंणी च. हरिद्वार हेट स्पीच मामला मा जितेंद्र नारायण त्यागी थै सुप्रीम कोर्ट (Supreme Court) बटी बड़ू झटका लगी. कोर्ट न हरिद्वार धर्म संसद हेट स्पीच मामला जितेंद्र नारायण त्यागी थै द्वी सितंबर तक सरेंडर कन्ना आदेश दिनी.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
नागाघेर गौ मा भयानक हत्याकांड: देहरादून का रानीपोखरी का नागाघेर गौ मा भयानक हत्याकांड ह्वे. यख एक आदमी न अपणा ही परिवार का पांच लोखूं की हत्या करेली. ये वहशी शख्स न अपणा तीन बच्चों, पत्नी और मां की हत्या करी. पुलिस न आरोपी थै गिरफ्तार करेली. यू शख्स यूपी का बांदा कु रौंण वालू च. एसएसपी न बथै आरोपी महेश तिवारी यख अपणा भै का मकान मा 2015 से रौणू छौ. ह रहा था.
उत्तराखंड मा फिर बढ़ी कोरोना: उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 64 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103, 044 ह्वे गी, जबकि यां से मन्न वालौ की संख्या 319 च.
