सीएम धामी न लिनी कांवड़ यात्रा कु जायजा: मुख्यमंत्री पुष्कर सिंह धामी आज हरिद्वार पौंछिन. यां का बाद डामकोठी का निकट ओमसेतु गंगा घाट पर सुबेर सीएम धामी कांवड़ियूं का स्वागत कार्यक्रम मा शामिल ह्वेन. ये दौरान ऊंन कांवड़ियूं का खुटा ध्वे की उंथै फूल माला पैरेन. या का बाद सीएम धामी कांवड़ मेला की व्यवस्थाऊं कु जायजा भी लिनी. ये दौरान सीएम धामी न बोली हरिद्वार मा कांवड़ियूं और श्रद्धालुऊं थै स्वच्छ पेयजल, मेडिकल कांवड़ पटरी पर लैट आदि की व्यवस्था दुरुस्त छन.
आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
उत्तराखंड मा मौसम कु रेड अलर्ट: उत्तराखंड मा मौसम विभाग न रेड अलर्ट जारी करर्यूं च. ज्या का बाद आपदा प्रबंधन विभाग एक्शन मा च. उत्तराखंड आपदा प्रबंधन विभाग न हालात थै देखी यात्रा मार्गूं का दगड़ा ही अन्य 400 जगहूं पर जेसीबी मशीन लगई छन. यां का दगड़ा ही प्रदेश मा आपदा का हालातू से निपटणौ पांच जगहूं पर एनडीआरएफै तैनाती भी करी च. प्रदेश मा अलर्ट का बाद 9 जनपदूं मा स्कूलूं थै एहतियात का तौर पर बंद करे गी.
आपदा कंट्रोल रूम पौंछिन सीएम धामी: मौसम विभाग का रेड अलर्ट की चेतावनी का बाद आज मुख्यमंत्री पुष्कर सिंह धामी न देहरादून सचिवालय मा आपदा कंट्रोल रूम कु औचक निरीक्षण करी. ये दौरान सीएम धामी न अधिकारियूं और कर्मचारियूं से अपडेट भी लिनी, मुख्यमंत्री धामी न बोली भारी बरखा की आशंका का बाद सब्यूं थै अलर्ट रौणै जरूरत च. ऊंन बोली राज्य मा आपदा थै लेकी तैयारियूं कु नियमित रूप से परीक्षण किये जांणू च. ऊंन कै भी अधिकारी थै मोबाइल स्विच ऑफ न कन्ना निर्देश भी दिनी.
ऋषिकेश-बदरीनाथ हाईवे पर पुलै शटरिंग टूटी: ऋषिकेश-बदरीनाथ हाईवे पर नरकोटा का समणि आज एक निर्माणाधीन मोटर पुलै शटरिंग गिर गी. ज्या से द्वी मजदूरुं की मौत ह्वे गी. ई घटना मा आठ मजदूर घायल ह्वे गीन. सूचना पर जिला प्रशासन, आपदा प्रबंधन, डीडीआरएफ, एसडीआरएफ, सेना, पुलिसै टीम घटनास्थल पर पौंछि. ज्या का बाद राहत और बचाव कार्य शुरू करे गी. कटर मशीन का जरिया, सरिया काटी मृतकूं का शवूं थै भैर निकले गी. जक बटी घायलूं थै जिला चिकित्सालय लये गी. गंभीर रूप से घायल द्वी मजदूरुं थै हायर सेंटर रेफर करे गी. डीएम न ये मामला की उच्च स्तरीय जांचै बात भी बोली.
मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
देहरादून मा GST रिफंड का नौ पर धोखाधड़ी: सीजीएसटी न देहरादून मा संचालित एक कंपनी की GST अनियमितता की जांच मा एक और बड़ा GST रिफंड फर्जीवाड़ा कु खुलासा करी. मेंबर्स ग्रोथ इंटरप्राइजेजै जांच का दौरान ई कंपनी से जुड़ी 3 फर्म और 7 अन्य कंपनियूं का सिंडिकेट कु पर्दाफाश ह्वे, जु जीएसटी रिफंड का नौम पर धोखाधड़ी कन्नी छै. मामला मा सीजीएसटी देहरादूनै टीम न आरोपित कंपनी का खिलाफ कानूनी कार्रवाई सुनिश्चित करी. दगड़ा मा 4 करोड़ 20 लाख फर्जी रिफंड जीएसटी भुगतान पर भी टीन न रोक लगै.
किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
उत्तराखंड मा थमी कोरोना की रफ्तार: उत्तराखंड मां धीरे-धीरे कोरोना का मामला कम होंणा छन. आज प्रदेश मा कोरोना का 189 नया मामला समणि ऐनी, ज्या का बाद प्रदेश मा कोरोना संक्रमितू की संख्या 95,164 ह्वे गी, जबकि यां से मन्न वालौ की संख्या 286 च. प्रदेश मा कोरोना संक्रमित मरीजुं की रिकवरी रेट 96.10% च.
