अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

• कोरोना केसों मा हल्की कमी
  उत्तराखंड मां बीता 24 घंटा क भितर कोरोना केसों मा थोड़ी कमी दिखन कु मीली च. बीता 24 घंटा मां 3727 संक्रमित समणि ऐनी, 5 लोगूं की मौत भी ह्वाई च. अबी एक्टिव केसों क संख्या 31310 पौंची ग्यै च जबकि 1270 लोगों ने कोरोना कु मात भी देई च. जिलेवार बात करां तो पिछला 24 घंटा मां देहरादून मां 1264 केस मीली छन, हरिद्वार मा 826, उधम सिंह नगर मा 252 जबकि नैनीताल मा 200 केस समणि ऐनी.
• उत्तराखंड कांग्रेस की पैली लिस्ट जारी
  चुनावी खबरों मां सबसे पैली उत्तराखंड कांग्रेस न देर रात अपरा 53 प्रत्याशियों की पैली लिस्ट जारी कर दियाली. कांग्रेस उम्मीदवारों की पहली लिस्ट मां हरीश रावत, हरक सिंह रावत अर अनुकृति गुसाई क नाम अबी नी छन. हालांकि, प्रदेश अध्यक्ष गणेश गोदियाल तैं जरुर श्रीनगर बिटीं टिकट मीली च. वखी खटीमा मा मुख्यमंत्री पुष्कर सिंह धामी क खिलाफ पार्टी न भुवन चंद कापड़ी तैं मैदान मा उतारी च. जबकि हल्द्वानी मा इंदिरा हृदयेश क सीट बिटीं ऊं का बेटा सुमित हृदयेश चुनाव लड़ला. पैली सूची मा बस 3 महिलाओं तैं टिकट दिये ग्यै च.
• सीएम धामी क हरदा पर तंज
  पूर्व मुख्यमंत्री हरीश रावत क नाम कांग्रेस की पैली लिस्ट मा नी ह्वाण से विपक्ष कु ऊं पन हमला कन कु मौका मिल गेई. मुख्यमंत्री पुष्कर सिंह धामी न ऊ पन तंज कसी अर बोली कि ह्वै सकदू कांग्रेस प्रत्याशियों की पैली लिस्ट मा हरीश रावत न खुद ही अपरा नाम नी डलवाई हो, शायद ऊ चुनाव से दूर जाणा छन.
• हरदा कु लेकी रामनगर सीट पर रस्साकस्सी
  बाकी खबर च कि कांग्रेस हरीश रावत की सीट कु लेकी अबी फैसला नी कर पाई च. पैली हरीश रावत तैं डीडीहाट बिटीं चुनाव लड़न कु बात समणि आणि छै, पर डीडीहाट बिटीं प्रत्याशी तय होण क बाद अब रामनगर सीट पर हरीश रावत कु नाम चलण च. फिलहाल रामनगर सीट पर रंजीत रावत की नजर च. ये सीट पन द्वी लोगूं को लेकी माथापच्ची चलणि च. बतैं द्यां कि कभी रंजीत रावत हरीश रावत क बड़ा दगड्या छै पर अब द्वी लोगूं की नी बणदी.
• यमुनोत्री सीट पन कांग्रेस मा विद्रोह
  कांग्रेस क टिकट बंटवारा कु बाद यमुनोत्री विधानसभा सीट पर विद्रोह फूट ग्याई. कांग्रेस क जिला पंचायत अध्यक्ष दीपक बिजल्वाण को टिकट देन कु बाद साल 2017 मा कांग्रेस प्रत्याशी संजय डोभाल क समर्थन मा सैकड़ों कांग्रेसी पदाधिकारियों अर कार्यकर्ताओं न सामूहिक इस्तीफा देकन बगावत कर दी च. पूर्व प्रत्याशी संजय डोभाल न कांग्रेस पन 5 करोड़ रुपए मा टिकट बेचन क आरोप लगाई च. संजय डोभाल अब निर्दलीय चुनाव लड़ला.
• 31 जनवरी तक स्कूल बंद, रैली-प्रदर्शन पर रोक रैली
  उत्तराखंड मा कोरोना क बढ़दा मामलों कु देखी कन सरकार न 31 जनवरी तक सभी स्कूलों कु बंद रखण कु आदेश देई च. येका दगड़ी स्विमिंग पूल अर वाटर पार्क बी 31 जनवरी तक बंद रैला. येका अलावा 31 जनवरी तक सबी रैलियों अर प्रदर्शन पर भी रोक रैली. पूरा प्रदेश मा रात 10 बजी से लेकी सुबह 6 बजी तक नाइट कर्फ्यू लागू रहल. सभी प्रतिष्ठान अर दुकान सुबेर 6 बजे से रात 10 बजे तक ही खुलली.
• निःशुल्क टैबलेट योजना मा गड़बड़ी
  रुद्रप्रयाग जिला मा राज्य सरकार क छात्र-छात्राओं तैं निःशुल्क मोबाइल टैबलेट योजना मा नियमों की अनदेखी किए जाण क मामला समणि आई च. कई छात्र टैबलेट कम कीमत क टैबलेट खरीदना छन. वखी, कई दुकानदार जीएसटी बिल त द्याणा छन पर ऊं का जीएसटी मा रजिस्ट्रेशन ही नी च. अब शिक्षा विभाग क अधिकारी मामला मा स्कूलों का प्रधानाचार्यों से बात कन क बाद जांच करण क बात कहणा छन.
• नैनीताल क गांव मा हाथियों कु उत्पात
  नैनीताल जनपद क देवीधुरा गांव मा हाथियों न जमकर उत्पात मचैई. गांव मा घुसी कन हाथियों न घरों क खिड़की दरवाजा तोड़ डाली. लोगूं न किसी तरह घर बिटीं भागी कन अपणि जान बचैई. जैका बाद ग्रामीणों न इकट्ठा ह्वै कन हाथियों क झुंड कु गांव से भैर भगाई. ग्रामीणों ने बताई कि 6 हाथियों क झुंड गांव मा घुसी छै, ऊ न पूरी फसल बर्बाद कर द्याई. ग्रामीणों न वन विभाग से क्षेत्र मा गश्त लगाण की मांग कौरी च.
• किच्छा फैक्ट्री लूट मामला क खुलासा
  उधम सिंह नगर क किच्छा क इंद्रपुर गांव मा 16 जनवरी कु एक निर्माणाधीन फैक्ट्री से ह्वाई लूट मामला का पुलिस न खुलासा कर देई अर 6 आरोपियों तैं गिरफ्तार भी कौरी. ऊं का कब्जा से पुलिस न एक तमंचा अर लूट क सामान भी बरामद कौरी. मामला मा 4 अन्य आरोपी अबी फरार चलणा छन. बतै द्यां कि बीती 16 जनवरी कु इंद्रपुर गांव मा निर्माणधीन तेल फैक्ट्री मा अज्ञात बदमाशों न फैक्ट्री मा काम करणा लोगूं तैं बंधक बनै कन सरिया, पाइप ड्रिल मशीन अर करीब 10 लाख का सामान लूटी ले छै.
• पहाड़ी क्षेत्रों मा बिजां ठंड बौढ़ी
  उत्तराखंड क पहाड़ी क्षेत्रों में सुबेर बिटीं बारिश होण से तापमान मा भारी गिरावट ह्वै ग्याई च. ठंड से लोगूं कु हाल बेहाल च. वखी मसूरी-धनौल्टी मार्ग पर सुवाखोली क पास बर्फबारी होण से यातायात भी प्रभावित छै. कई लोग बर्फबारी क कारण मार्ग पर फंस्यां छै. मसूरी क दगड़ी उत्तरकाशी मा भी बारिश होम से तापमान मा गिरावट दर्ज की जाणि च. कई क्षेत्रों मा बिजली न होण से भी भारी परेशानी ह्वाणि च.