1. उत्तराखंड सरकारन देवस्थानम बोर्ड थै करि भंग
उत्तराखंड सरकारन देवस्थानम बोर्ड थै भंग कना कू ऐलान कयालि. वखि चारधामों का तीर्थ पुरोहित काफी समय बटि देवस्थानम बोर्ड थै भंग कना कि मांग कना छाई. उम्मीद च कि शीतकालीन सत्र का दौरान राज्य सरकार ये एक्ट थै कैंसिल कना कू फैसला लेलि. वखि विधानसभा चुनौ से पेलि सीएम पुष्कर सिंह धामी कू यू फैसला अहम मनै जाणु च.
2. देवस्थानम बोर्ड भंग कना फू फैसला पर तीर्थपुरोहितों न जतै आभार
धामी सरकारक देवस्थानम बोर्ड थै भंग कना कू ऐलान का बाद तीर्थपुरोहितों ना अपणि खुशी कू इजहार करि, ऊन बोली- पंडा पुरोहितों का आंदोलन और संघर्ष थै मिली जीत, धामी सरकारक देवस्थानम बोर्ड थै भंग कना कू फैसला काबिले तारीफ, एक-दूसरा थै मिठै खिलैकि तीर्थ पुरोहितों ना मनै खुशी.
3. पर्यटन मंत्री सतपाल महाराज बोलिन- मिथे फैसला की जानकारी नि
चारधाम देवस्थानम बोर्ड भंग हुणा का बाद अब सरकार का मंत्रियों पर ही सवाल खड़ा हुणा छिन, आज सुबेर मुख्यमंत्री पुष्कर सिंह धामी ना देवस्थानम बोर्ड भंग कना की घोषणा थै अपणा सोशल मीडिया एकाउंट से सार्वजनिक भी करि च. वखि पर्यटन मंत्री सपताल महाराजन बोली- ऊथे ये फैसला की जानकारी निच.
4. त्रिवेंद्र रावत कू बयान- तुमर समणि त मि अब हैस भि नि सकदु
जख चारधाम देवस्थानम बोर्ड थै भंग कना का ऐलान का बाद बीजेपी नेता वाहवाही लुटणा की कोशिक कना छिन, वखि पूर्व सीएम त्रिवेंद्र सिंह रावत ना ये फैसला से नाखुश दिखेणा छिन, मीडिया से बातचीत का दौरान, त्रिवेंद्र सिंह रावतन बोली- मिथे पता च कि तुमन क्या पूछण, तुमर समणि त मि अब हैस भि नि सकदु.
5. हरदा की देवस्थानम बोर्ड का फैसला पर प्रतिक्रिया, बोली- विश्वास खुणी च सरकार
धामी सरकारक देवस्थानम बोर्ड थै भंग कना का ऐलान का बाद कांग्रेस बीजेपी पर हमलावर दिखेणी च, कांग्रेस का वरिष्ठ नेता और पूर्व मुख्यमंत्री हरीश रावत ना बोली- जन सीएम धामी ना देवस्थानम बोर्ड थै भंग कना की बात कहकि रोल बैक करि, वेसे लगणु च कि बीजेपी ना जनता कू विश्वास खोयालि. ऊन बोली ये निर्णय से कांग्रेस थै मिललु फायदा.
6. हेनब गढ़वाल विवि कू नौवुं दीक्षांत समारोह, सीडीएस बिपिन रावत करला शिरकत
भोल गढ़वाल केंद्रीय विवि कू नौवुं दीक्षांत समारोह आयोजित किये जाणु च, ये समारोह मा बतौर मुख्यअतिथि सीडीएस बिपिन रावत और केंद्रीय शिक्षा मंत्री धर्मेंद्र प्रधान शामिल ह्वला. वखि समारोह का दौरान लोक गायक नरेंद्र सिंह नेगी थै डॉक्टरेट की मानद उपाधि भि दिये जालि.
7. सीएम धामी ना जसपुर मा 15 करोड़ से अधिक का विकासकार्यों कू करि शिलान्यास
मुख्यमंत्री पुष्कर सिंह धामी आज तय कार्यक्रम का अनुसार जसपुर पहुंचिन, जैका बाद ऊना यख 15 करोड़ से अधिक नौ विकासकार्यों कू शिलान्यास करि, अपण संबोधन मा सीएम धामी ना बोली- प्रदेश का विकासा खुण सरकार वचनबद्ध, 2025 तक नबंर राज्य बड़लु उत्तराखंड.
8. पीआरडी जवानों ना करि सीएम आवास कूच, पुलिसन रोकी
प्रांतीय रक्षक दल यानी पीआरडी का जवानों न भि सरकार का खिलाफ अब मोर्चा खोल यालि, आज सुबेर सैकड़ों की तादाद मा पीआरडी जवानों ना सीएम आवास कूच करि, वखि पुलिस ना प्रदर्शकारियों थै हाथीबड़कला मा ही बैरिकैडिंग लगैकि रोक द्या. पीआरड़ी जवान मानदेय, सालभर नौकरी औऱ पीएफ की मांग थै लेकि प्रदर्शन कना छिन.
9. उत्तरकाशी मा मॉर्डन पुलिस कंट्रोल रूम कू उद्घाटन
उत्तरकाशी जिला मुख्यालय समेत गंगोत्री और यमुनोत्री धामक निगरानी सीसीटीवी से किये जालि, डीजीपी अशोक कुमार ना आज वर्चुअली उत्तरकाशी पुलिस लाइन मा मॉर्डन पुलिस कंट्रोल रूम कू उद्धाटन करि. ये कंट्रोल रूम से जिला मुख्यालय सहित अन्य क्षेत्रों में लग्या 70 हाई रेज्युलेशन CCTV कैमरों से मॉनिटरिंग किये जालि.
10. पहाड़ों की रानी मसूरी मा क्रिसमस की तैयारी शुरू
पहाड़ों की रानी मसूरी मा क्रिसमस की तैयारियां अभी बटि शुरू ह्वे गिन, यै कड़ी मा मसूरी स्थित एक पांच सितारा होटल मा क्रिसमस का दिन परोसा जाण वला केक की सेरेमनी आयोजित किये ग्याई, जैमा स्कूली बच्चों ना केक कू मिक्सचर तैयार करि, साथ ही ये मौका पर सांस्कृति कार्यक्रमों कू आयोजन भि किये ग्या.
